ޓުޒި ކާސާ އާއި ބިލްޑްޓެކް ޕްރައިވެޓް އާއި އެކު ވިޔަފާރީގެ މުހިންމު އެއްބަސްވުމެއްގައި ސޮއި ކޮށްފި

ޗައިނާގެ މަޤްބޫލު ފަރުނީޗަރު އުފައްދާ ކުންފުންޏެއް ކަމަށްވާ ޓުޒި ކާސާ އާއި ގެދޮރު އިމާރާތް ކުރުމުގައި ކުރި އަރާފައިވާ ކަލަރލޭންޑް ގުރޫޕުގެ ކުންފުންޏެއް ކަމަށްވާ ބިލްޑް ޓެކް އާއި ދެމެދު ވިޔަފާރީގެ މުހިންމު އެއްބަސްވުމެއްގައި ސޮއިކޮށްފި އެވެ.

އެ އެއްބަސްވުމުގައި ސޮއިކޮށްފައި ވަނީ އަންގާރަ ދުވަހު ހެނދުނު ބޭއްވި ރަސްމިއްޔާތެއްގަ އެވެ. އެ އެއްބަސްވުމުގައި ސޮއިކޮށްފައި ވަނީ ޓުޒި ކާސާގެ ސީ.އީ.އޯ، ފްރޭންކް ޒެންގް އަދި ބިލްޑްޓެކް ޕްރައިވެޓް ލިމިޓެޑްގެ ފަރާތުން ކުންފުނީގެ ޑިރެކްޓަރ އަލީ ފައްޔާޒް އެވެ.

ރާއްޖެ އެމްވީ އަށް މައުލޫމާތު ދެއްވަމުން ޓުޒި ކާސާގެ ސީ.އީ.އޯ، ފްރޭންކް ޒެންގް ވިދާޅުވީ، ބިލްޑްޓެކްއާއި އެކު މިވެވުނު އެއްބަސްވުމުގެ ސަބަބުން ޓުޒި ކާސާގެ ތަފާތު ޑިޒައިންތައް ރާއްޖެ އަށް ފެތޭ ސައިޒުތަކަށް ތައްޔާރުކޮށް ދެވޭނެ ކަމަށެވެ. ހަމައެހެންމެ ޓުޒި ކާސާގެ ކޮލިޓީ ޚިދުމަތްތައް ރާއްޖެ ގެނެސް ދިވެހިންނާއި ހިސާބަށް ފޯރުކޮށްދިނުމަކީ ރާއްޖޭގެ މާކެޓަށް ރަނގަޅު ބަދަލެއް ގެނުވާނެ ކަަމަކަށް ވެގެންދާނެ ކަމަށް އޭނާ ވަނީ ވިދާޅުވެފައި އެވެ.

ގިނަ ދިވެހިންނަށް މީހާ ޗައިނާ އަށް ގޮސް ޑިޒައިންތައް ބަލާލުމުގެ ފުރުސަތު ނުލިބޭ އިރު ރާއްޖެ އިން ލިބެން ހުންނަ ގިނަ ޑިޒައިންތަކަކީ ފިކްސްޑް ޑިޒައިންތަކެވެ. އެހެންކަމުން ބިލްޑްޓެކް އިން މި އެއްބަސްވުމާއި އެކު ފަހިކޮށްދެނީ ކޮލިޓީ މޮޅު އުފެއްދުންތައް ދިވެހިންނާއި ހަމައަށް ގެނެސްދެވޭނެ މަގެކެވެ. އެހެންކަމުން މިއީ އަލަށް އިމާރާތްކުރާ ގެތަކާއި ފްލެޓްތަކަށް ކަމުދާނެ ޚިދުމަތަކަށް ވާނެ އެވެ.

" އަޅުގަނޑުމެން ދިރިއުޅެނީ ވަރަށްވެސް ކުދި ކޮޓަރިތަކުގަ. މިތަން ތަނަށް ސްޓޭންޑަރޑް އަލަމާރިއެއް ގެންނައިރަށް ކޮޓަރި ފުރޭ. އެހެންވީމަ ބޭނުން ކަސްޓަމައިޒް ޑިޒައިން. އެކޮޓަރިއަކާއި އެކަށޭނަ ސައިޒުގެ ކަބަޑުތަށް ބޭނުންވަނީ. ރަނގަޅު އަގުގައި އަދި ރަނގަޅު ކޮލިޓީގެ ކެބިނެޓްރީ ބޭނުންވަނީ. ބޭނުންވާ ޑިޒައިން، ސީދާ ޗައިނާއިން ގެއަށް ގެނެވޭނެގޮތް މިވީ. އެވެސް އެކަށޭނަ އަގުގައި" ބިލްޑްޓެކްގެ ފަރާތުން މިއެއްބަސްވުމުގައި ސޮއެކުރި ޑިރެކްޓަރ، އަލީ ފަޔާޒް ވިދާޅުވި އެވެ.

ބިލްޑްޓެކް އިން ހާމަކޮށްފައިވާ ގޮތުގައި މި އެއްބަސްވުމުގެ ސަބަބުން ޗައިނާގެ ފޮޝާންގައި ހުންނަ ޓުޒި ކާސާގެ ފެކްޓަރީތަކުން ދިވެހިން ބޭނުންވާ ކަސްޓަމައިޒް ޑިޒައިންތައް ދިވެހިންނާއި ހަމަ އަށް ފޯރުކޮށް ދިނުމަށް މަގު ފަހިވެގެން ދާނެ އެވެ. އަދި ފަރުނީޗަރާއި ހިފާގެން ގުޅޭތަކެތި ފެންވަރު ރަނގަޅުކޮށް، ކަސްޓަމަރުން ބޭނުންވާ ގޮތަށް ކަސްޓަމައިޒްކޮށްގެން ރާއްޖެ އާއ ހަމައަށް ފޯރުކޮށްދެވޭނެ މަގު ވެސް މި އާއި އެކު ފަހިވެގެން ދާނެ އެވެ.

މީގެ އިތުރުން މި ޚިދުމަތްތައް ފައިނޭންސް ކުރުމުގައި ލުއި ގޮތްތަކެއް ހޯދާ ދިނުމުގެ އިތުރުން އަތްފޯރާ ފަށުގައި ޚިދުމަތް ލިބުމަކީ ކަސްޓަމަރުންނަށް ލިބޭ އިތުރު ލުއިފަސޭހަ އަކަށް ވެގެން ދާނެ އެވެ. މީގެ އިތުރުން މި އެއްބަސްވުމުގެ ދަަށުން ގެއެއް އިމާރާތްކުރުމަށްފަހު، ގޭގެ އެތެރޭގެ ފިނިޝިންގ ހެދުމަށާއި ގެއަށްބޭނުންވާ ފަރުނީޗަރު އެއްތަނަކުން ލިބޭނެ މަގު ފަހިކޮށްދެވޭނެ އެވެ.

ޓުޒި ކާސާ އަކީ ދުނިޔޭގެ ފެންވަރަށް ގެވެހި ފަރުނީޗަރުގެ ބަދިގޭގެ ވަތަގަޑުތަކާ ހަމައަށް ފަރުނީޗަރު (ކެބިނެޓްރި) ތައްޔާރު ކުރުމުގެ އިތުރުން އިމާރާތުގެ އެތެރޭގެ ފިނިޝިންގްއަށް ބޭނުންވާ ތަފާތު ޑިޒައިންތަކުގެ ފުލޯރިންގ އާއި، ސީލިންގް ޕެނަލާއި ސީލިންގް ލައިޓް ވެސް ބޭނުންވާ ފަރާތްތަކަށް ފޯރުކޮއްދޭ ބޮޑު ކުންފުންޏެކެވެ.