ލޮލުގެ ފަހަތައް ލައްވާ އިމްޕްލާންޓެއްގެ އެހީގައި ލޯފަން މީހުންނަށް އަލުން ފެންނަ ގޮތް ސައިންސްވެރިން ހަދައިފިއެވެ.

މި އިމްޕްލާންޓްގެ ސަބަބުން ކުރިން އެއް ގޮތަކަށް ވެސް ލޮލަށް ނުފެންނަ މީހުންނަށް އަލުން އެއްޗެހި ބަލައިގެން ކިޔަން އެނގޭ ކަމަށް ވަނީ ހާމަވެފައެވެ.

ލަންޑަނުގެ މޫފީލްޑްސް އައި ހޮސްޕިޓަލުގައި ފަސް މީހެއްގެ ލޮލަށް މައިކްރޯޗިޕް އިމްޕްލާންޓް ކުރި ޑޮކްޓަރު ބުނެފައި ވަނީ ނަތީޖާތައް "ހައިރާން ކުރުވަނިވި" ކަމަށެވެ.

ލޯފަން މީހެއްގެ ގޮތުގައި ރަޖިސްޓްރީވެފައިވާ 70 އަހަރުގެ ޝީލާ އަރވިން ބީބީސީ އަށް ބުނެފައި ވަނީ އަލުން ކިޔަން އެނގުމަކީ "މި ދުނިޔެމަތީގެ ކަމެއް ނޫން" ކަމަށެވެ. އެއީ އަދި ހައިރާން ކުރުވަނިވި ކަމެއް ކަމަށާއި އެކަމުން އޭނާ އަށް ވަރަށް ބޮޑު އުފަލެއް ލިބުނު ކަމަށް ބުނެފައިވެއެވެ.

މި ޓެކްނޮލޮޖީން އުއްމީދު ލިބެނީ އުމުރާ ގުޅިފައިވާ މެސްކިއުރަރ ޑީޖެނެރޭޝަން (އޭއެމްޑީ) ބަލި ލޮލަށް ޖެހުމުގެ ސަބަބުން ފެނުމުން މަހުރޫމު ވެފައިވާ މީހުންނަށެވެ. މުޅި ދުނިޔޭގައި ފަސް މިލިއަން މީހުންނަށް މިހާލަތު ދިމާވެފައިވާ ކަމަށް ރިޕޯޓު ކޮށްފައިވެއެވެ.

މި ބަލި ގިނައިން ޖެހެނީ އުމުރުން ދޮށީ މީހުންނަށެވެ. ބަލި ޖެހެން މެދުވެރިވަނީ ލޮލުގެ ފަހަތުގައިވާ ރެޓީނާގެ ކުޑަކުޑަ ސަރަހައްދެއްގައިވާ ސެލްތަކަށް ގެއްލުންވެ، މަރުވަމުން ދިއުމުންނެވެ. މީގެ ސަބަބުން ލޮލުގެ ފެނުން ފުސްވެ މަންޒަރު އޮޅޭ ގޮތްވެއެވެ. ގިނަފަހަރު ކުލަ އަދި މަންޒަރުގެ ތަފްސީލުތައް ގެއްލެއެވެ.

އާ ފަރުވާ ގައި ހިމެނެނީ އިންސާނެއްގެ އިސްތަށްޓެއްގެ ބޯމިނުގެ، 2 މިލިމީޓަރު ހުންނަ ހަތަރެސްކަން ފޮޓޯވޯލްޓިކް މައިކްރޯޗިޕެއް ލޮލުގެ ރެޓީނާގެ ދަށަށް ލެއްވުމެވެ.

އޭގެ ފަހުން ބަލިމީހުން އަޅަނީ ވީޑިއޯ ކެމެރާ އެއް ހަރުކޮށްފައިވާ އައިނެކެވެ. ކެމެރާ އިން ވީޑިއޯ މަންޒަރުތަކުގެ އިންފްރާރެޑް ބީމެއް ލޮލުގެ ފަހަތަށް ލައްވާފައިވާ އިމްޕްލާންޓަށް ފޮނުވައެވެ. އޭގެ ފަހުން އެ މަންޒަރުތައް ފޮނުވަނީ ކުޑަކުޑަ ޕޮކެޓް ޕްރޮސެސަރަކަށެވެ. އެއީ އިތުރަށް ރަނގަޅުކޮށް، ސާފުކުފުކުރުމަށެވެ.

އޭގެ ފަހުން މަންޒަރުތައް އިމްޕްލާންޓާއި އޮޕްޓިކް ނާރުގެ ޒަރީއާ އިން ބަލިމީހާގެ ސިކުނޑިއަށް ފޮނުވައެވެ. މިގޮތުން ބަލިމީހާ އަށް އަލުން ފެންނަން ފަށައެވެ.

ބަލިމީހުންނަށް އަލަށް ފެންނަން ފަށާ މަންޒަރުތައް ދެނެގަނެ އަހުލުވެރިވުމަށް މަސްތަކެއް ހޭދަކުރަން ޖެހޭ ކަމަށް ވެއެވެ.

މި ދިރާސާ އިނގިރޭސިވިލާތުގައި ހިންގި ލަންޑަނުގެ މޫފީލްޑްސް އައި ހޮސްޕިޓަލުގެ ކޮންސަލްޓަންޓް އޮފްތަލްމިކް ސަރޖަން މަހީ މުޤިތު ބީބީސީ އަށް ބުނެފައި ވަނީ މިއީ އައު އީޖާދެއް ކަމަށާއި އަދި ދިރިއުޅުމަށް ބަދަލު ގެނެސްދޭ ޓެކްނޮލޮޖީ އެއް ކަމަށެވެ.

"މިއީ ބަލިމީހުންނަށް މާނަހުރި ގޮތެއްގައި ފެނުމުގެ ހިއްސު އިއާދަ ކޮށްދޭކަން ސާބިތުވެފައިވާ ފުރަތަމަ އިމްޕްލާންޓް. ފެނުން އިއާދަވާ މީހުންނަށް ދުވަހުން ދުވަހަށް ބޭނުން ކުރެވޭނެ. މިސާލަކަށް ކިޔުމާއި ލިޔުމަށް."

"އަހަރެން ދެކޭގޮތުގައި މިއީ ވަރަށް ބޮޑު ކުރިއެރުމެއް،" އޭނާ ބުންޏެވެ.

ނިއު އިންގްލަންޑް ޖާނަލް އޮފް މެޑިސިންގައި ޝާއިޢު ކޮށްފައިވާ ދިރާސާގައި، ޔޫރަޕުގެ ފަސް ޤައުމެއްގެ ޖިއޮގްރަފިކް އެޓްރޮފީ ޖެހިފައިވާ 38 ބަލިމީހުން ބައިވެރިވިއެވެ. މި ތަޖުރިބާގައި ބޭނުން ކުރީ ކެލިފޯނިއާގެ ބަޔޯޓެކް ސައިންސް ކޯޕަރޭޝަނުން އުފައްދާފައިވާ ޕްރައިމާ އިމްޕްލާންޓެވެ.

އިމްޕްލާންޓް ކުރި 32 ބަލިމީހުންގެ ތެރެއިން 27 މީހުންނަށް ލޮލުގެ ފެނުން ބޭނުން ކޮށްގެން އަލުން ކިޔަން އެނގުނެވެ.

މި ދިރާސާ ގައި ބައިވެރިވި އިނގިރޭސިވިލާތުގެ ރައްޔިތެއް ކަމަށްވާ ވިލްޓްޝަޔަރުގެ ޝީލާ އަކީ އެއް ގޮތަކަށް ވެސް ލޮލުގެ ފެނުން ނެތް މީހެކެވެ.

ނަމަވެސް މޫފީލްޑްސް ހޮސްޕިޓަލުގައި ޝީލާ އައި ޗާޓެއް ކިޔަމުން ދިޔަ ވީޑިއޯ އެއް ބީބީސީ އިން ނެގިއިރު، އޭނާ އެއްވެސް ކުށެއް ނެޖެހި އަކުރުތައް ވަނީ ކިޔާފައެވެ.

ޕްރައިމާ އިމްޕްލާންޓަކީ އަދި ލައިސަންސް ލިބިފައިވާ ޓެކްނޮލޮޖީއެއް ނޫނެވެ. އެހެންކަމުން ކްލިނިކަލް ތަޖުރިބާތަކުން ބޭރުން އަދި މި ފަރުވާ ލިބޭކަށް ނެތެވެ. އަދި މި ފަރުވާގެ އަގަކީ ކިހާވަރެއްކަން އަދި ސާފެއް ނޫނެވެ.

އެހެންނަމަވެސް، މަހީ މުޤިތު އުއްމީދު ކުރަނީ "އަހަރުތަކެއްގެ ތެރޭގައި" އިނގިރޭސިވިލާތުގައި ބައެއް ބަލިމީހުންނަށް މި އިމްޕްލާންޓް ލިބޭނެ ކަމަށެވެ.

މުސްތަޤްބަލުގައި މި ޓެކްނޮލޮޖީ ބޭނުންކޮށްގެން އެހެން ލޮލުގެ ބަލިތައް ޖެހިފައިވާ މީހުންނަށް ވެސް އެހީތެރިވެވިދާނެއެވެ.

މެކިއުލަރ ސޮސައިޓީގެ ރިސަރޗް ޑައިރެކްޓަރ ޑރ. ޕީޓަރ ބްލޫމްފީލްޑް ބުނެފައިވަނީ މި ނަތީޖާތަކަކީ "ހިތްވަރުދޭ" އަދި މިހާރު އެއްވެސް ފަރުވާއެއް ނެތް މީހުންނަށް "އުފާވެރި ޚަބަރެއް" ކަމަށެވެ.