ސަރުކާރު ހިއްސާ އޮންނަ ކުންފުނިތަކަށް ރިސޯޓު ހަދަން ދޭވޭ ގޮތަށް ގާނޫނަށް ބަދަލު ގެންނަން މަޖިލީހުން ފާސްކޮށްފި
ސަރުކާރުގެ 45 އިންސައްތަ ހިއްސާއޮންނަ ކުންފުނިތަކަށް ޓޫރިސްޓް ރިސޯޓު ތަރައްގީކުރުމަށް ރަށް ނުވަތަ ފަޅު ދޫކުރެވޭނެ
ރާއްޖޭގައި އޮޕަރޭޓް ކުރަމުންދާ ރިސޯޓެއް
ސަރުކާރު ހިއްސާވާ ކުންފުނިތަކަށް ޓޫރިސްޓް ރިސޯޓެއް ނުވަތަ އިންޓަގްރޭޓެޑް ޓޫރިސްޓް ރިސޯޓެއް ތަރައްގީ ކުރުމަށް ރަށް، ބިން ނުވަތަ ފަޅު ދޫކުރެވޭ ގޮތަށް ހުށަހެޅި އިސްލާހުގެ ބިލު ރައްޔިތުންގެ މަޖިލީހުން ފާސްކޮށްފި އެވެ.
ސަރުކާރުގެ ފަރާތުން، ހިތަދޫ އުތުރު ދާއިރާގެ މެންބަރު މުހައްމަދު ސިނާން ދިވެހިރާއްޖޭ ގެ ޓޫރިޒަމާ ބެހޭ ގާނޫނަށް ހުށަހެޅި އިސްލާހު ގެ ބިލު އިގްތިސާދީ ކޮމިޓީ އިން ދިރާސާ ކޮށް ނިންމި ގޮތަށް މަޖިލީހުން ފާސް ކުރީ 64 މެންބަރުންގެ އިއްތިފާގުންނެވެ.
ބިލު ސަރުކާރު ގެ ފަރާތުން ހުށަހަޅާފައި ވަނީ ދައުލަތުގެ ކުންފުންޏަކަށް ޓޫރިސްޓް ރިސޯޓް ހެދުމަށް ތަންތަން ކުއްޔަށް ދޫކުރުމާއި ޓޫރިޒަމް ޓްރޭނިންގ ރިސޯޓު ހެދުމަށް ތަންތަން ކުއްޔަށް ދޫކުރުމުގެ ނިޒާމެއް ތައާރަފު ކޮށް އެފަދަ ބޭނުން ތަކަށް ތަންތަން ކުއްޔަށް ދިނުމާއި އެ ތަންތަން ހިންގުމުގެ އުސޫލު ގާނޫނުގައި ބަޔާން ކުރުމަށް ކަމަށް ބިލު ހުށަހަޅުއްވަމުން މެންބަރު ސިނާން ވިދާޅުވި އެވެ.
މެންބަރު ވިދާޅުވީ ރިސޯޓު ހެދުމަށް ކުއްޔަށް ދޫކޮށްފައިވާ ތަންތަން ތަރައްގީ ކުރުމަށް ދެވޭ މުއްދަތު އިތުރުކޮށްދިނުމާ ބެހޭ އުސޫލާއި ފަތުރުވެރިކަމު ގެ ބޭނުމަށް ކުއްޔަށް ދޫކުރެވޭ ރަށްރަށުގެ ފަޅުގެ ސަރަހައްދު ކަނޑައެޅުމާ ބެހޭ އުސޫލު ގާނޫނުގައި ހިމެނުމަކީ ވެސް ބިލު ގެ ބޭނުމެއް ކަމަށެވެ.
ބިލުގައި ބުނީ ވަޒީރުން ގެ މަޖިލީހުން ފާސް ކޮށްގެން ޓޫރިސްޓު ރިސޯޓެއް ނުވަތަ އިންޓަގްރޭޓެޑް ޓޫރިޒަމް ރިސޯޓެއް ތަރައްގީ ކުރުމަށް ދައުލަތުގެ ކުންފުންޏަކަށް ރަށެއް ނުވަތަ ފަޅެއް ދޫކުރެވިދާނެ ކަމަށެވެ. މިފަދަ ތަނެއް ދޫކުރާ ކުންފުންޏަކީ ރިސޯޓެއް ތަރައްގީ ކުރުމުގެ މާލީ އަދި ފަންނީ ގާބިލުކަން ހުރި ކުންފުންޏެއް ކަން ޔަގީން ކުރަން ވާނެ ކަމަށް ވެސް ބިލުގައި ވެއެވެ.
ދައުލަތުގެ ކުންފުންޏަށް ރަށެއް ނުވަތަ ފަޅެއް ދޫކުރެވޭނީ، މި އިސްލާހުގައިވާ ގޮތުގެ މަތިން ސަރުކާރާ އެކު ވެވޭ އެއްބަސްވުމެއްގެ ދަށުންނެވެ. އަދި އެ ތަނަކަށް ދައްކަން ޖެހޭ އިކުއިޒިޝަން ފީ ސަރުކާރަށް ދައްކަން ޖެހޭނީ އެ ތަނަކާ ހަވާލުވާ ކުންފުނިން ކަމަށް ވެސް ބިލުގައި ބަޔާން ކޮށްފައި ވެއެވެ.
އޭގެ އިތުރުން ކޯޕަރޭޓް ސޯޝަލް ރެސްޕޮންސިބިލިޓީ ގެ ގޮތުގައި ޓޫރިޒަމް ޓްރަސްޓު ފަންޑަށް ޖަމާކުރުމަށް ނުވަތަ މިނިސްޓްރީން ކަނޑައަޅާ ތަރައްގީގެ މަޝްރޫއު އަކަށް ޚަރަދު ކުރުމަށް ވެސް މިނިސްޓްރީއަށް ޝަރުތު ކުރެވިދާނެ އެވެ.
ރިސޯޓު ތަރައްގީ ކުރުމަށް ރަށްރަށާއި ފަޅުތަކާއި ބިން ހަވާލުކުރެވޭނީ މަދުވެގެން ސަރުކާރުގެ 45 އިންސައްތަ ހިއްސާ އޮންނަ ކުންފުނިތަކަށް އެކަންޏެވެ.
ބިލު ދިރާސާ ކުރުމަށްފަހު އިގްތިސާދީ ކޮމިޓީ އިން ބިލަށް ގެނައި އިސްލާހުގައި ވަނީ ކުންފުންޏަކާއެކު ހަދާ އެއްބަސް ވުމުގެ މުއްދަތުގެ ތެރޭގައި ކުންފުނީގެ ސަރުކާރުގެ ހިއްސާ 45 އިންސައްތަ އަށް ދަށްވެގެންދާ ގޮތަށް ބަދަލު ނުކުރެވޭނެ ކަމަށެވެ.
