281 ފުޅި ބަނގުރަލާއެކު ތިން ބިދޭސީއަކު ހައްޔަރުކޮށްފި
ހައްޔަރުކުރީ ބަންގްލަދޭޝް އަށް ނިސްބަތްވާ ދެމީހަކާއި ޕާކިސްތާނު މީހަކު
ބަނގުރާ ވިއްކާ އޭގެ ބޭނުންކުރާ ކަމުގެ ތުހުމަތުގައި ހައްޔަރުކުރި 3 މީހުން
281 ފުޅި ބަނގުރަލާއެކު ތިން ބިދޭސީއަކު ހައްޔަރުކޮށްފި އެވެ.
ފުލުހުން ބުނީ މި މައްސަލައިގައި ހައްޔަރުކުރީ ބަންގުލަދޭޝް އަށް ނިސްބަތްވާ ދެމީހަކާއި ޕާކިސްތާނު މީހެއް ކަމަށެވެ. މީގެ ތެރޭގައި ހިމެނެނީ އެމްޑީ ރިޔާސުއްދީން، ބަންގްލަދޭޝް (19އ) އާއި އެމްޑީ އަޝްރަފުލް އަލަމް، ބަންގްލަދޭޝް (27) އަދި ޔާސިރް ހަމީދު، ޕާކިސްތާން (24އ) އެވެ.
މި މައްސަލަ އަކީ ފުޅާ ދާއިރާއެއްގައި ބަނގުރަލުގެ ވިޔަފާރިކޮށް ބަނގުރާ ބޭނުން ކުރަމުން ދިޔަ މައްސަލައެކެވެ. މި ތިން މީހުން ވެސް ހައްޔަރުކޮށްފައި ވަނީ ހޮނހިރު ދަުވަހުގެ ދަންވަރުގެ ވަގުތެއްގައި ހުޅުމާލެ ފޭސް 1 ގެ ފުލުހުން ރަށުތެރެ ޕެޓްރޯލްކުރުމުގެ ތެރޭގައެވެ.
ފުލުހުން ޕެޓްރޯލުކުރަމުން ދިޔައިރު ފުލެޓް 100 ކައިރީގައި އެ މީހުން ފޮށިތަކަކާއި ފޮށިގަނޑުތަކެއް ގެންގުޅޭތީ ތުހުމަތު ކުރެވިގެން އެ ތަކެތި ބަލައި ފާސްކުރިއިރު ބަނގުރާ ކަމަށް ބެލެވޭ އެއްޗެއްހުރި 500 އެމްއެލްގެ 232 ފުޅި ފެނިފައިވެ އެވެ. އަދި އެ ތަނުން އެކަކު ދިރިއުޅޭ އެޕާޓްމަންޓު ބަލައި ފާސްކުރި އިރު ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 49 ފުޅި ފެނިފައިވެ އެވެ.
މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުުމަށް ކޯޓަށް ހާޒިރުކުރުމުން ތިން މީހުން ވެސް 10 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ.
