އޯގަސްޓު މަހު ނުކުންނާނެ 5 ފިލްމެއް

އަންނަ އޮގަސްޓް މަހު ނުކުންނާނެ ކަމަށް ބެލޭ ހޮލީވުޑްގެ ތަފާތު ފިލުމުތަކުގެ ތެރޭގައި ހިމެނޭ ފަސް ފިލްމަކަށް ބަލާލާނަމެވެ. 

1. އައިސް ކްރީމް މޭން

'އައިސްކްރީމް މޭން' ފިލްމުގެ މަންޒަރެއް | ސްޓޫޑިއޯ ކެނަލް

"ކެބިން ފީވާ" އަދި "ހޮސްޓެލް" ފަދަ ފިލްމުތަކުގެ ޑައިރެކްޓަރު އީލައި ރޮތް، ކުޑަ ބަޖެޓަކުން އުފައްދާފައިވާ ބިރުވެރި ފިލްމު "އައިސް ކްރީމް މޭން" އާއެކު އަނެއްކާވެސް އެނބުރި އަތުވެއްޖެ އެވެ. މި ފިލްމަކީ އޭނާގެ މިހާތަނަށް އެންމެ ބިރުވެރި އަދި ލޭއޮހޮރުވުން ގިނަ ފިލްމަށް ވުން އެކަށީގެންވެ އެވެ. މި ފިލްމުގައި އާރީ މިލެން ކުޅެނީ އެމެރިކާގެ އަވަށެއްގައި އައިސްކްރީމް ވިއްކަން އުޅޭ ސިއްރުވެރި މީހެއްގެ ރޯލެވެ. އޭނާ ވިއްކާ އައިސްކްރީމް ކެއުމުން ކުޑަކުދިންނަކީ މީހުން މަރާ ނުރައްކާތެރި ބަޔަކަށް ބަދަލުވެ އެވެ. "ވެޕަންސް" ފިލްމުގެ ނިމުމުގައި ކުޑަކުދިންތަކެއް ވަރުގަދަ ޝިކާރަވެރިންތަކަކަށް ބަދަލުވާ މަންޒަރު ކަމުދިޔަ ފަރާތްތަކަށް "އައިސް ކްރީމް މޭން" އަކީ ވަރަށް ކަމުދާނެ ފިލްމެކެވެ. "ގީކް ވައިބްސް ނޭޝަން" އަށް ދިން އިންޓަވިއުއެއްގައި ރޮތު ބުނީ، މިއީ އޭނާގެ މިހާތަނަށް އެންމެ ތަފާތު އަދި "ކްރޭޒީ" ފިލްމަށް ހަދަން ބޭނުންވާ ކަމަށެވެ. އޭނާ ސިފަކުރި ގޮތުގައި މިއީ ކުޑަކުދިން ބޭނުންކޮށްގެން އުފައްދާފައިވާ "ދަ ބާޑްސް" ފަދަ ވަރަށް އާދަޔާ ހިލާފު ފިލްމެކެވެ.

މި ފިލްމު އޮސްޓްރޭލިއާ އާއި ނިއުޒީލޭންޑްގައި އޯގަސްޓް 6 ގައި ރިލީޒްކުރާއިރު، އެމެރިކާ، އިނގިރޭސިވިލާތް، ކެނެޑާ އަދި އަޔަލޭންޑްގައި ރިލީޒްކުރާނީ އޯގަސްޓް 7 ގައެވެ.

2. ދަ ޑޯގް ސްޓާސް

"ދަ ޑޯގް ސްޓާސް" އިން ފެނިގެންދާ މަންޒަރެއް | ޓުވެންޓީއަތު ސެންޗަރީ ފޮކްސް

ލެޖެންޑަރީ ޑައިރެކްޓަރު ރިޑްލީ ސްކޮޓްގެ އުމުރުން މިހާރު 88 އަހަރު ފުރިފައިވީ ނަމަވެސް، އޭނާގެ މަސައްކަތްތައް ކުރިއަށްވުރެ ވެސް މިހާރު ގިނައެވެ. ވޭތުވެދިޔަ ފަސް އަހަރު ތެރޭގައި "ދަ ލާސްޓް ޑިއުލް"، "ހައުސް އޮފް ގޫޗީ"، "ނަޕޯލިއަން" އަދި "ގްލޭޑިއޭޓާ II" ފަދަ ފިލްމުތައް އުފެއްދުމަށްފަހު، މިހާރު އޭނާ ވަނީ ޕީޓާ ހެލާގެ ނޮވެލްގެ މައްޗަށް ބިނާކޮށް "ދަ ޑޯގް ސްޓާސް" ކިޔާ ތްރިލާ ފިލްމެއް ޑައިރެކްޓްކޮށްފަ އެވެ. ދުނިޔެއަށް ކުރިމަތިވާ ނުރައްކާތެރި ރޯގާއަކަށްފަހު ސަލާމަތްވާ މީހުންގެ ތެރޭގައި ޕައިލެޓެއް (ޖޭކޮބް އެލޯޑީ)، މެޑިކެއް (މާގްރެޓް ކޮލީ) އަދި ކުރީގެ ސިފައިންގެ މީހެއް (ޖޯޝް ބްރޯލިން) ހިމެނެ އެވެ. ނަމަވެސް، މި އެންމެންނަށްވުރެ ވެސް ދިރިހުރުމުގެ ހުނަރު ބޮޑީ ސްކޮޓްގެ ކިބައިގައި ކަމަށް ބުނެވިދާނެ އެވެ. "ހެޕީ ސޭޑް ކޮންފިއުޒްޑް" ޕޮޑްކާސްޓްގައި އެލޯޑީ ބުނި ގޮތުގައި، ސްކޮޓްގެ މުޅި ހަޔާތް ގުޅިފައިވަނީ ސިނަމާއާ އެވެ. އަދި އޭނާގެ ހަށިގަނޑުގައި ހިނގަނީ ސިނަމާގެ ލޭ ކަމަށާއި، އޭނާ ދިރިހުރުމުގެ އަސްލަކީ ވެސް އެއީ ކަމަށް އެލޯޑީ ފާހަގަކުރި އެވެ.

މި ފިލްމު ބައިނަލްއަގުވާމީ ގޮތުން ރިލީޒްކުރަން ހަމަޖެހިފައިވަނީ އޯގަސްޓް 26 އިން 28 އަށެވެ.

3. ޔޫނިއަން ކައުންޓީ

ޔޫނިއަން ކައުންޓީން ފެނިގެންދިޔަ މަންޒަރެއް | ސަން ޑާންސް ފެސްޓިވަލް

"ޔޫނިއަން ކައުންޓީ" އަކީ އޯހިއޯގެ ރަށެއްގައި ދިރިއުޅޭ، މަސްތުވާތަކެއްޗަށް ދެވިހިފާފައިވާ ދެބެއިންގެ ވާހަކަ ދައްކުވައިދޭ ފިލްމެކެވެ. ވިލް ޕޯލްޓާ އަދި ނޯއާ ސެންޓިނިއޯ ކުޅޭ މި ދެ ރޯލަކީ ޖަލަށް ނުގޮސް ސަލާމަތްވުމަށްޓަކައި މަސްތުވާތަކެއްޗާ ދުރުވެ، ވަޒީފާ އަދާކުރަން މަސައްކަތްކުރާ ދެ މީހުންގެ ރޯލެވެ. ޕޯލްޓާގެ ހުނަރުވެރި އެކްޓިންއަށް ގިނަ ބައެއްގެ ތައުރީފު ލިބިފައިވާއިރު، މި ފިލްމުގެ ހަގީގީ ކަމަކީ މީގެ ޑައިރެކްޓަރު އެޑަމް މީކްސް އަކީ އޯހިއޯއަށް އުފަން މީހަކަށް ވުމެވެ. އަދި ފިލްމުގެ މައިގަނޑު ދެ އެކްޓަރުން ފިޔަވައި، މަސްތުވާތަކެއްޗާ ދުރުވުމުގެ ޕްރޮގްރާމްގައި ބައިވެރިވާ އެހެން ހުރިހާ އެންމެންނަކީ ވެސް ހަގީގީ ދިރިއުޅުމުގައި އެ ތަޖުރިބާކޮށްފައިވާ އާންމު މީހުންނެވެ. "ދަ ރެޕް" ގެ ޗޭސް ހަޗިންސަން ބުނި ގޮތުގައި، މި ފިލްމުން އިންސާނިއްޔަތުކަން ފެނިގެންދާލެއް ބޮޑުކަމުން، ބަލާ މީހާއަށް އިހުސާސްވަނީ އެ މީހުންނާއެކު އެއް މޭޒެއްގެ ދޮށުގައި އިށީނދެގެން ތިބެވޭ ހެންނެވެ.

މި ފިލްމު އެމެރިކާގައި ރިލީޒްކުރީ އޯގަސްޓް 14 ގައެވެ.

4. ދަ މެޖިކް ފާރަވޭ ޓްރީ

"ދަ މެޖިކް ފާރަވޭ ޓްރީ" ފިލްމުގެ މަންޒަރެއް | ނީލް ސްޓްރީޓް

"ޕެޑިންގްޓަން 2" އަދި "ވޮންކާ" ގެ ކޯ-ރައިޓަރު ސައިމަން ފާނަބީ، އިނގިރޭސި ކުޑަކުދިންގެ އަދަބިއްޔާތުގެ މަޝްހޫރު ވާހަކައެއް ކަމަށްވާ އެނިޑް ބްލައިޓަންގެ "ދަ މެޖިކް ފާރަވޭ ޓްރީ" އަށް އާ ދިރުމެއް ގެނެސްދީފި އެވެ. ފާނަބީގެ މި ޒަމާނީ ފިލްމުގައި، އީޖާދުވެރިއަކާއި އޭނާގެ ފިރިމީހާ (ކްލެއާ ފޯއީ އަދި އެންޑްރޫ ގާފީލްޑް) އެމީހުންގެ ތިން ދަރިން އިންޓަނެޓާ ދުރުކުރުމަށްޓަކައި ރަށުން ބޭރު އެކަހެރި ހިސާބަކަށް ބަދަލުވެ އެވެ. އެތަނުން އެ ކުދިންނަށް ފެންނަ ގަހެއްގެ ގޮފިތަކުގެ ތެރެއިން އެހެން ދުނިޔެތަކަށް ދެވޭ ދޮރުތަކެއް ހުރެ އެވެ. އަދި އެ ދުނިޔެތަކުން ސިލްކީ (ނިކޯލާ ކޮލަން)، މޫންފޭސް (ނޮންސޯ އަނޯޒީ)، ޑޭމް ވޮޝްއަލޮޓް (ޖެސިކާ ގަނިން) އަދި ނުލަފާ ޑޭމް ސްނެޕް (ރެބެކާ ފާގަސަން) ފަދަ ތަފާތު ކެރެކްޓާތަކާ ބައްދަލުވެއެވެ. "ޓައިމް އައުޓް" ގެ ފިލްމީ ފާޑުކިޔުންތެރިޔާ ފިލް ޑި ސެމްލިއަން ބުނި ގޮތުގައި، މިއީ ސްމާޓްފޯނުގެ ޒަމާނަށް ފެތޭ ގޮތަށް ބްލައިޓަންގެ ވާހަކަ ބަދަލުކޮށްފައިވާ ވަރަށް މޮޅު ފިލްމެކެވެ. މޮޅު އެކްޓަރުންނާއި، މުހިންމު މެސެޖެއް އެކުލެވޭ މި ފިލްމަކީ އާއިލާއާއެކު ބަލާލަން ވަރަށް މަޖާ، އަދި ވައިފައި ނިވާލުމަށް ހިތްވަރުދޭ ފިލްމެކެވެ.

މި ފިލްމު އެމެރިކާ އާއި ކެނެޑާގައި ރިލީޒްކުރީ އޯގަސްޓް 21 ގައެވެ.

5. ކަޔޯޓީ ވާސަސް އޭކްމީ

ކަޔޯޓީ ވާސަސް އޭކްމީގެ މަންޒަރެއް | ވޯނަރ ބްރަދަރސް

"ކަޔޯޓީ ވާސަސް އޭކްމީ" އަކީ ދުވަހަކުވެސް ފެންނާނެ ކަމަށް އުންމީދު ކުރެވުނު ފިލްމެއް ނޫނެވެ. "ރޮޖަރ ރެބިޓް" ފިލްމެކޭ އެއްފަދައިން، ހަގީގީ އެކްޓަރުންނާއި ޓޫ-ޑީ އެނިމޭޓެޑް ކެރެކްޓަރުން ހިމަނައިގެން އުފައްދާފައިވާ މި ފިލްމު ބިނާވެފައިވަނީ "ލޫނީ ޓިއުންސް" ގެ މަގުބޫލު ދެ ކެރެކްޓަރުން ކަމަށްވާ ވައިލް އީ ކަޔޯޓީ އާއި ރޯޑްރަނާގެ މައްޗަށެވެ. ކުރީގެ ކާޓޫންތަކުގައި ފެންނަ ގޮތަށް، ކަޔޯޓީ ގަންނަ ތަކެތި އަބަދުވެސް ހުންނަނީ ހަލާކުވެފައި ނުވަތަ މައްސަލަ ޖެހިފަ އެވެ. އެހެންކަމުން މި ފިލްމުގައި އޭނާ ވަނީ އެ ތަކެތި ވިއްކާ ކުންފުންޏާ ދެކޮޅަށް ދައުވާކޮށްފަ އެވެ. މި މައްސަލައިގައި ކަޔޯޓީގެ ވަކީލެއްގެ ގޮތުގައި ފެނިގެންދަނީ ވިލް ފޯޓޭ އެވެ. މި ފިލްމުގެ އެންމެ އާދަޔާ ހިލާފު ކަމަކީ، ފިލްމުގެ މަސައްކަތް އެއްކޮށް ނިމިފައި ވަނިކޮށް، މީގެ ތިން އަހަރު ކުރިން ވޯނާ ބްރަދާސް އިން މި ފިލްމު ރިލީޒްނުކޮށް ހިފެހެއްޓުމެވެ. އެ ސްޓޫޑިއޯއިން އެގޮތަށް ނިންމީ ފިލްމު ރިލީޒް ކުރުމުގެ ބަދަލުގައި، ޓެކްސް އިން ލިބޭ އިނާޔަތެއް ނުވަތަ "ޓެކްސް ރައިޓް-އޮފް" އެއް ހޯދުމަށެވެ. (ވޯނާ ބްރަދާސްގެ "ބެޓްގާލް" ފިލްމަށްވެސް ދިމާވީ ހަމަ މިފަދަ ގޮތެކެވެ.) ނަމަވެސް، އެތައް ދުވަހެއްގެ އިންތިޒާރަށްފަހު މިހާރު މިވަނީ މިނިވަން ކުންފުންޏަކުން "ކަޔޯޓީ ވާސަސް އޭކްމީ" ރިލީޒްކުރާ ގޮތަށް ހަމަޖެހިފަ އެވެ. މި ފިލްމުގެ ސްކްރީން ރައިޓަރު ސޭމީ ބާޗް ބުނި ގޮތުގައި، ކަޔޯޓީ އަށް ލިބިފައިވާ ދުވަހަކުވެސް އުންމީދު ކަނޑާނުލާ ސިފައަކީ ވަރަށް ބޮޑު ހިތްވަރެކެވެ. "އެމްޕަޔަރ" މަޖައްލާއަށް ދިން އިންޓަވިއުއެއްގައި އޭނާ ބުނީ، ކަންކަން ކާމިޔާބު ކުރުން އުނދަގޫވެ، ސަތޭކަ ފަހަރު ނާކާމިޔާބުވީ ނަމަވެސް އަލުން މަސައްކަތް ކުރުމުގައި ރީތިކަމެއް އެކުލެވިގެންވާ ކަމަށެވެ.

މި ފިލްމު ބައިނަލްއަގުވާމީ ގޮތުން ރިލީޒް ކުރުމަށް ހަމަޖެހިފައިވަނީ އޯގަސްޓް މަހުގެ 20 އިން 28 އަށެވެ.