މޯލްޑިވިއަން އިން އޮސްޓްރޭލިޔާ ގެ މެލްބަން އަށް ސީދާ ފްލައިޓް ތައް 6 މަސް ދުވަހަށް ބާއްވަނީ

މޯލްޑިވިއަން އިން އޮސްޓްރޭލިއާ އާއި ރާއްޖެއާ ދެމެދު ފުރަތަމަ ފަހަރަށް ސީދާ ފްލައިޓްތައް ފަށާ ކަން އިއުލާނު ކޮށްފި އެވެ.

މި ދަތުރުތައް ކުރާނީ، އޮސްޓްރޭލިއާގެ ޓްރެވަލް ކުންފުންޏެއް ކަމަށްވާ ލަގްޒަރީ އެސްކޭޕްސް އާ ގުޅިގެން ޗާޓަރ އިންތިޒާމެއްގެ ދަށުން ކަމަށާއި ދަތުރުތައް ކުރާނީ މެލްބަން އިން މާލެ އާ ދެމެދުގައި ކަމަށް ވެސް މައުލޫމާތު ލިބިފައިވެ އެވެ.

ހަފްތާއަކު އެއް ދަތުރު ކުރާ ގޮތައް ހަމަ ޖެހިފައިވާއިރު މި ޚިދުމަތް ފަށާނީ 2026 މެއި 18 އިން ފެށިގެން ކަމަށާއި، ދަތުރުތައް ފަށާނީ އޮސްޓްރޭލިއާ ސަރުކާރުގެ ކަމާ ބެހޭ ފަރާތްތަކުގެ ހުއްދަތައް ލިބުމުން ކަމަށް އެނގިފައިވެއެވެ. ދަތުރުތައް ކުރުމަށް ހަމަޖެހިފައިވަނީ 6 މަސް ދުވަހުގެ މުއްދަތަކަށެވެ. އަދި ޑިމާންޑަށް ބަލައި މުއްދަތު އިތުރު ކުރެވިދާނެ ކަމަށް އޮސްޓްރޭލިއާގެ ޓްރެވެލް ވެބްސައިޓެއް ކަމަށްވާ އެސްކޭޕް ޑޮޓް ކޮމް އިން ބުނެފައިވެއެވެ.

2024 ވަނަ އަހަރު އޮސްޓްރޭލިއާ އިން ރާއްޖެ އަށް 29،519 ފަތުރުވެރިން ޒިޔާރަތްކޮށްފައި ވާއިރު މި އަހަރުގެ އޮކްޓޯބަރުގެ ނިޔަލަށް 34،933 ފަތުރުވެރިން ޒިޔާރަތްކޮށްފައި ވެއެވެ. އޮސްޓްރޭލިއާ ފާހަގަ ވެފައިވަނީ ރާއްޖެ އަށް 10 ވަނަ އަށް އެންމެ ގިނަ ފަތުރުވެރިން ޒިޔާރާތް ކުރާ ގައުމުގެ ގޮތުގަ އެވެ.

އޮސްޓްރޭލިއާ އިން ރާއްޖެ އަށް ދަތުރުކުރާ ފަރާތްތަކުން މިހާރު އާންމު ގޮތެއްގައި ދަތުރު ކުރަނީ ސިންގަޕޫރު، ދޯހާ ނުވަތަ ޑުބާއީ ގައި ޓްރާންސިޓް ކޮށްފަ އެވެ. އެ ގޮތުން މުޅި ދަތުރުގެ ދިގުމިނުގައި ގާތްގަނޑަކަށް 20 ގަޑީއިރު ހޭދަވާ ކަމަށްވެ އެވެ. ސީދާ ދަތުރުތައް ފެށުމުން ހޭދަވާނީ 10 ގަޑިއިރާއި 11 ގަޑިއިރުގެ ވަގުތެކެވެ.

މި ދަތުރުތަކުގައި ބޭނުން ކުރާނީ މޯލްޑިވިއަން ގެ އޭ330-200 ގެ ބޯޓެވެ. ބޯޓުގައި ބިޒްނަސް ކްލާސް އާއި އިކޮނޮމީ ކްލާހުގެ ޚިދުމަތް ލިބެން ހުރެއެވެ.

މި ފްލައިޓުގައި އޮސްޓްރޭލިއާ އިން ދަތުރު ކުރެވޭނީ ހަމައެކަނި ލަގްޒަރީ އެސްކޭޕް އިން ބުކިންގ ހަދާ ފަތުރުވެރިންނަށް ކަމަށް ވެސް މައުލޫމާތު ލިބިފައިވެއެވެ.