ރާއްޖޭގެ ދަރަނީގެ ހާލަތު ގޯސްވަމުންދާއިރު، އިސްލާހީ ބަދަލުތައް އަވަހަށް ގެންނަން ޖެހޭ: އޭޑީބީ

ދިވެހިރާއްޖޭގެ ދައުލަތުގެ ދަރަނީގެ މައްސަލަ އިންތިހާ އަށް ބޮޑުވަމުންދިއުމާއި އަދި އާމްދަނީ އަށް ވުރެ ޚަރަދުތައް މައްޗަށްދާ މައްސަލަ ސްޓްރަކްޗަރަލް ބޮޑެތި ބަދަލުތަކެއް ނުގެނެސް ހައްލު ނުވާނެ ކަމަށް އޭޝިއަން ޑިވެލޮޕްމަންޓް ބޭންކު (އޭޑީބީ) ގެ ތަޖުރިބާކާރަކު ވިދާޅުވެއްޖެ އެވެ.

ސަރުކާރުގެ ހިންގުން ހަރުދަނާކޮށް، ޖަވާބުދާރީވުމާއި، މަސައްކަތުގެ ރަނގަޅު ނަތީޖާ ނެރުމުގެ އިތުރުން ދިގުމުއްދަތުގެ މާލީ ހަމަޖެހުން ގާއިމުކުރުމަށްޓަކައި، މިހާރަށްވުރެ ވަރުގަދަ ފާރަވެރިވުމުގެ ނިޒާމެއް ބޭނުންވާ ކަމަށް ވެސް އޭޑީބީގެ ޕަބްލިކް ސެކްޓަރ ސްޕެޝަލިސްޓް އޮލީވިއާ ޗުންޔާންގ ޒޫ ވިދާޅުވި އެވެ.

އޭޑީބީގެ ބްލޮގް ގައި ޝާއިއު ކޮށްފައިވާ ލިޔުމުގައި ބުނެފައިވަނީ އިގްތިސާދަށް ކުރިމަތިވި އެކި ގޮންޖެހުންތަކާއި، ކަނޑުގެ ލޮނުގަނޑު އުފުލުމާއި މޫސުމީ ބަދަލުތަކުގެ ސަބަބުން ކުރިމަތިވާ ނުރައްކާތަކާ ގުޅިގެން، ރާއްޖޭގެ މާލީ އަދި ހިންގުމުގެ ދާއިރާއަށް ވަނީ ބޮޑެތި ފިއްތުންތަކެއް ކުރިމަތިވެފައި ކަމަށެވެ.

އޭނާ ފާހަގަ ކުރެއްވި ގޮތުގައި ގަވާއިދުތަކަށް އަމަލުކުރާ މިންވަރު ބަލަހައްޓާ ނިޒާމުތައް ބަލިކަށިވުމުގެ ސަބަބުން ދައުލަތަށް ލިބެންޖެހޭ އާމްދަނީ އެއްކުރުމަށް ހުރަސްތަކެއް ކުރިމަތިވެ، މާލީ ހާލަތަށް ވަނީ އިތުރު ތަކުލީފުތަކެއް ކުރިމަތިވެފަ އެވެ.

އޮނިގަނޑުގެ ބަލިކަށިކަމުގެ ސަބަބުން ދިގުމުއްދަތުގެ މާލީ ހަމަޖެހުން ގާއިމުކުރުމަށް ވަނީ ދަތިތަކާ ކުރިމަތިވެފައި ކަމަށާއި، މިއާ ގުޅިގެން، އޭޝިއަން ޑިވެލޮޕްމަންޓް ބޭންކް ގެ އެހީތެރިކަމާއެކު، ސަރުކާރުން ވަނީ މާލީ ދާއިރާގެ ފާރަވެރިވުމާއި، ދަރަންޏާއި ހަރަދުތައް ކޮންޓްރޯލްކުރުމުގެ އިތުރުން، ސަރުކާރުގެ ހިންގުމުގައި ހުރި ގޮންޖެހުންތައް ދެނެގަތުމަށް އޮޑިޓް ނިޒާމުތައް އިސްލާހުކުރުމުގެ މަސައްކަތް ފަށާފައި ކަމަށް އޭޑީބީގެ ތަޖުރިބާކާރު ވިދާޅުވި އެވެ.

މި އިސްލާހީ ބަދަލުތަކުގެ މައިގަނޑު މަގުސަދަކީ މާލީ ކަންކަން މެނޭޖް ކުރުން ޒަމާނީކުރުމާއި، ގަވާއިދުތަކަށް އަމަލުކުރުން ހަރުދަނާކުރުމުގެ އިތުރުން، އޮޑިޓްކުރުމުގެ ނިޒާމު "ރިސްކް-ބޭސްޑް" އުސޫލަކަށް ބަދަލުކުރުން ކަމަށް އޭނާ ވިދާޅުވި އެވެ.

ޖަވާބުދާރީވުމުގެ ވަރުގަދަ ނިޒާމަކާއި ގުޅިލާމެހިފައިވާ މަސައްކަތުގެ އުސޫލުތަކެއް ނެތި، އިސްލާހީ މަސައްކަތްތައް ކާމިޔާބެއް ނުވާނެ ކަމަށް ވެސް އޭނާ ފާހަގަ ކުރެއްވި އެވެ.

އޭޑީބީ ގެ ދިރާސާތަކުން ދައްކާގޮތުގައި، މަޝްރޫއުތައް ބެލެހެއްޓުމާއި އިންވޮއިސްތައް ޕްރޮސެސްކުރުން ފަދަ ކަންކަން އަތުން ކުރަންޖެހުމުގެ ސަބަބުން މަސައްކަތްތައް ތަންފީޒުކުރުމުގައި ބޮޑެތި ލަސްތަކެއް ވަނީ ކުރިމަތިވެފަ އެވެ.

ރާއްޖޭ ގައި ޓެކްސްގެ ގަވާއިދުތަކަށް އަމަލުކުރާ މިންވަރު ބަލާ ނިޒާމުތައް ބިނާވެފައިވަނީ ބޭނުންކުރަން ދަތި މުސްކުޅި އުސޫލުތަކެއްގެ މައްޗަށް ކަމަށާއި، މީގެ ސަބަބުން ނެރެވޭ ނަތީޖާތަކަށް އިތުބާރު ނުކުރެވުމުގެ އިތުރުން، ކުރިމަތިވެދާނެ ގޮންޖެހުންތައް ދެނެގަނެ އެކަންކަން މެނޭޖްކުރުމަށް ސަރުކާރަށް ވަނީ ހުރަސްތަކެއް ކުރިމަތިވެފައި ކަމަށް އޭޑީބީގެ ސްޕެޝަލިސްޓް ވިދާޅުވި އެވެ.

މިފަދަ މައްސަލަތައް ހައްލުކުރުމަށްޓަކައި ޓެކްނޮލޮޖީއާއި ރިސްކް-ބޭސްޑް އުސޫލުތައް ބޭނުންކުރުމަކީ ކޮންމެހެން ބޭނުންތެރި ކަމެއް ކަމަށާއި، އެ ވިސްނުމުގެ ދަށުން، ޑިޖިޓަލް ވަސީލަތްތަކާއެކު މުއައްސަސާތަކުގެ ގާބިލުކަން އިތުރުކޮށް، ސަރުކާރުގެ ތެރޭގައި ކަންކަން ތަރުތީބުކުރުމަށް އިސްކަންދީގެން އިސްލާހީ ބަދަލުތައް ގެންނަން ޖެހޭ ކަމަށް ވެސް އޭނާ ވިދާޅުވި އެވެ.