ރާއްޖޭގެ ބަލި ކޮށް ކިރްގިސްތާނުން ވިމެންސް ކާވާ ކަޕް ޗެމްޕިއަންކަން ހޯދައިފި

ވިމެންސް ކާވާ ކަޕް 2025 ގެ ފައިނަލް މެޗުގައި ދިވެހިރާއްޖެ ބަލިކޮށް ކިރްގިސްތާނުން މުބާރާތުގެ ޗެމްޕިއަންކަން ހޯދައިފި އެވެ.

ކިރްގިސްތާނުން ފައިނަލް މެޗު ކާމިޔާބުކުރީ ފަހަތުން އަރައި 3 ސެޓު 1 ސެޓުން ރާއްޖޭގެ މައްޗަށް ކުރި ހޯދައިގެންނެވެ. 

ސޯޝަލް ސެންޓަރުގެ އެތޭރޭ ކޯޓުގައި ބުރާސްފަތި ދުވަހުގެ ރޭ ކުޅުނު ފައިނަލް މެޗުގެ ފުރަތަމަ ސެޓު، މޮޅު ކުޅުމެއް ދައްކާ ރާއްޖޭގެ ޓީމުން ކާމިޔާބުކުރީ 25-20 އިން ނެވެ. އެހެން ނަމަވެސް ރާއްޖޭގެ ޓީމަށް ހެދުނު ގޯސް ތަކުގެ ފައިދާ ނަގާ، ދެން ކުޅުނު ތިން ސެޓުވެސް  ކިރިގިސްތާނުން ކާމިޔާބު ކުރި އެވެ. ކިރްގިސްތާނުން ފަހުން ކުޅުނު ތިން ސެޓު ގެންދިޔައީ، 22-25، 17-25 އަދި 21-25 އިންނެވެ.

މި މުބާރާތުގައި ރާއްޖޭގެ ޓީމުން ލީގު ބުރުގައި ކިރްގިސްތާން ބަލި ކުރިއިރު، ފައިނަލް މެޗުގައި ކިރްގިސްތާނުން މި ވަނީ ރާއްޖޭގެ ކިބައިން ބަދަލުހިފައިފަ އެވެ.

ހަތަރު ގައުމު ވާދަކުރި ވިމެންސް ކާވާ ކަޕްގެ ފައިނަލާ ހަމައަށް އައިއިރު ރާއްޖެ އިން ކުޅުނު ހުރިހާ މެޗަކުން ވަނީ މޮޅުވެފަ އެވެ. 

މުބާރާތުގެ ޑްރީމް ޓީމުގައި ހިމެނެނީ، ރާއްޖޭގެ ހަތަރު ކުޅުންތެރިންނާއި ކިރްގިސްތާނުގެ ތިން ކުޅުންތެރިންނެވެ. އެ ގޮތުން، ރާއްޖޭން ހިމެެނެނީ، ކެޕްޓަން، ހައްވާ ރާޝިދާ ، ފާތިމަތު ޖޫޒާން ޒަރީރު، އައިމިނަތު ޝަހާ ޝާމިން އަދި ނަރީމާ އިދުރީސް އެވެ. އަދި، ކިރްގިސްތާނުން ހިމެނެނީ، މުބާރާތުގެ މޮޅު ކުޅުންތެރިޔާގެ މަގާމު ހޯދި ނޫރްޒަމަލް ބޮލޮޓްބެކޮވާ އިތުރުން ސައިކަލް އަމިރާކުލޯވާ އަދި އަސީމާ އަސީމާ ސެއިޓްބްލޯވާ އެވެ.

މި މުބާރާތުގެ ތިން ވަަނަ ހޮވި މެޗުގައި، އަފްގާނިސްތާން އަތުން ސީދާ ތިން ސެޓުން މޮޅުވެގެން، މުބާރާތުގެ ތިން ވަނަ ހޯދީ ބަންގްލަދޭޝް އެވެ.