ފްލެޓްތަކުގެ މައްސަލަ ހައްލުކުރުމަށް ފަހަތަކަށް ނުޖެހޭނަން: މާލެ ސިޓީ ކައުންސިލް
17 ސެޕްޓެމްބަރު 2017 | އާދީއްތަ 08:49މާލެއިން ފްލެޓަށް އެދި ހުށެހެޅި ހުރިހާ ރައްޔިތުންނާ ބައްދަލުކުރާނަން
މާލެ ސިޓީ ކައުންސިލްގެ މެމްބަރުންނާއި މާލޭ ސިޓީއަށް ނިސްބަތްވާ މަޖިލިސް މެމްބަރުން ހައުސިންގ މިނިސްޓްރީއަށް ވަޑައިގެން
ހައުސިންގ މިނިސްޓަރު ޑރ. މުހައްމަދު މުއިއްޒު އާ ބައްދަލު ކުރެއްވުމަށް އެ މިނިސްޓްރީއަށް ދިއުމުން، ބައްދަލު ނުކުރެއްވިޔަސް، ފްލެޓްތަކުގެ މައްސަލަތައް ހައްލު ކުރުމަށް ފަހަތަށް ނުޖެހޭނެ ކަމަށް މާލޭ ސިޓީއަށް ނިސްބަތްވާ ރައްޔިތުންގެ މަޖިލީހުގެ މެމްބަރުންނާއި މާލެ ސިޓީ ކައުންސިލް މެމްބަރުން ބުނެފިއެވެ.
އާދިއްތަ ދުވަހުގެ މެންދުރު ހައުންސިންގ މިނިސްޓަރު މުއިއްޒުއާ ބައްދަލު ކުރުމަށް މާލޭ ސިޓީއަށް ނިސްބަތްވާ ރައްޔިތުންގެ މަޖިލީހުގެ މެމްބަރުންނާއި މާލެސިޓީ ކައުންސިލްގެ މެމްބަރުން ވަޑައިގެން ގަޑިއެއްހާއިރު އެމިނިސްޓްރީ ތެރޭގައި ވަނީ ހޭދާކޮށްފައެވެ. ނަމަވެސް، އެ ބޭފުޅުންނަށް އެއްވެސް ޖަވާބެއް މިނިސްޓްރީން ދީފައި ނުވުމުންނާއި މިނިސްޓަރުގެ އިތުރުުން އެ މިނިސްޓްރީގެ އިސް އެއްވެސް ވެރިޔަކާ ބައްދަލު ކުރެވޭ ގޮތް ނުވުމުން އެ ބޭފުޅުން ވަނީ އެ މިނިސްޓްރީން އަނބުރާ ވަޑައިގަންނަވާފަ އެވެ.
"މނިސްޓަރާ ބައްދަލު ކުރެވޭތޯ މަސައްކަތް ކުރާނަން. އަދި ފްލެޓަށް އެދި ހުށަހަޅާފައިވާ 15000 ބޭފުޅުންނާ ބައްދަލު ވުންތަކެއް ބާއްވާނަން ކުރިއަށް އޮތް ތާނގައި، އަޅުގަނޑުމެން މިތިބީ މިކަން ދޫކުރާ ގޮތަކަށް ނޫން،" މާލޭ މޭޔަރު ޝިފާ މުހައްމަދު ވިދާޅުވި އެވެ.
މާލެ ސިޓީ ކައުންސިލްގެ މެމްބަރުންނާއި މާލޭ ސިޓީއަށް ނިސްބަތްވާ މަޖިލިސް މެމްބަރުން ހައުސިންގ މިނިސްޓްރީ އެތެރޭގައި
ޝިފާ ވިދާޅުވީ ފްލެޓްތައް އިމާރާތް ކޮށްފައި ވަނީ ރައްޔިތުންގެ ނަމުގައި ނަގާފައިވާ ލޯނުތަކުން ކަމަށާއި އެހެންކަމުން ރައްޔިތުންނަށް ކަންކަން ވަމުންދާ ގޮތް ސަރުކާރުން އޮޅުން ފިލުވާ ދޭން ޖެހޭ ކަމަށެވެ. އަދި ފްލެޓްތައް ދޫކުރުމުގައި އިންސާފުވެރިކޮށް ދޫކުރުމަކީ ހުރިހާ ރައްޔިތުންގެ ވެސް އެދުން ކަމަށް ޝިފާ ވިދާޅުވި އެވެ.
"އަޅުގަނޑުމެންނަށް މައުލޫމާތު ލިބިފައި ވަނީ މުލިއާގެ ގޭގައި ސީދާ މިނިސްޓަރު ސައީދު އިސްކޮށް ހުންނަވައިގެން އަދި މެޑަމް ފާތުން އަރިސް ބޭފުޅުންތަކެއް އަރިހުގައި ތިއްބަވައިގެން، ލިސްޓެއް ނަގާފައި ހައުސިންގ މިނިސްޓްރީއަށް އެންގީ އެ ލިސްޓްގައިވާ މީހުންނަށް ފްލެޓް ދޫކުރުމަށް،" ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ވިދާޅުވި އެވެ.
ފްލެޓްތަކުގެ މައްސަލާގައި ސާފުނުވާ ބައެއް މައުލޫމާތު ސާފު ކުރުމަށާއި ޝަކުވާ ހުށަހެޅުމަށް ގިނަ އަދަދެއްގެ ބަޔަކު ދަނީ ހައުސިންގް މިނިސްޓްރީއަށް ހާޒިރުވަމުންނެވެ. ފްލެޓް ލިބޭ ކަމަށް މިނިސްޓްރީ އާއްމުކޮށްފައިވާ ލިސްޓާ މެދު ރައްޔިތުންގެ ކަންބޮޑުވުން އިންތިހާއަށް އެބަ އޮތްކަން ގިނަ ރައްޔިތުން ދަނީ ބުނަމުންނެވެ. ނަމަވެސް މި ކަންބޮޑުވުންތަކަށް ހައުސިން މިނިސްޓްރީން މިހާތަނަށް އެކަށީގެންވާ ޖަވާބެއް ނުދެއެވެ. އަދި ފްލެޓް ދޫކުރި ގޮތުގެ ތަފްސީލެއް ވެސް ހާމަކޮށްފައެއް ނުވެއެވެ. ހަމައެކަނި ހާމަކޮށްފައި ވަނީ ފްލެޓް ލިބުނު ފަރާތްތަކުގެ ފޯމް ނަންބަރެވެ. ޕޮއިންޓް ލިބިފައިވާ ގޮތުގެ ތަފްސީލް ހާމަކުރުމަށް ވެސް ވަނީ ދެކޮޅު ހަދާފައެވެ.
