ގިނީ ގައި ބަޣާވާތަކުން ވެރިކަން ހޯދި ލީޑަރު ރިޔާސީ އިންތިޚާބު ކާމިޔާބު ކުރައްވައިފި

ގިނީ ގައި ބަޣާވާތަކުން ވެރިކަމަށް ވަޑައިގަތް މަމަޑީ ޑުމްބޫޔާ ރިޔާސީ އިންތިޚާބު ކާމިޔާބު ކުރައްވައިފި އެވެ.

ގިނީގެ ވަގުތީ ނަތީޖާތަކުން ދައްކާގޮތުގައި، މީގެ ގާތްގަނޑަކަށް ފަސް އަހަރު ކުރިން އަސްކަރީ ބަޣާވާތަކުން ވެރިކަމަށް ވަޑައިގަތް މަމަދީ ދުމްބޫޔާ ވަނީ ރިޔާސީ އިންތިޚާބު ކާމިޔާބު ކުރައްވާފައެވެ. މިއީ އެ ގައުމުގައި އަލުން މަދަނީ ވެރިކަމެއް ގާއިމުކުރުމަށް އެޅުނު މުހިންމު ފިޔަވަޅެއް ކަމަށް ރިޕޯޓުތައް ބުނެ އެވެ.

އަންގާރަ ދުވަހު އިއުލާނުކުރި ވަގުތީ ނަތީޖާތަކުން ދައްކާގޮތުގައި، މިދިޔަ ޑިސެމްބަރު މަހުގެ 28 ވަނަ ދުވަހު ބޭއްވި އިންތިޚާބުގައި ޑުމްބޫޔާ ވަނީ ވޯޓުގެ 86.72 އިންސައްތަ ކާމިޔާބު ކުރައްވާފައެވެ. މިއީ ބޮޑު އަޣުލަބިއްޔަތެއް ކަމުން، އިންތިޚާބުގެ ދެވަނަ ބުރަކަށް ދާން ނުޖެހި އޭނާއަށް ވަނީ ކާމިޔާބީ ކަށަވަރުވެފައެވެ. އިންތިޚާބުގެ ނަތީޖާއާ މެދު އެއްވެސް ޝަކުވާއެއް ހުށަހަޅާ ނަމަ، އެ ނަތީޖާގެ ސައްހަކަން ކަށަވަރު ކުރުމަށް ސުޕްރީމް ކޯޓަށް 8 ދުވަހުގެ މުއްދަތެއް ލިބޭނެއެވެ.

އުމުރުން 41 އަހަރުގެ ޑުމްބޫޔާއާ ދެކޮޅަށް އަށް ކެންޑިޑޭޓުން ވާދަކުރިއެވެ. ނަމަވެސް، އިދިކޮޅު މައި ލީޑަރުންނަށް އިންތިޚާބުގައި ވާދަނުކުރެވޭ ގޮތް ހަދާފައިވުމުން، އެ ފަރާތްތަކުން ވަނީ އިންތިޚާބު ބޮއިކޮޓް ކުރުމަށް ގޮވާލާފައެވެ. ކުރީގެ ސްޕެޝަލް ފޯސަސްގެ ކޮމާންޑަރު ޑުމްބޫޔާ ވެރިކަމަށް އައީ 2021 ވަނަ އަހަރު، 2010 އިން ފެށިގެން ވެރިކަމުގައި ހުންނެވި އަލްފާ ކޮންޑޭގެ ވެރިކަން ވައްޓާލުމަށްފަހުއެވެ. މިއީ 2020 ވަނަ އަހަރުން ފެށިގެން ހުޅަނގު އަދި މެދުތެރޭ އެފްރިކާގެ ސިޔާސީ މަސްރަހަށް ބޮޑެތި ބަދަލުތަކެއް ގެނުވި އަސްކަރީ ބަޣާވާތްތަކުގެ ތެރެއިން އެއް ބަޣާވާތެވެ. ކުރީގެ ރައީސް ކޮންޑޭ އާއި އިދިކޮޅު ލީޑަރު ސެލޫ ޑަލައިން ޑިއާލޯ މިހާރު ދިރިއުޅުއްވަނީ ގައުމުން ބޭރުގައި އަރުވާލެވިގެންނެވެ.

ބަޣާވަތުގެ ވެރިކަމާ ހަވާލުވެވަޑައިގަތް އިރު، އިންތިޚާބެއްގައި ވާދަ ނުކުރައްވާނެ ކަމަށް ޑުމްބޫޔާ ކުރިން ވައުދުވެވަޑައިގެންނެވިއެވެ. އަދި ބަޣާވާތަށްފަހު އެކުލަވާލި ޗާޓަރުގައި އަސްކަރީ މީހުންނަށް އިންތިޚާބުގައި ވާދަ ނުކުރެވޭނެ ކަމަށް އޮތް ނަމަވެސް، ސެޕްޓެމްބަރު މަހު ނެގި ފެންނަ ނުފެންނަ ވޯޓަކުން ފާސްކުރި އާ ގާނޫނުއަސާސީގެ ދަށުން އެ ހުރަސްތައް ވަނީ ނައްތާލާފައެވެ.

އިލެކްޝަން ކޮމިޝަންގެ ރައީސް ޖެނަބޫ ޓޫރޭ ވިދާޅުވި ގޮތުގައި، އިންތިޚާބުގައި ވޯޓުލީ މީހުންގެ ނިސްބަތަކީ %80.95 އެވެ. ނަމަވެސް، ވެރިރަށް ކޮނަކްރީ ގައި ވޯޓުލީ މީހުން މަދުކަން ފާހަގަކުރެވުނުއިރު، އިދިކޮޅު ފަރާތްތަކުން ވަނީ މި އަދަދުތަކާ މެދު ސުވާލު އުފައްދާފައެވެ.

ގިނީ އަކީ ދުނިޔޭގައި އެންމެ ބޮޑު ދަގަނޑުގެ ރިޒާވް އޮތް ގައުމެވެ. ޑުމްބޫޔާ ވިދާޅުވާ ގޮތުގައި، އޭނާގެ ވެރިކަމުގައި މި ވަސީލަތްތަކުން ގައުމަށް ލިބޭ ފައިދާ އިތުރުވެ، އޭނާގެ ލީޑަޝިޕްގެ ދަށުން ގައުމަށް ކުރިއެރުން ވަނީ ހޯދިފައެވެ. އޭނާގެ ސަރުކާރުން ވަނީ މައުދަން ނެގުމުގެ ސިނާއަތަށް ދައުލަތުގެ ބާރު ގަދަކޮށްފައެވެ. އެގޮތުން، އެމިރޭޓްސް ގްލޯބަލް އެލުމިނިއަމްގެ ސަބްސިޑިއަރީ އެއް ކަމަށްވާ ގިނީ އެލުމިނާ ކޯޕަރޭޝަންގެ ލައިސަންސް ބާތިލުކޮށް، އެ ކުންފުނީގެ މުދާތައް ދައުލަތުގެ ކުންފުންޏަކަށް ވަނީ ބަދަލުކޮށްފައެވެ. ގައުމީ ވަސީލަތްތަކުގެ މައްޗަށް ދައުލަތުގެ ބާރު ފޯރުވުމުގެ މިފަދަ ސިޔާސަތުތަކުގެ ސަބަބުން، މާލީ، ބުރުކީނާ ފާސޯ އަދި ނައިޖަރު ފަދަ އެފްރިކާގެ އެހެން ގައުމުތަކުގައި ވެސް އަސްކަރީ ސަރުކާރުތަކަށް އޮތް ތާއީދު ވަނީ އިތުރުވެފައެވެ.