ފައިސާ ޗާޕުކޮށްގެން ސަރުކާރަށް 2.5 ބިލިއަން ރުފިޔާ ޕެންޝަން ފަންޑު މެދުވެރިކޮށް ހޯދުމާ ބެހޭ ގޮތުން ގޮތެއް ނިންމަން މިއަދު ބޯޑުގެ ބައްދަލުވެއް ބާއްވަނީ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފައިސާ ޗާޕު ކޮށްގެން ސަރުކާރަށް 2.5 ބިލިއަން ރުފިޔާ ޕެންޝަން ފަންޑު މެދުވެރިކޮށް ހޯދައިދިނުމާ ބެހޭ ގޮތުން ގޮތެއް ނިންމުމަށް ހޯމަ ދުވަހު ޕެންޝަން ބޯޑުގެ ބައްދަލުވުމެއް ބޭއްވުމަށް ނިންމައިފިއެވެ.

އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ބޯޑު ބައްދަލުވުން އޮންނާނީ ހޯމަ ދުވަހު މެންދުރުފަހު 2:00 ގައެވެ.

ޕެންޝަން އޮފީހުގެ ބޯޑު އެކުލެވިގެންވަނީ 8 މެމްބަރުންގެ މައްޗަށެވެ. އެއީ ޕަބްލިކް ސެކްޓަރ ތަމްސީލު ކުރާ 3 މެމްބަރުންނާއި ޕްރައިވެޓް ސެކްޓަރ ތަމްސީލު ކުރައްވާ 4 މެމްބަރުންނާއި އޭގެ އިތުރުން ބޯޑުގައި ހިމެނިވަޑައިގަންނަވަނީ ބޯޑުގެ ޗެއަރ ޕާރސަން އެވެ.

1. ޑރ. އަޙްމަދު އިނާޒް، ބޯޑުގެ ޗެއަރޕަރސަން
2. ޝިފާޒާ ވަޖީހު - ބޯޑު މެމްބަރު (ޕަބްލިކް ސެކްޓަރ)
3. އަލްއުސްތާޛާ މިޒްނާ އަޙްމަދު - ބޯޑު މެމްބަރު (ޕްރައިވެޓް ސެކްޓަރ)
4. މުޙައްމަދު މާދިން ލަޠީފް - ބޯޑު މެމްބަރު (ޕްރައިވެޓް ސެކްޓަރ)
5. ފާޠިމަތު ޢަބްދުﷲ ކަމާލުއްދީން - ބޯޑު މެމްބަރު (ޕަބްލިކް ސެކްޓަރ)
6. ޢަބްދުލްމަޖީދު ޢަލީ - ބޯޑު މެމްބަރު (ޕްރައިވެޓް ސެކްޓަރ)
7. އަލްއުސްތާޛް އަޝްރަފު ރަޝީދު - ބޯޑު މެމްބަރު (ޕަބްލިކް ސެކްޓަރ)
8. އަޙްމަދު ސަރުވަޝް އާދަމް - ބޯޑު މެމްބަރު (ޕްރައިވެޓް ސެކްޓަރ)

ފައިސާ ޗާޕު ނުކުރުމަކީ ރައީސް މުޙައްމަދު މުޢިއްޒު ރިޔާސީ އިންތިހާބުގެ ކެމްޕޭން ތެރޭގައި ރައްޔިތުންނަށް ވެވަޑައިގެންފައިވާ ބޮޑު ވައުދެކެވެ. އިންތިޚާބު ވުމަށް ފަހު ވެސް ތަކުރާރު ކޮށް ފައިސާ ޗާޕު ނުކުރައްވާނެ ކަމަށް ރައީސް މުއިއްޒު ވަނީ ވިދާޅުވެއެވެ. ކަންކަން ކުރެވޭ ވަރަށް ދައުލަތައް ކޮންމެ މަހަކު ފައިސާ ލިބޭ ކަމަށާއި، ލޯނު ނެގުމާއި ފައިސާ ޗާޕުކުރުން ފަދަ ކަންކަން ކޮށްގެން ދައުލަތަށް ފައިސާ ހޯދަންޖެހޭ އެއްވެސް ސަބަބެއް ނެތްކަމަށް ވެސް ރައީސް މުއިއްޒު ވަނީ ވިދާޅުވެފައެވެ. އަދި އެ ކަންކަން ނުކޮށް ފައިސާ ހޯދަން އެނގިވަޑައިގަންނަވާ ކަމަށާއި، މި ސަރުކާރުން ފައިސާ ޗާޕު ނުކުރާނެ ކަމަށް ތަކުރާރުކޮށް ވިދާޅުވެފައިވެއެވެ.