ވީއޭއެމް އެސޯސިއޭޝަން ކަޕް: މޯލްޑިވިއަންއާއި ޕޮލިސް މޮޅުވެއްޖެ

ވޮލީބޯލް އެސޯސިއޭޝަން ކަޕްގައި މޯލްޑިވިއަން ސްޕޯޓްސް އެންޑް ރެކްރިއޭޝަން އާއި ޕޮލިސް ކްލަބް ކުޅުނު މެޗުތަކުން އެ ދެ ޓީމު ވެސް މޮޅުވެއްޖެއެވެ.

ބުދަ ދުވަހުގެ ހަވީރު މަލްސަން ސްޕޯޓްސް ކްލަބާއި ދެކޮޅަށް ކުޅުނު މެޗު މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބްއިން ކާމިޔާބު ކޮށްފައިވަނީ ސީދާ ތިން ސެޓުންނެވެ. މި މެޗުގެ ސެޓުތައް މޯލްޑިވިއަންއިން ގެންގޮސްފައި ވަނީ 25-12، 25-10 އަދި 26-24 އިންނެވެ. މި ދެ ޓީމު ވާދަ ކުރި މެޗުގެ މޮޅު ކުޅުންތެރިޔަކަށް ހޮވިފައި ވަނީ މޯލްޑިވިއަންގެ ޖާޒީ ނަމްބަރު 15، މުރާދް ޖެހާންއެވެ.

ބުދަ ދުވަހުގެ ރޭ އެސްޕިރޭޝަން އެންޑް އިންސްޕިރޭޝަން ސްޕޯޓްސް ކްލަބާއި ދެކޮޅަށް ކުޅުނު މެޗުން ޕޮލިސް ކްލަބް މޮޅުވެފައިވަނީ ސީދާ ތިން ސެޓުންނެވެ. މި މެޗުގެ ސެޓުތައް އެ ޓީމުން ގެންގޮސްފައި ވަނީ 25-06، 25-13 އަދި 25-17 އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ޕޮލިސް ކްލަބްގެ ޖާޒީ ނަމްބަރު 16 ސާދިގް މޫސާއެވެ.

މި މުބާރާތުގައި މި ދެ ޓީމުން ކުޅުނު ފުރަތަމަ މެޗު ވެސް ވަނީ ކާމިޔާބު ކޮށްފައެވެ. އެގޮތުން މޯލްޑިވިއަންއިން ވަނީ ފުރަތަމަ މެޗުގައި އެސްޕިރޭޝަން އެންޑް އިންސްޕިރޭޝަން ސްޕޯޓްސް ކްލަބް ތިން ސެޓު އެއް ސެޓުން ބަލިކޮށްފައެވެ. އަދި ޕޮލިސް ކްލަބްއިން ވަނީ ފުރަތަމަ މެޗުގައި މަލްސަން ސްޕޯޓްސް ކްލަބް ތިން ސެޓު އެއް ސެޓުން ބަލިކޮށްފައެވެ.

މި މުބާރާތުގައި ޖުމްލަ އަށް ޓީމު ވަނީ ބައިވެރިވެފައެވެ. އެގޮތުން މުބާރާތުގެ ޕޫލް އޭގައި ހިމެނިފައި ވަނީ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބާއި ޕޮލިސް ކްލަބާއި އެސްޕިރޭޝަން އެންޑް އިންސްޕިރޭޝަން ސްޕޯޓްސް ކްލަބްގެ އިތުރުން މަލްސަން ސްޕޯޓްސް ކްލަބެވެ. ޕޫލް ބީގައި ހިމެނިފައި ވަނީ ދިވެހި ސިފައިންގެ ކްލަބާއި ސީ ލައިފް ސްޕޯޓްސް ކްލަބާއި ގުޑީސް ސްޕޯޓްސް ކްލަބްގެ އިތުރުން ވަން އެންޑް އޮންލީ ރީތި ރަށެވެ.

މި މުބާރަތުގެ ކުޅުން މި މަހުގެ 28 ވަނަ ދުވަހާ ހަމަޔަށް ސޯޝަލް ސެންޓަރުގެ އިންޑޯ ކޯޓުގައި ކުރިޔަށް ދާނެއެވެ.