ފުރަތަމަ އެއަރ ސްޓޭޝަން ގާއިމުކޮށް، ހިދުމަތް ފެށުމަށް އެންގި ނަމަވެސް ތަނެއް ހަމަޖެހިފައި ނެތް
އެއަރ ކޯރގެ ފުރަތަމަ އެއަރ ސްޓޭޝަން ގާއިމުކޮށް، އެ އެއަރ ސްޓޭޝަނުގެ ހިދުމަތް ފެށުމަށް މި ގަރާރުން ވަނީ ދިވެހި ސިފައިންގެ މައްޗަށް އަންގާ އަމުރުކޮށްފަ
އެއަރ ކޯރގައި ބޭނުންކުރާ ޑްރޯނެއް - އެއަރ ސްޓޭޝަން ގާއިމްކުރާނެ ތަނެއް ހަމަޖައްސާފައި ނުވޭ
ފުރަތަމަ އެއަރ ސްޓޭޝަން ގާއިމުކޮށް، ހިދުމަތް ފެށުމަށް އެންގި ނަމަވެސް ތަނެއް ހަމަޖެހިފައި ނެތް ކަމަށް އެމްއެންޑީއެފް އިން ބުނެފި އެވެ.
މޯލްޑިވްސް ނޭޝަނަލް ޑިފެންސް ފޯސްގެ އެއަރ ކޯރގެ ފުރަތަމަ އެއަރ ސްޓޭޝަން ގާއިމުކޮށް، ޚިދުމަތް ފެށުމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ ގަރާރަކުން ހޯމަ ދުވަހު ވަނީ ނިންމާފަ އެވެ. ރައީސުލްޖުމްހޫރިއްޔާގެ އޮފީހުން ބުނީ، އެމަނިކުފާނު މިގޮތަށް ނިންމަވާފައި ވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 106 ވަނަ މާއްދާގެ (ށ) އާއި، 115 ވަނަ މާއްދާގެ (ޓ) އާއި، ގާނޫނު ނަންބަރު 2008/1 (ސިފައިންގެ ގާނޫނު) ގެ 9 ވަނަ މާއްދާއިން ލިބިދޭ ބާރާއި އިހުތިޔާރުގެ ދަށުންނެވެ.
ނަމަވެސް އެއަރ ސްޓޭޝަން ގާއިމް ކުރަނީ ކޮންތަނެއްގައި ކަމެއް ސަރުކާރުން ހާމަކޮށްފައި ނުވެއެވެ. މިވަގުތު އެއަރ ކޯރގެ ސިފައިން އައްޑޫ ސިޓީގެ ގަމުގެ އިތުރުން ލ. ކައްދޫ އަދި ނ. މާފަރުގައި ތިބެ އެވެ.
މިކަމާއި ގުޅޭގޮތުން އެމްއެންޑީއެފުން ބުނީ އެއަރ ސްޓޭޝަން ގާއިމްކުރާނެ ތަނެއް އަދި ހަމަނުޖައްސާ ކަމަށެވެ. އަދި ތަނެއް ހަމަޖެއްސުމަކީ މަރުހަލާއެއްގެ ތެރެއިން ދާނެ ކަމެއް ކަމަށާއި، ސްޓޭޝަން ގާއިމްކުރަން އަދި ވަކިތަނެއް ހަމަނުޖައްސާ ކަމަށެވެ. އިތުރު ތަފްސީލެއް ނުދެ އެވެ.
ރައީސްގެ ގަރާރުގައި ބުނެފައިވަނީ ދިވެހީންގެ ދީނާއި ދިވެހީންގެ މިނިވަންކަމާއި ދިވެހި ދައުލަތުގެ ސިޔާދަތީ ބާރު ނަގަހައްޓައި ދެމެހެއްޓުމަށް ޓަކައި ދިވެހިރާއްޖޭގެ ވައިގެ ސަރަހައްދާއި، ދިވެހިރާއްޖޭގެ ހާއްސަ އިގްތިސާދީ ސަރަހައްދު ބެލެހެއްޓުމަށާއި، ދިވެހިރާއްޖޭގެ ސަރަހައްދުގައި ވައިގެ ވަސީލަތްތައް ބޭނުންކޮށްގެން ހިންގަންޖެހޭ އޮޕަރޭޝަންތައް ހިންގުމަށާއި، ރެޔާއި ދުވާލު ސައުވީސްގަޑިއިރު ހުއްޓުމެއްނެތި ދިވެހިރާއްޖޭގެ ވައިގެ ސަރަހައްދު ދިފާއުކޮށް ބެލެހެއްޓުމަށާއި، ދެމެހެއްޓެނިވި ގޮތެއްގައި ދިވެހި އަސްކަރިއްޔާއާ މަތިކުރެވިފައިވާ ޒިންމާއާއި ވާޖިބު އެންމެ ފުރިހަމަގޮތުގައި އަދާކުރުމަށްޓަކައި މޯލްޑިވްސް ނޭޝަނަލް ޑިފެންސް ފޯސްގެ އެއަރ ކޯރގެ ފުރަތަމަ އެއަރ ސްޓޭޝަން ގާއިމުކޮށް، އެ އެއަރ ސްޓޭޝަނުގެ ހިދުމަތް ފެށުމަށް މި ގަރާރުން ވަނީ ދިވެހި ސިފައިންގެ މައްޗަށް އަންގާ އަމުރުކުރާ ކަމަށެވެ.
ރައީސުލްޖުމްހޫރިއްޔާ މޯލްޑިވްސް ނޭޝަނަލް ޑިފެންސް ފޯސްގެ އެއަރ ކޯރ އުފެއްދެވީ 15 މާރޗް 2024 ގައި ރައީސުލްޖުމްހޫރިއްޔާގެ ގަރާރު ނަންބަރު 5/2024 އިންނެވެ. އެއަރ ކޯރ އުފެއްދެވުމުގެ އިތުރުުން އަންމޭންޑް އޭރިއަލް ވެހިކަލް (ޔޫ.އޭ.ވީ) ސިފައިންގެ ހިދުމަތަށް ވަނީ ތާރަފްކޮށްފަ އެވެ.
