ކަމަދޫ އީދު އުފާ ލައިވް ކަވަރޭޖަށް ރާއްޖެޓީވީ ގެ ޓީމު އެ ރަށަށް: ރަށުން ހޫނު މަރުހަބާއެއް ކި
ބ. ކަމަދޫގައި މިއަހަރު ބާއްވާ ފޯރިގަދަ އަޟްޙާ އީދުގެ ހަރަކާތްތައް ރާއްޖެޓީވީ މެދުވެރިކޮށް ވަގުތުން ގެނެސްދިނުމަށް ވަނީ ހަމަޖެހިފަ. "ހިތުން ހިތަށް" މި ޝިއާރުގެ ދަށުން ކުރިއަށްގެންދާ މި ހަރަކާތްތަކަށް 2000 އަށް ވުރެ ގިނަ މީހުން ޒިޔާރަތްކުރާނެ ކަމަށް ލަފާކުރެވޭއިރު، މިއީ އެ ރަށުގެ ސަގާފަތާއި އިޖުތިމާއީ ބަދަހިކަން ދައްކުވައިދޭނެ ވަރަށް ބޮޑު ހަރަކާތެއް. އަންގާރަ ދުވަހުގެ ރޭ ރަސްމީކޮށް ފަށާ މި ކުޅިވަރުތަކަށް ކަމަދޫގެ ކައުންސިލާއި އީދު ކޮމިޓީން ވަނީ ފުރިހަމައަށް ތައްޔާރުވެފަ.
ރާއްޖެޓީވީ ގެ ޓީމުން ކަމަދުއަށް ދިއުމުން އެ ރަށުގެ ކައުންސިލްގެ ރައީސް ހަސަން ޒަރީރު އާއި ކަމަދޫ އީދު ކޮމެޓީގެ ރައީސް މުހައްމަދު ޝަމީމް ގެ އިތުރުން ކޮމިޓީގެ މެންބަރުން ވަނީ ހޫނު މަރުހަބާ އެއް ކިޔާފަ | ރާއްޖެއެމްވީ
ކަމަދޫ އީދު އުފާ ލައިވް ކަވަރޭޖަށް ރާއްޖެޓީވީގެ ޓީމު ދިއުމުން އެ ރަށުން ހޫނު މަރުހަބާއެއް ކިޔައިފި އެވެ.
1447 ވަނަ އަހަރުގެ އަޟްޙާ ޢީދުގައި ބ. ކަމަދޫގައި ކުރިއަށްގެންދާ ފޯރިގަދަ އީދު ކުޅިވަރުތައް މި ފަހަރުވެސް ރާއްޖެޓީވީ އިން ލައިވް ކުރުމަށް ވަނީ ހަމަޖެހިފަ އެވެ. ލައިވް ކަވަރޭޖަށް ރާއްޖެޓީވީ ގެ ޓީމުން ކަމަދުއަށް ދިއުމުން އެ ރަށުގެ ކައުންސިލްގެ ރައީސް ހަސަން ޒަރީރު އާއި ކަމަދޫ އީދު ކޮމެޓީގެ ރައީސް މުހައްމަދު ޝަމީމް ގެ އިތުރުން ކޮމިޓީގެ މެންބަރުން ވަނީ ހޫނު މަރުހަބާ އެއް ކިޔާފަ އެވެ.
ކަމަދޫގެ އީދު ކުޅިވަރުތައް ރަސްމީކޮށް ފެށުމަށް ހަމަޖެހިފައިވަނީ އަންގާރަ ދުވަހުގެ ރޭގަ އެވެ. ރާއްޖެޓީވީ މެދުވެރިކޮށް މި ހުރިހާ ހަރަކާތްތަކެއް ބެލުންތެރިންނަށް ވަގުތުން ގެނަސްދިނުމަށް ހަމަޖެހިފައިވާއިރު މިކަމާ ގުޅިގެން ރާއްޖެޓީވީގެ ޑެޕިއުޓީ ސީއޯއޯ ނާޒްމީ ވިދާޅުވީ ކަމަދޫ ފާހަގަ ކުރެވެނީ ތަފާތު ރަށެއްގެ ގޮތުގައި ކަމަށެވެ.
ކަމަދޫ އަކީ ސަގާފީ ކުޅިވަރުތައް ވަރާށް ފުރިހަމައަށް ގެނަސްދޭ ރަށެއްގެ ގޮތުގައި ކަމަދޫ ފާހަގަ ވެފައިވާއިރު މި ހުރިހާ ކުޅިވަރުތަކެއް ވެސް ރާއްޖެޓީވީ މެދުވެރިކޮށް ގެނަސްދޭނެ ކަމުގެ ޔަގީންކަން ނާޒްމީ ވަނީ ދެއްވާފަ އެވެ.
ކުލަގަދަކޮށް މިފަހަރުގެ ވެސް އީދު ފާހަގަ ކުރަން ތައްޔާރަށް އޮތް ކަމަދުއަށް އީދާ ގުޅިގެން 2000 އަށް ވުރެ ގިނަ މީހުން ޒިޔާރަތް ކުރާނެ ކަމަށް ކައުންސިލްގެ ރައީސް ޒަރީރު ވަނީ ވިދާޅުވެފަ އެވެ. ޒަރީރު ވިދާޅުވީ އަޟްޙާ އީދާރަށް ކަމަދޫ ވަރަށް ބޮޑަށް ތައްޔާރުވާނެ ކަމަށާއި، ރަށަށް އަންނަ ހުރިހާ މެހަމާނުންނަށް ވަރަށް ފުރިހަމައަށް މަރުހަބާ ކިޔާނެ ކަމަށެވެ.
ޢީދަށް ވެފައިވާ ތައްޔާރީތައް ހިއްސާކޮށް އީދު ކޮމިޓީގެ ރައީސް ޝަމީމް ވިދާޅުވީ ރަށުގެ ތަރައްގީއާއި، އިޖްތިމާއީ އެންމެހައި ކަންކަމުގައި މުޅި ރަށް އެކުއެކީގައި މަސައްކަތް ކުރާނެ ކަމަށެވެ. އަދި ޚާއްސަކޮށް އީދު ހަރަކާތްތަކުގައި އެންމެން ބައިވެރިވާނެ ކަމަށް އޭނާ ވިދާޅުވި އެވެ. އަދި ވިދާޅުވީ ކަމަދޫގެ އީދަކީ ސަގާފީ، އިޖްތިމާއީ، އިގްތިސާދީ ވަރަށް ބޮޑު ހަރަކާތެއް ކަމަށާއި، އެއްވެސް ހިޔާލު ތަފާތުވުމެއް ނެތް ކަމަށެވެ.
ޝަމީމް ވިދާޅުވީ މިދިޔަ އަހަރު އީދާ ގުޅިގެން ''ހިނިތުންވުން'' ޝިއާރެއް ބޭނުންކުރި ކަމަށާއި، އެގޮތަށް މިއަހަރު ވެސް ޝިއާރެއްގެ ގޮތުގައި ''ހިތުން ހިތަށް'' ބޭނުންކުރާ ކަމަށެވެ. އަދި މިކަމުގެ ސަބަބުން ގިނަ ބައެއްގެ ލީތްބާއި، ސަމާލުކަން ލިބި ރަށް ވެސް ވަރަށް ބޮޑަށް ޕްރޮމޯޓްވާ ކަމަށް އޭނާ ވިދާޅުވި އެވެ.
