މުސީބާތަކުން ސަލާމަތްވެ، ދިރިއުޅުން ރަނގަޅުވާން އެދޭ މީހާ މައިންބަފައިންނަށް ކަމޭ ހިތަން ޖެހޭ: ޚުތުބާ
މައިންބަފައިންނަށް ކަމޭހިތުމަކީ ނަބީބޭކަލުންގެ ސިފައެއްކަން ފާހަގަކޮށް، އެއީ ދިރިއުޅުމުގައި ބަރަކާތް އިތުރުވެ މުސީބާތްތަކުން ސަލާމަތްވުމަށް އޮތް މަގެއް ކަމަށް ޚުތުބާގައި ބަޔާންކޮށްފައިވޭ. މާތް ﷲ އަށް އަޅުކަންކުރުމަށްފަހު ދެން އެންމެ ބޮޑު އިސްކަމެއް ދޭންޖެހެނީ މައިންބަފައިންނަށް ކިޔަމަންތެރިވުމަށް ކަމަށާއި، އެއީ ސުވަރުގެ ވަދެވުމުގެ ސަބަބެއްކަން ޚުތުބާގައި ހަނދާން ކޮށްދީފައިވޭ. މީގެއިތުރުން މައިންބަފައިންގެ ހައްގުތައް އަދާކުރުމަކީ ހަމައެކަނި ފައިސާ ދިނުން ނޫން ކަމަށާއި، އެމީހުންގެ ގުރުބާނީގެ އަގުވަޒަންކޮށް އޯގާތެރިކަމާއެކު މުއާމަލާތްކުރުމަށް ޚުތުބާގައި ނަސޭހަތްތެރިވި.
ހުކުރު ނަމާދު ކުރުމަށް އިސްލާމީ މަރުކަޒުގައި ޖަމާއަތް ހަދައިގެން. | ރާއްޖެއެމްވީ
މުސީބާތަކުން ސަލާމަތްވެ، ދިރިއުޅުން ރަނގަޅުވާން އެދޭ މީހާ މައިންބަފައިންނަށް ކަމޭ ހިތުމަށް ހުކުރު ޚުތުބާގައި ގޮވާލައިފި އެވެ.
''މައިންބަފައިންނަށް ކަމޭހިތުން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ ގުރްއާނުގެ ހަތް ތަނެއްގައި ﷲ تَعَالَى މައިންބަފައިންގެ ވާހަކަ ބަޔާން ކުރައްވާފައިވާ ކަމާއި، އޭގެ ތެރެއިން ހަތަރު ތަނެއްގައި ހަމައެކަނި އެކަލާނގެއަށް އަޅުކަން ކުރުމަށާއި، އެކަލާނގެއަށް ޝަރީކުނުކުރުމަށް އެންގެވުމާ ވިދިގެން މައިންބަފައިންނަށް ކިޔަންމަންތެރިކަން އަދާކުރުމުގެ ވާހަކަ ބަޔާންވެގެންވާކަން ފާހަގަކޮށްފަ އެވެ.
ޚުތުބާގައި ބުނީ މައިންބަފައިންނަށް ކަމޭހިތުމީ ނަބީބޭކަލުންނާއި ޞާލިހުންގެ ޚުލުގުފުޅެއް ކަމާއި، އެއީ މުސީބާތްތަކުން ސަލާމަތްވެވޭ، ބަރަކާތް ހާސިލުކޮށްދޭ އަދި ދުއާ އިޖާބަ ކުރެއްވުމުގެ ސަބަބެއް ކަމަށެވެ. އަދި އެ ކަމުގެ ސަބަބުން ހިތަށް ހަމަޖެހުން ލިބި، ދިރިއުޅުން ރަނގަޅުވާ ކަމަށް ޚުތުބާގައި ބުނެފައިވެ އެވެ.
މާތް ﷲ تَعَالَىގެ ހައްގު އަދާކުރުމަށް އަމުރުކުރެއްވެވުމާ ވިދިގެން ދެން އަމުރު ކުރެއްވެވީ މައިންބަފައިންގެ ހައްގުތައް އަދާ ކުރުމަށްކަން ފާހަގަކޮށް ޚުތުބާގައި ބުނީ، މައިންބަފައިންނަށް ކިޔަމަންތެރިވެ އިޙުތިރާމުކުރުމަކީ ސުވަރުގެ ވަދެވުމުގެ ސަބަބުތަކުގެ ތެރެއިން ސަބަބެއް ކަމަށެވެ.
މާތް ﷲ ވަޙީކުރައްވައިފައި ވާ އާޔަތުގެ މާނާގައި ވަނީ "އަދި ތިޔަބައިމީހުން، ހަމައެކަނި ﷲއަށް އަޅުކަންކުރާށެވެ! އަދި، އެކަލާނގެއާ އެއްވެސް އެއްޗެއް ޝަރީކުނުކުރާހުށިކަމެވެ! އަދި، މައިންބަފައިންނަށް ހެޔޮކޮށްހިތާށެވެ!" އަދި ވެސް އެކަލާނގެ ވަޙީކުރައްވައިފައި ވެ އެވެ. މާނައީ:"އެކަލާނގެއަށް މެނުވީ، ތިޔަބައިމީހުން އަޅުކަން ނުކުޅައުމަށާއި، މައިންބަފައިންނަށް ހެޔޮކޮށް ހިތުމަށް، ކަލޭގެފާނުގެ ވެރިރަސްކަލާނގެ ކަނޑައަޅުއްވައި އެންގެވިއެވެ. އެ ދެ މީހުން ކުރެ އެކަކު، ނުވަތަ އެ ދެމީހުން ތިބާގެގާތުގައި ތިބެ، މުސްކުޅިކަމާ ހަމަޔަށް ފޯރައްޖެނަމަ، އެދެމީހުންނަށް أُف ވެސް ނުބުނާށެވެ! (އެބަހީ: ނުރުހުމުގެ ކިތަންމެ ކުޑަ ބަހެއްވިޔަސް ނުބުނާށެވެ!) އަދި އެ ދެމީހުންނަށް، އަޑުލައި ނުހަދާށެވެ! އަދި މާތް ބަހަކުން އެ ދެމީހުންނަށް ބަސްބުނާށެވެ! އަދި އޯގާވެރިވުމުގެ ގޮތުން، ނިކަމެތިކަމުގެ ފިޔަ، ތިބާ އެ ދެ މީހުންނަށް ޓަކައި ތިރިކޮށްލާށެވެ! އަދި ބުނާށެވެ! އަޅުގެ ވެރިރަސްކަލާކޯއެވެ! ކުޑަކުއްޖަކު ކަމުގައި މިއަޅާވީ ދުވަހު، އެ ދެ މީހުން މި އަޅާ ބަލައި ބޮޑުކުރި ފަދައިން، އެ ދެ މީހުންނަށް رحمةލައްވައިފާނދޭވެ!"ހުކުރު ޚުތުބާ
މައިންބަފައިންވާ ގުރުބާނީތަކަށް އިޝާރާތްކޮށް ޚުތުބާގައި ބުނީ، މައިންބަފައިން އަހަރެމެންނަށް ޓަކައި އެ މީހުންގެ އަމިއްލަ އުފާތައް ގުރުބާން ކުރާ ކަމަށާއި، ދަރީންނަށްޓަކައި އެމީހުންގެ ހަޔާތް ގުރުބާން ކުރާ ކަމަށެވެ. މައިންބަފައިން އެފަދަ ގުރުބާނީއެއް ވަމުންދާއިރު، މިއަދު ދަރީންގެ ހަލަތާ މެދު ވިސްނާލަން ޖެހޭ ކަމަށް ޚުތުބާގައި ބުނެފައިވެ އެވެ.
ޚުތުބާގައި ބުނީ، މައިންބަފައިންނަށް ފައިސާފޮއްޗެއް ދެވުމުން، އެ ދެ މީހުންގެ ހައްގުތައް އަދާކުރެވުނީ ކަމަށް، ބައެއް މީހުންނަށް ހީވާ ކަހަލަ ކަމަށާއި، ނަމަވެސް އެއީ ހައްގުތައް އަދާ ކުރުން ނޫން ކަމަށެވެ. އަދި މައިންބަފައިންނަށް ހެޔޮކޮށްހިތާ އެމީހުންނަށް އޯގާތެރިވެ، އެމީހުންގެ ހައްގުތައް އަދާކުރުމަށް ޚުތުބާގައި ވަނީ ނަސޭހަތްތެރިވެފަ އެވެ.
