މީހުން ފާޑުކިޔާތީ މަޝްހޫރު ލަވަކިޔުންތެރިޔާ އަރިއާނާ ގްރާންޑޭ އާންމުންގެ ލޯތަކުން ގެއްލެނީ

އަންނަ މަހު "އިޓާނަލް ސަންޝައިން" ޓުއާ ނިންމާލުމަށްފަހު، މަޝްހޫރު ލަވަކިޔުންތެރިޔާ އަރިއާނާ ގްރާންޑޭ އާންމުންގެ ތެރެއަށް ނުކުތުން ހުއްޓާލުމަށާއި، ލަންޑަނުގައި ހުށަހަޅައިދިނުމަށް ހަމަޖެހިފައިވާ މިއުޒިކަލް ޕްރޮޑަކްޝަނެއްގައި ބައިވެރިނުވާން ނިންމައިފި އެވެ.

އުމުރުން 33 އަހަރުގެ އެމެރިކާގެ ލަވަކިޔުންތެރިޔާގެ މަންދޫބަކު "ޕީޕަލް" މެގަޒިނަށް މައުލޫމާތު ދެމުން ބުނީ، އޭނާ އާންމުންގެ ތެރެއަށް ނުކުމެ އުޅުމުގެ ސަބަބުން "ނިމުމެއް ނެތް ފާޑުކިޔުންތަކާ" ކުރިމަތިލާންޖެހޭތީ، މިހާރު ކުރިއަށްދާ ޓުއާ ނިމުމުން އާންމުންގެ ލޮލަށް ނުފެންނާނެހެން އެކަހެރިވުމަށް ގްރާންޑޭ ނިންމާފައިވާ ކަމަށެވެ.

ފާއިތުވި އަހަރުތަކުގައި ގްރާންޑޭގެ ހަށިގަނޑަށް އައިސްފައިވާ ބަދަލުތަކާއި އޭނާގެ ސިއްހީ ހާލަތާ ގުޅޭގޮތުން އާންމުންގެ މެދުގައި ތަފާތު ވާހަކަތަކެއް ވަނީ ދެކެވިފަ އެވެ.

މިދިޔަ ހުކުރު ދުވަހު ނެރުނު އޭނާގެ އާ އަލްބަމް "ޕެޓަލް" އާއި، އެ އަލްބަމް އިޝްތިހާރު ކުރުމަށް އާންމުކުރި މަންޒަރުތަކާއެކު، އޭނާގެ ސިއްހަތާ މެދު ކުރެވޭ ތުހުމަތުތައް ވަނީ އިތުރަށް ގަދަވެފަ އެވެ.

ގްރާންޑޭގެ މަންދޫބު "ޕީޕަލް" މެގަޒިނަށް ބުނީ، އޭނާ ބޭނުންވަނީ ވަރަށް އުފާވެރިކަމާއެކު އަދި ސިއްހަތު ސަލާމަތުން ހުރެ މި ޓުއާ ނިންމާލުމަށް ކަމަށެވެ. އަދި އޭގެ ފަހުން އާންމުންގެ ކުރިމައްޗަށް ނުކުމެ ކުރާ މަސައްކަތްތަކުން ބްރޭކެއް ނަގާނީ، އޭނާއަށް އަމާޒުވާ ނިމުމެއް ނެތް ފާޑުކިޔުންތަކުން ސަލާމަތްވުމަށް ކަމަށްވެސް މަންދޫބު ފާހަގަކުރި އެވެ.

އިތުރަށް މަންދޫބު ބުނި ގޮތުގައި، ގްރާންޑޭ ހުށަހަޅައިދެނީ ހަށިގަނޑަށް ވަރަށް ބުރަ، ކަސްރަތީ ހަރަކާތްތައް ގިނަ ޝޯތަކެކެވެ. އަދި ކޮންމެ ރެއަކުވެސް އޭނާ ޝޯތައް ހުށަހަޅައިދެނީ ވަރަށް ދުޅަހެޔޮކަމާއެކު، މަތީ ފެންވަރެއްގައި ކަމަށް ވެސް ބުނެފައިވެ އެވެ.

މި ޓުއާގެ އެންމެ ފަހު ޝޯ އޮންނާނީ ސެޕްޓެމްބަރު މަހުގެ 1 ވަނަ ދުވަހު ލަންޑަނުގަ އެވެ.

"ތޭންކް ޔޫ، ނެކްސްޓް" އަދި "7 ރިންގްސް" ފަދަ މަޝްހޫރު ލަވަތައް ކިޔާފައިވާ ގްރާންޑޭ، 1984 ވަނަ އަހަރުގެ މަޝްހޫރު މިއުޒިކަލް "ސަންޑޭ އިން ދަ ޕާކް ވިތު ޖޯޖް" ގައި ފެންނާނެ ކަމަށް ކުރިން އޮތީ އިއުލާންކޮށްފަ އެވެ. މި ޕްރޮޑަކްޝަނުގައި އޭނާއާއެކު ފެންނާނީ "ވިކެޑް" ފިލްމުންވެސް ފެނިގެންދާ އިނގިރޭސި އެކްޓަރު ޖޮނަތަން ބެއިލީ ކަމަށް ވެސް ވަނީ އިއުލާނު ކޮށްފަ އެވެ.