ކޮލޮމްބިއާ އިން އެމެރިކާ ގައި ހުންނަ އެ ޤައުމުގެ ސަފީރު އަނބުރާ ގެނެސްފިއެވެ.

މިއީ އެމެރިކާގެ ރައީސް ޑޮނަލްޑް ޓްރަމްޕް މިދިޔަ ހަފްތާގެ ފަހުކޮޅު ކޮލޮމްބިއާގެ ރައީސްއާ ބެހޭ ގޮތުން ބޭއަދަބީ ވާހަކަ ދައްކަވައި، ކޮލަމްބިއާ އަށް ދޭ އެހީ ހުއްޓާލާނެ ކަމަށް އިންޒާރުދިނުމާ ގުޅިގެންނެވެ.

ދެކުނު އެމެރިކާގެ މި ޤައުމުގެ ފޮރިން މިނިސްޓްރީން ހޯމަ ދުވަހު ބުނެފައި ވަނީ ސަފީރު ޑެނިއަލް ގާސިއާ-ޕެނާ ވަނީ މިހާރު ބޮގޯޓާ އަށް އެނބުރި ވަޑައިގަނެ، ރައީސް ގުސްޓާވޯ ޕެޓްރޯއާ ބައްދަލު ކުރައްވާފައެވެ.

ޓްރަމްޕް އާދިއްތަ ދުވަހު ޕެޓްރޯ އަކީ "މަސްތުވާތަކެތީގެ ވިޔަފާރީގެ ބޮޑެއް" ކަމަށް ވަނީ ވިދާޅުވެފައެވެ.

ދެ ޤައުމުގެ މެދުގައި އިތުރުވަމުންދާ ޚިލާފު ތައް ފެށުނީ ކެރިބިއަންގައި ދަތުރުކުރާ އުޅަނދުތަކަށް އެމެރިކާ އިން ދެމުންދާ ހަމަލާތަކާ ގުޅިގެންނެވެ. ޓްރަމްޕްގެ ސަރުކާރުން ބުނާ ގޮތުގައި މި އުޅަނދުތަކުގެ ތެރޭގައި ގިނައީ ވެނެޒުއެލާ އިން މަސްތުވާތަކެތި އުފުލާ އުޅަނދުތައް ކަމުގައެވެ.

އެމެރިކާގެ މި ހަމަލާތަކުގައި ގިނަ އަދަދެއްގެ މީހުން މަރުވެފައިވާއިރު، މިއީ ޓްރަމްޕް ސަރުކާރުން ކުރަމުން ގެންދާ އެމެރިކާގެ އަދި ބައިނަލްއަޤްވާމީ ޤާނޫނުތަކާ ޚިލާފު ކަމެއްކަމަށް ފުޅާ ދާއިރާއެއްގައި ވަނީ ބެލެވިފައެވެ. އަދި ޕެޓްރޯ ވަނީ މިކަމާ ގުޅިގެން ހަރުކަށި ފާޑުކިޔުންތަކެއް އެމެރިކާ އަށް އަމާޒު ކުރައްވާފައެވެ.

އާދިއްތަ ދުވަހު ސޯޝަލް މީޑިއާގައި ޓްރަމްޕް ވަނީ ކޮލޮމްބިއާ އަށް ދޭ އެހީ ހުއްޓާލާނެ ކަމަށް ވިދާޅުވެފައެވެ. އަދި ޕެޓްރޯ މަސްތުވާތަކެތީގެ ވިޔަފާރި ހުއްޓުވުމަށް އިތުރު ފިޔަވަޅުތަކެއް ނާޅައިފިނަމަ، އެމެރިކާ އިން އެކަން ކުރާނެ ކަމަށާއި، "އެކަން ކުރާނީ ރީތި ގޮތަކަށް ނޫން" ކަމަށް ވިދާޅުވެ އިންޒާރު ދެއްވާފައިވެއެވެ.

ކޮލޮމްބިއާގެ އިންޓީރިއަރ މިނިސްޓަރ އަރްމަންޑޯ ބެނެޑެޓީ ހޯމަ ދުވަހު ވިދާޅުވެފައި ވަނީ ޓްރަމްޕްގެ މި ބަސްތައް އޭނާ އަށް ސިފަ ކުރެވެނީ "ކޮލޮމްބިއާ އަށް އެމެރިކާގެ ސިފައިން އަރާނެ ކަމުގެ އިންޒާރެއް ގެ ގޮތުގައި ކަމަށެވެ.