ހަތަރު ޓީމާ އެކު، ޑައިމަންޑް ޖުބިލީ މުބާރާތް ހޮނިހިރު ދުވަހު ފަށަނީ

ދިވެހި ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވާ ޑައިމަންޑް ޖުބިލީ އިންވިޓޭޝަނަލް މުބާރާތް އަންނަ ހޮނިހިރު ދުވަހު ފަށަން ނިންމައިފި އެވެ.

ޑައިމަންޑް ޖުބިލީ 19 އަހަރުން ދަށުގެ އިންވިޓޭޝަނަލް މުބާރާތުގައި ބައިވެރިވުމުގެ ދައުވަތު އެފްއޭއެމް އިން ދީފައި ވަނީ ހަތަރު ސްކޫލް އަކަށެވެ. އެއީ އަހުމަދިއްޔާ އިންޓަނޭޝަނަލް ސްކޫލް އާއި، ސެންޓަ ފޯ ހަޔަރ ސެކަންޑްރީ އެޑިއުކޭޝަން (ސީއެޗްއެސްއީ ހުޅުމާލެ) އާއި، ސެންޓަ ފޯ ހަޔަރ ސެކަންޑްރީ އެޑިއުކޭޝަން (މާލެ) އަދި ވިލާ އިންޓަނޭޝަނަލް ހައި ސްކޫލް އެވެ. 

ހޮނިހިރު ދުވަހުގެ ހަވީރު އޮންނަ ފުރަތަމަ މެޗުގައި ބައްދަލު ކުރާނީ އަހުމަދިއްޔާ އާއި ސީއެޗްއެސްއީ ހުޅުމާލެ އެވެ. ދެ ވަނަ މެޗުގައި ހޮނިހިރު ދުވަހުގެ ރޭ ބައްދަލު ކުރާނީ ވިލާ އާއި، ސީއެޗްއެސްއީ މާލެ އެވެ. ކޮންމެ ޓީމެއް ކޮންމެ ޓީމަކާ ބައްދަލު ކުރުމަށް ފަހު، އެއް ވަނަ ޓީމާއި، ދެ ވަނަ ޓީމަށް މުބާރާތުގެ ފައިނަލްގެ ޖާގަ ލިބޭނެ އެވެ. ފައިނަލް މެޗު ކުޅުމަށް ހަމަޖެހިފައި ވަނީ ފެބްރުވަރީ 15 ވާ އާދީއްތަ ދުވަހުގެ ހަވީރު އެވެ. 

ރާއްޖޭގެ ފުޓުބޯޅަ އަށް 75 އަހަރު ފުރޭ މުނާސަބަތާ ގުޅިގެން، ޒުވާން އުމުރުފުރައިގެ އިންވިޓޭޝަނަލް މުބާރާތެއްގެ އިތުރުން، ސީނިއަރ މުބާރާތެއް ބޭއްވުމަށް ވެސް އެފްއޭއެމް އިން ވަނީ ނިންމައިފަ އެވެ. ސީނިއަރ މުބާރާތް އޮންނާނީ މިއަހަރުގެ ޖޫން މަހުގެ އެއް ވަނަ ދުވަހުން ފެށިގެން، 10 ވަނަ ދުވަހުގެ ނިޔަލަށެވެ. އެ މުބާރާތުގައި ބައިވެރިވުމުގެ ދައުވަތު ދިނުމަށް އެފްއޭއެމް އިން ނިންމާފައި ވަނީ ސްރީ ލަންކާގެ އިތުރުން، ބަންގްލަދޭޝް އާއި ނޭޕާލް އަށެވެ.

އެފްއޭއެމް އިން ނިންމާފައި ވަނީ ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން ކުލަ ގަދަ ގިނަ ޙަރަކާތް ތަކެއް ކުރިއަށް ގެންދިޔުމަށެވެ. އެގޮތުން ޑައިމަންޑް ޖުބިލީގެ ނަމުގައި ކޮމެޓިއެއް އެކުލަވާލައި، އެ ކޮމެޓީ އިން އަންނަނީ ގިނަ މަސައްކަތް ތަކެއް ކުރަމުންނެވެ.