ދެން ދިއްދޫ އަށް މުއިއްޒު ވަޑައިގަންނަވާނީ މަތިންދާ ބޯޓުގައި
ދިއްދޫގެ ބަނދަރުގެ މައްސަލައަށް ޙައްލު ހޯއްދަވައި ދެއްވާނެ
ރައީސް މުއިއްޒު ދިއްދޫ އަށް ވަޑައިގަންނަވާތީ އެރަށުގައި ސަރުކާރުން އަޅައިދޭން ބުނީ އެއަރޕޯޓަށް ވާނުވާ ނޭގޭތީ ދަމާފައިވާ ބެނަރ އެއް
ދިއްދޫއަށް ދެން ވަޑައިގަންނަވާނީ، އެ ރަށުގެ އެއަރޕޯޓަށް ޖައްސާ މަތިންދާ ބޯޓުގައި، އެ އެއަރޕޯޓް ހުޅުވައިދެއްވުމަށް ކަމުގައި ރައީސް މުހައްމަދު މުއިއްޒު ވިދާޅުވެއްޖެއެވެ.
އަދުގެ ސަރުކާރުން ގެންގުޅޭ ސަރަޙައްދީ ތަރައްޤީގެ ވިސްނުމުގައި، ހއ. ދިއްދޫގައި އެއަރޕޯރޓެއް އެޅުމަކީ ކޮންމެހެން ކުރަންޖެހޭ ކަމެއް ކަމަށާއި، އެކަން ކޮށްދެއްވާނެ ކަމުގެ ޔަޤީންކަން، އަނެއްކާވެސް ރައީސް މުޢިއްޒު ދެއްވައިފިއެވެ.
ދިއްދޫގައި އެއަރޕޯޓެއް ތަރައްޤީ ކުރުމުގެ މަސައްކަތް ކުރައްވާނެ ކަމުގެ ޔަޤީންކަން ރައީސް ދެއްވާފައި މި ވަނީ، ތިލަދުންމަތީ އުތުރުބުރީގެ ބައެއް ރަށްތަކަށް އަންގާރަ ދުވަހު ފެއްޓެވި 3 ދުވަހުގެ ދަތުރުފުޅުގައި އެ އަތޮޅު ދިއްދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި، އަންގާރަ ދުވަހުގެ ރޭ ވާހަކަފުޅުދައްކަވަމުންނެވެ.
މި މޭރުމުން ވާހަކަފުޅުދައްވަމުން މުއިއްޒު ވިދާޅުވީ، ހއ. ދިއްދޫގައި އެއަރޕޯޓް ތަރައްޤީ ކުރުމުގެ ޢަމަލީ މަސައްކަތްތައް ފެށުމަށް މިހާރުވެސް ގިނަ މަސައްކަތްތަކެއް ތަރުތީބުކުރެވިފައިވާ ކަމަށެވެ. އެގޮތުން، އެމް.ޓީ.ސީ.ސީއާއި، ބޭރުގެ ފަރާތަކާއެކު ފްރޭމްވަރކް އެއްބަސްވުމެއް އެކުލަވައިލެވި، ޢަމަލީ މަސައްކަތްތައް ފެށުމާ ހަމައަށް މިހާރު ދަތުރުކުރެވިފައިވާ ކަމުގައި ވިދާޅުވިއެވެ.
އެމްޓީސީސީ އާ ދިއްދޫ އެއަރޕޯޓު އެޅުމުގެ ކޮންޓްރެކްޓް ގައި ސޮއި ކުރުން ބާއްވާފައިވަނީ ނިމިދިޔަ ރައްޔިތުންގެ މަޖިލީހުގެ އިންތިޚާބުގެ ދުވަސް ވަރު ހުސްވި އަހަރުގެ އޭޕްރީލް 20 ވަނަ ދުވަހު ދިއްދޫގައެވެ.
އޭގެ ފަހުން އެ މަޝްރޫއުގެ އެއްވެސް ކަމެއް ކުރިއަށް ގޮސްފައިނުވާ ކަމަށް މައުލޫމާތު ލިބިފައިވެއެވެ.
ރައީސް ވިދާޅުވީ މި ހިނގާ 2025 ވަނަ އަހަރު، ވަރަށް އަވަހަށް އަމަލީ ސިފައެއްގައި، ބިން ހިއްކުމުގެ މަސައްކަތާއެކު ފައްޓަވައި، އެކަން ނިންމަވައި، ދެން ކުރަންހުރި ހުރިހައި ކަމެއް ބާރު ދުވެލީގައި ފައްޓަވައި ދެއްވާނެ ކަމަށެވެ.
އެއަރޕޯޓް ތަރައްޤީ ކުރުމުގެ މަޝްރޫޢުގެ އިތުރުން، ހއ. ދިއްދޫގެ ތަރައްޤީއަށްޓަކައި ކޮށްދެއްވާނެ އިތުރު މަސައްކަތްތަކުގެ މައްޗަށް ބައްލަވާލައްވަމުން ދިއްދޫގެ ބަނދަރުގެ މައްސަލައަށް ޙައްލު ހޯއްދަވައި ދެއްވާނެ ކަމުގެ ޔަޤީންކަން އެމަނިކުފާނު ދެއްވިއެވެ. މީގެ އިތުރުން، ބައިނަލްއަޤުވާމީ ފެންވަރުގެ ފުޓުބޯޅަ ދަނޑެއް އެޅުމުގެ މަސައްކަތް މި އަހަރު ތެރޭގައި ބާރު ދުވެލީގައި ކުރިއަށް ގެންގޮސްދެއްވާނެ ކަމުގެ ޔަޤީންކަން، ރައީސް ވަނީ ދެއްވާފައެވެ.
އަދި ހއ. ދިއްދޫގެ ހޮސްޕިޓަލުގެ ތަރައްޤީއަށްޓަކައިވެސް މަސައްކަތްތަކެއް ކޮށްދެއްވާނެ ކަމުގައި ރައީސް ވިދާޅުވިއެވެ.
ހަމަ މިއާއެކު ބޯހިޔާވަހިކަމުގެ ދާއިރާއާއި މަސްވެރިކަމުގެ ދާއިރާއިންވެސް މަޝްރޫޢުތައް ހިންގަވައިދެއްވާނެ ކަމުގައި ރައީސް ވަނީ ވިދާޅުވެފައެވެ.
އޭގެ އިތުރުން ހއ. ދިއްދޫގައި ކުނިމެނޭޖު ކުރުމުގެ ކަންކަން، ވެމްކޯގެ ދަށުން، މި އަހަރުގެ ރަމަޟާން މަސް ފެށުމުގެ ކުރިން ހަމަޖެހިގެންދާނެ ކަމުގެ ޔަޤީންކަންވެސް ރައީސް ވަނީ ދެއްވާފައެވެ.
ރައީސް މުއިއްޒު ރިޔާސީ ކެމްޕޭންގައި އެރަށަށް ވަޑައިގެން ކޮށްދެއްވާނެ ކަމަށް ވިދާޅުވި ކަންކަން މި ދަތުރުފުޅުގައި އަނެއްކާވެސް ކޮށްދެއްވާނެ ކަމަށް ވިދާޅުވެ ތަކުރާރު ކުރެއްވި އިރު، ތަރައްގީގެ ކަންކަން އެކަށީގެންވާ ގޮތެއްގައި ދިއްދޫގައި ނުހިނގާތީ އެކަމުގެ ހިތްހަމަ ނުޖެހުން ފާޅު ކޮށް އެމަނިކުފާނު ވަޑައިގެންނެވި ވަގުތު ދިއްދޫގެ ބައެއް މީހުން ވަނީ އެމަނިކުފާނުގެ އިސްތިއުފާ އަށް ގޮވާ އިހުތިޖާޖު ކޮށްފައެވެ.
