ރާއްޖޭގެ ޓޫރިޒަމް ދާއިރާގައި މަޝްހޫރު އެންޓަޕްރެނަރެއްގެ ގޮތުގައި ފާހަގަވެފައިވާ ޑރ. ސަނީ އުމަރު އަށް، ކުޑަކުއްޖަކަށް ޖިންސީ ގޯނާކުރުމުގެ ތުހުމަތުތަކެއް ކުރެވިފައި ވަނިކޮށް ރާއްޖެ އިން ބޭރަށް ފުރައިފި އެވެ.

ސަނީ އުމަރު އަށް ކުރެވެނީ އޭނާގެ އަންހެނުންގެ އާއިލާ އަށް ނިސްބަތްވާ ކުއްޖަކަށް ޖިންސީ ގޯނާ ކުރި ކަމުގެ ތުހުމަތެވެ. އަދި މިކަމަށް އޭނާގެ އާއިލާގެ މެދުގައި އިއުތިރާފު ވެފައިވާ ކަމަށް، ރާއްޖެ އެމްވީ އަށް މައުލޫމާތު ލިބިފައިވެ އެވެ.

ނަމަވެސް މިވާހަކަތައް ހުކުރު ދުވަހު ހެނދުނު ސޯޝަލް މީޑިއާ ގައި ފެތުރުމާއެކު، ޑރ. ސަނީ އުމަރު ވަނީ އެއަރ އިންޑިއާގެ ފްލައިޓަކުން ނިއު ދިއްލީ އަށް ފުރައިގެން ގޮސްފަ އެވެ. މިއާ އެކު ގިނަ ބަޔަކު ބުނަމުން ދަނީ، ސަނީ އުމަރު ޝަރީއަތުން ފިލުމަށް ރާއްޖެ އިން ފިލައިގެން ދިޔައީ ކަމަށެވެ.

ޑރ. އުމަރަކީ ދަ ޓްރެވަލް ގައިސް ޕްރައިވެޓް ލިމިޓެޑުގެ ވެރިޔާ އެވެ. އޭނާގެ ކުންފުނިން ރާއްޖޭގެ ޓޫރިޒަމް ދާއިރާގައި މަޝްހޫރު ޓްރެވެލިއުޝަން، މޯލްޑިވްސް ހަލާލް ޓްރެވަލް، ދަ އައިލެންޑް ޕޯސްޓް ފަދަ މަޝްހޫރު މަޖައްލާތަކާއި ނޫސްތައް ހިންގަ އެވެ. އަދި މޯލްޑިވްސް ހަލާލް ޓްރެވަލް ނަމުގައި ޓްރެވަލް އޭޖެންސީ އެއްވެސް އޭނާ ހިންގަ އެވެ. މި ކަން ކަމުގެ ސަބަބުން މިއަދާ ހަމައަށް އައި އިރު ޑރ. ސަނީ އުމަރު ވެފައިވަނީ ރާއްޖޭގެ ޓޫރިޒަމް، މީޑިޔާ އަދި ވިޔަފާރީގެ ދާއިރާގައި ނުފޫޒު ގަދަ ފަރާތަކަށެވެ.

ރާއްޖޭގެ ޖިންސީ ކުށުގެ ޤާނޫނު (ޤާނޫނު ނަންބަރު 17/2014) ގައި ކުޑަކުދިންނާ ދެކޮޅަށް ޖިންސީ އަމަލުތައް ހިންގުމަކީ ވަރަށް ހަރުކަށި އަދަބު ލިބޭ ކުށެއްގެ ގޮތުގައި ކަނޑައަޅާފައިވެ އެވެ. މި ކުށުގެ ދައުވާ ސާބިތުވެއްޖެނަމަ 7 އަހަރުން 15 އަހަރާ ދެމެދުގެ ޖަލު ހުކުމެއް އަންނާނެ އެވެ.

ޑރ. ސަނީ އުމަރު މިހާރު ރާއްޖެއިން ބޭރުގައި ހުރުމުން، ދައުވާކުރުމާއި ޤާނޫނު ތަންފީޒުކުރުމުގައި އިތުރު ގޮންޖެހުންތަކެއް ކުރިމަތިވެދާނެ އެވެ. ނަމަވެސް، 2019 ވަނަ އަހަރު ރާއްޖެއާއި އިންޑިއާއާ ދެމެދު ސޮއި ކުރި މިއުޗުއަލް ލީގަލް އެސިސްޓެންސް ޓްރީޓީގެ ދަށުން މިފަދަ ޖިނާއީ މައްސަލަތަކުގައި ދެ ގައުމުން އެއްގައުމުން އަނެއް ގައުމަށް އެހީތެރިކަން ފޯރުކޮށްދެވޭނެ އެވެ.