އުރީދޫ ދިވެހި ޕްރިމިއާ ލީގު: ފަހަތުން އަރާ މާޅޮސްގެ މައްޗަށް ޓީސީ ކުރިހޯދައިފި

އުރީދޫ ދިވެހި ޕްރިމިއާ ލީގުގައި ފަހަތުން އަރާ މާޅޮސްގެ މައްޗަށް ޓީސީ ސްޕޯޓްސް ކްލަބް ކުރިހޯދައިފި އެވެ.

ހޯމަ ދުވަހު ހަވީރު ކުޅުނު މެޗުން ޓީސީ މޮޅުވީ މާޅޮސްއާ ވާދަކޮށް 2-3 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ހަތްވަނަ މިނެޓުގައި މާޅޮސް އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެންހަލް ކަރަސްކޯ މުނޯޒް އެވެ.

އެހެންނަމަވެސް 21 ވަނަ މިނެޓުގައި ޓީސީގެ ބިދޭސީ ކުޅުންތެރިޔާ ސްޓެވާޓް ވަނީ އެޓީމަށް ނަތީޖާ ހަމަހަމަކޮށްދީފައެވެ. ފުރަތަމަ ހާފް ނިމުމުގެ ކުރިން ޓީސީ އަށް ލީޑު ނަގައިދިނީ އިބްރާހިމް މަހުދީ ހުސެއިން (ކުދު އިއްބެ) އެވެ.

ފުރަތަމަ ހާފް ނިމުނީ 1-2 ގެ ނަތީޖާއަކުން މާޅޮސްގެ މައްޗަށް ޓީސީ ކުރިހޯދައިގެންނެވެ.

ދެވަނަ ހާފް ފެށިގެން ޓީސީ އަށް ލީޑު ފުޅާކޮށްދިނީ އަލީ ނާފިއު އެވެ. މި ލަނޑަށްފަހުވެސް އެޓީމަށް ވަނީ ލަނޑު ޖެހުމަށް ގިނަ ފުރުސަތުތައް ލިބި ބޭކާރުވެފައެވެ.

މެޗު ނިމުމުގެ ކުރިން މާޅޮސްއަށް ނަތީޖާގެ ފަރަގު ކުޑަކޮށްދިނީ މެޗުގެ ފުރަތަމަ ލަނޑުވެސް ކާމިޔާބުކޮށްދިން އެންހަލް ކަރަސްކޯ މުނޯޒް އެވެ.

މި މޮޅާއެކު ޓީސީ އޮތީ ކުޅުނު ފަސްމެޗުން ލިބުނު 10 ޕޮއިންޓާއެކު ލަނޑުގެ ތަފާތުން ތާވަލުގެ ތިންވަނައިގައެވެ. އަދި މާޅޮސް އޮތީ ކުޅުނު ފަސް މެޗުން ލިބުނު 2 ޕޮއިންޓާއެކު ތާވަލުގެ ހަތްވަނައިގައެވެ.