ޚުތުބާގައި ވަނީ މުސްލިމުން އިލްމު އުނގެނުމާއި ބިން އާރާސްތުކުރުމުގައި ހޯދި ކުރިއެރުންތައް ހިއްސާކޮށްފައި. މިއަދު އިސްލާމީ އުންމަތް ފުންވަޅުގަނޑަށް ވެއްޓުނީ ދީނާ ދުރުވެ ހަމައެކަނި މާއްދީ ދުނިޔެއަށް ހެއްލުމުން ކަމަށާއި، ގުރްއާނާއި ސުންނަތަށް އެނބުރި ރުޖޫއަވުމަށް ގޮވާލާފައިވޭ. އަދި ޣައިރު ދީންތަކުގެ އީދުތަކާއި މުނާސަބާތަކުގައި ބައިވެރިވުން މަނާކޮށް، އިސްލާމީ ސަގާފަތާ ޚިލާފު ކަންކަމުން ދުރުހެލިވުމަށް ނަސޭހަތްތެރިވެފައިވޭ.
ހުކުރު ނަމާދު ކުރުމަށް އިސްލާމީ މަރުކަޒަށް މީހުން ވަންނަނީ
ޣައިރު ދީންތަކުގެ ދީނީ އާދަކާދަތަކާއި، އެމީހުންގެ އީދުތަކާ މުސްލިމުން ދުރުވުމަށް ހުކުރު ޚުތުބާގައި ގޮވާލައިފި އެވެ.
''އިސްލާމީ ޚަޟާރަތުގެ ރަންޒަމާން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ މުސްލިމުން ކުރިއަރައިގެން ދިޔަ ގޮތް ވަރަށް ތަފްސީލު ކޮށް ހިއްސާ ކޮށްފަ އެވެ.
އިސްލާމީ ހަޟާރަތް ފެށިފައިވަނީ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ އަށް ވަޙީ ބާވައިލައްވާން ފެށުނު ހިސާބުން ކަން ފާހަގަކޮށް ޚުތުބާގައި ބުނީ އިސްލާމީ ހަޟާރަތުގެ މައިގަނޑު އަސާސްތަކުގެ ތެރޭގައި އިސްލާމީ އަގީދާއާއި، ޝަރުއީ، ހުކުމްތަކާއި، ރިވެތި އަހުލާގު ހިމެނޭ ކަމަށާއި، ބިން އާރާސްތުކުރުމާއި އިލްމު އުނގެނުމަކީ އެ މީހުންގެ ދީނާ ގުޅިފައިވާ ވާޖިބު ކަމެއްގެ ގޮތުގައި މުސްލިމުން ގަބޫލުކުރި ކަމަށެވެ.
އަދި ނަތީޖާއަކީ، މުސްލިމުން އުމްރާނީ ގޮތުންނާއި އިލްމީ ގޮތުން ދުނިޔޭގައި އޭރު އެއްވެސް ބަޔަކަށް ހޯދިފައިނުވާ އެތައް ކުރިއެރުންތަކެއް، މަދު އަހަރުތަކެއްގެ ތެރޭގައި ހޯދި ކަމަށް ޚުތުބާގައި ބުނެފައިވެ އެވެ.
މި ކައުނުގައި މާތް ﷲ ލައްވައިފައިވާ ކަންކަމާއި ތަފާތު އެކި މަޚްލޫޤުންނާ މެދު ވިސްނައިފިކުރުކުރުމަށް ކީރިތި ގުރްއާނުގެ އެތައް ތަނެއްގައި އެކަލާނގެ އަންގަވައިފައި ހުވެއެވެ. މާތް ﷲ ވަޙީކުރައްވައިފައި ވެއެވެ. މާނައީ: "ފަހެ، ޖަމަލު ހައްދަވައިފައި ވަނީ، ކޮންފަދައަކުންކަމާ މެދު އެއުރެން ޖަމަލަށް ނުބަލަނީހެއްޔެވެ؟ އަދި އުޑު އުފުއްލަވައިފައި ވަނީ، ކޮންފަދައަކުންކަމާ މެދު އެއުރެން އުޑަށް ނުބަލަނީހެއްޔެވެ؟ އަދި ފަރުބަދަތައް ކޮޅަށް ނަންގަވައިފައި ވަނީ، ކޮންފަދައަކުންކަމާ މެދު އެއުރެން ފަރުބަދަތަކަށް ނުބަލަނީހެއްޔެވެ؟ އަދި ބިން ފަތުރުއްވައިފައި ވަނީ، ކޮންފަދައަކުންކަމާ މެދު އެއުރެން ބިމަށް ނުބަލަނީހެއްޔެވެ؟"ހުކުރު ޚުތުބާ
ޚުތުބާގައި ބުނީ މުސްލިމުން ތަފާތު އިލްމު ތަކުގައި ކުރިއަރައި މެދުއުޑުގައި ފިޔަޖަހަމުން ދިޔައީ، ކުރީން ބުނެވުނު އިސްލާމީ ސަގާފަތުގެ މަތީގައި އީމާންތެރިކަމާ އެކު ސާބިތުވެ ތިބެގެން ކަމަށެވެ.
ނަމަވެސް މިއަދު އިސްލާމީ އުންމަތް ފުންވަޅުގަނޑަށް ވެއްޓުނީ މުސްލިމުން ދީނާ ދުރުވެ، ދީނާއި ސިޔާސަތު ވަކިކޮށް، އިލްމާއި ދިރާސާ ކުރުން ދޫކޮށްލައި، ހަމައެކަނި މާއްދީ ދުނިޔެ އަށް ހެއްލުމުން ކަމަށް ޚުތުބާގައި ބުނެފައިވެ އެވެ.
އެހެންކަމުން މި ހާލަތުން އަރައިގަތުމަށް ކީރިތި ގުރްއާނާއި، ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ ސުންނަތަށް އެނބުރި ރުޖޫއަވެ، އިލްމު ހޯދުމަށް ގަދައަޅައި މަސައްކަތް ކުރުމަށް ޚުތުބާގައި ވަނީ ގޮވާލާފަ އެވެ.
މީގެ އިތުރުން ޚުތުބާގައި ބުނީ ބަވަނަވަމުން އަންނަ ދުނިޔޭގައި މުސްލިމުންނާއި ޣައިރު ދީންތަކުގެ ދީނީ އާދަކާދަތަކާއި، ސަގާފަތްތައް މަސްހުނިވަމުން އަންނަ އިރު، އެބައިމީހުންގެ އީދުތަކާއި، މުނާސަބާތަކުގައި، މުސްލިމުން ބައިވެރިވެ އުޅުމަކީ، ދުރުހެލިވާން ޖެހޭ ކަމަށެވެ.
މުސްލިމުން ފާހަގަކުރާ އީދުތަކުގައި އެބައިމީހުންގެ ސަގާފަތްތަކާ ވައްތަރުވާ ގޮތަށް ކަންކަން ކުރުމަކީ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ މަނާކުރައްވައިފައިވާ ކަމެއްކަން ފާހަގަކޮށް މި ފަދަ ކަންކަމުން ދުރުހެލިވެ ހަގީގީ މުސްލިމުންގެ ގޮތުގައި ސާބިތުވެ ތިބުމަށް ޚުތުބާގައި ވަނީ ނަސޭހަތްތެރިވެފަ އެވެ.
