އެމްޑީޕީގެ ވެރިކަމުގައި އެވޯޑްކޮށް ފަށާފައި އޮތް ޓައުންޝިޕް ޕްރޮޖެކްޓް މުޅިން އައު ޕްރޮޖެކްޓެއްގެ ގޮތުގައި ދައްކާ މުއިއްޒު ސަރުކާރުން ބިންގާ އަޅައިފި
790 މިލިޔަން ޑޮލަރުގެ މި މަޝްރޫއު ނ. އަތޮޅުގައި ހިންގާނީ ކްރިސްޓަލް ހޯލްޑިންގްސް ކުންފުނިން. އެމްޑީޕީން ބުނާގޮތުން މިއީ އެ ޕާޓީގެ ވެރިކަމުގައި އެވޯޑްކޮށްފައިވާ ޕްރޮޖެކްޓެއް. މި ޓައުންޝިޕްގައި ޞިއްޙީ ޚިދުމަތް، ޓޫރިޒަމް ސްކޫލް، އެކުއަކަލްޗަރ ޒޯން، ހޮޓަލާއި ރެޒިޑެންސް ތަރައްގީކުރާނެ.
އައިލާ ސަސްޓެއިނަބަލް ޓައުންޝިޕް"ގެ ބިންގާ އެޅުން. | ރައީސް އޮފީސް
އެމްޑީޕީގެ ވެރިކަމުގައި އެވޯޑްކޮށް ފަށާފައި އޮތް ޓައުންޝިޕް ޕްރޮޖެކްޓް ރައީސް މުޢިއްޒުގެ ސަރުކާރުން މުޅިން އައު ޕްރޮޖެކްޓެއްގެ ގޮތުގައި އިއުލާން ކޮށް ބިންގާ އަޅައިފި އެވެ.
"އައިލާ ސަސްޓެއިނަބަލް ޓައުންޝިޕް" ގެ ނަމުގައި ފެށި މި މަޝްރޫއުގެ ބިންގެ ބިންގާ އަޅުއްވާދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެވެ. ޖުމްލަ 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާގެ މި ބިޔަ މަޝްރޫޢު ކުރިއަށް ކުރިއަށްގެންދިއުމަށް ހަމަޖެހިފައިވަނީ ނ. އަތޮޅުގެ ދިގުފަރު ފަޅާއި، ދެކުނުފަރު އަދި ކުރަމާދޫ ހިމެނޭ ސަރަހައްދުގަ އެވެ. މި ޕްރޮޖެކްޓް ހަވާލުކޮށްފައި ވަނީ ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ އެވެ.
މި މަޝްރޫއުއާއި ގުޅޭގޮތުން މީގެ ކުރިން އެމްޑީޕީގެ ލީގަލް ޑިރެކްޓަރ އަހުމަދު މައުރޫފް ވިދާޅުވެފައިވަނީ ޓައުންޝިޕް ޕްރޮޖެކްޓަކީ ރައީސް މުޢިއްޒުގެ ސަރުކާރުން އަލަށް ފަށައިގެން އުޅޭ ޕްރޮޖެކްޓެއް ނޫން ކަމަށާއި މި ޕްރޮޖެކްޓަކީ އެމްޑީޕީގެ ވެރިކަމުގައި އެވޯޑްކޮށް ފަށާފައި އޮތް ޕްރޮޖެކްޓެއް ކަމަށެވެ. އަދި މި ޕްރޮޖެކްޓް އަކީ ކުރިން ވެސް އިންވެސްޓް ކޮށްފައިވާ ޕްރޮޖެކްޓެއްކަން މައުރޫފް ފާހަގަ ކުރެއްވި އެވެ.
އަދި އެ ޕްރޮޖެކްޓަކީ 2022 ވަނަ އަހަރު ހުރިހާ ޓްރާންސެކްޝަނެއް ވެސް ނިމިފައިވާ ޕްރޮޖެކްޓެއް ކަމަށާއި އަދި މި ސަރުކާރުން އެސްއީޒެޑް ގެ ދަށުން އެ މަސައްކަތް ކުރާ ކުންފުންޏަށް އިންކަމް ޓެކްސް އިން ލުއި ދީފައިވާ ކަމަށެވެ. މައުރޫފް ފާހަގަ ކުރެއްވި ގޮތުގައި މިކަމަކީ އަޑި ނޭނގޭ ކަމެކެވެ.
މި ޕްރޮޖެކްޓާ ގުޅޭގޮތުން ވާހަކަދައްކަވަމުން ކްރިސްޓަލް ހޯލްޑިންގްސް ޕްރައިވެޓް ލިމިޓެޑުގެ ޗީފް އެގްޒެކެޓިވް އޮފިސަރ ޕީޓަރ ވިދާޅުވިގޮތުގައި މި ޕްރޮޖެކްޓް 2028 ވަނަ އަހަރުގެ މެދުތެރޭގައި ނިންމާލެވޭނެ އެވެ.
މި ޓައުންޝިޕްގައި ދުނިޔޭގެ ފެންވަރުގެ ޞިއްޙީ ޚިދުމަތްދޭ މަރުކަޒަކާއި، ބައިނަލްއަޤްވާމީ ފެންވަރުގެ ޓޫރިޒަމް ސްކޫލެއް ޤާއިމުކުރާއިރު، ރާއްޖެ އަށް އެތެރެކުރާ ކާބޯތަކެތީގެ ބާވަތްތައް ދެމެހެއްޓެނިވި ގޮތެއްގައި އުފެއްދުމަށްޓަކައި ޒަމާނީ ޓެކްނޮލޮޖީއާއެކު އެކުއަކަލްޗަރ އަދި މެރިކަލްޗަރ ޒޯނެއް ވެސް ތަރައްޤީކުރާނެ އެވެ.
މީގެ އިތުރުން މި ޓައުންޝިޕްގައި މަތީ ފަންތީގެ ހޮސްޕިޓަލިޓީ އަދި ރެޒިޑެންޝަލް ބައިތަކާއި އިގްތިސޯދީ އަދި އިޖުތިމާއީ ދާއިރާއާ ގުޅުންހުރި ވަސީލަތްތައް ލިބެން ހުންނާނެއެވެ.
