ކޮންޓެއިނަރ ވައްކަން - "މިއީ ފްރޭމް ކުރުމުގެ އަމަލެއް ނޫންތޯ ސުވާލު އުފެދޭ"
އެމްޕީއެލްގެ ބެލުމުގެ ދަށުގައި ހުރި ސިނގިރޭޓްތަކެއް ވަގަށް ނެގި މައްސަލައަކީ ރާވައިގެން ކުރި ކަމެއް ކަމަށް ރާއީ ވިދާޅުވި
ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރު މުހައްދު ރާއީ، ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަނީ
ވަގަށް ނެގި 13 މިލިއަން ސިނގިރެޓް މައްސަލައިގައި ބަޔަކު ފްރޭމްކުރުމުގެ ކަންތައްތަކެއް ހިނގަނީ ނޫންތޯ ސުވާލު އުފެދޭ ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރު މުހައްދު ރާއީ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ. ރާއި ވަނީ މިއީ ފްރޭމްކުރުމުގެ އަމަލެއް ނޫންތޯ ސުވާލު އުފައްދަވާފައެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހުޅުމާލޭ އިންޓަރނޭޝަނަލް ޕޯޓުގައި ހުއްޓާ 40 ފޫޓުގެ ދެ ކޮންޓެއިނަރ ކޮންޓެއިނަރ ވަގަށް ނެގިކަން ސަރުކާރަށް ރޭކާލީ ހޯމް މިނިސްޓަރ އަލީ އިހުސާން އަށް މެސެޖެއް ލިބުނު ހިސާބުން ކަމަށް ވެސް ރާއި ވަނީ ވިދާޅުވެފައެވެ.
ގެއްލުވާލި ކޮންޓެއިނަރތަކުގައި ހުރީ ނައްތާލަން ޖެހޭ ސިނގިރެޓްތަކެއް ކަމަށާއި އެކަން ނުކޮށް ވަނީ ކީއްވެތޯ ސުވާލު އުފެދޭ ކަމަށް ރާއި ވިދާޅުވިއެވެ. އެހެންކަމުން މި ތަކެތި ނައްތާ ނުލާ ހުންނަން ޖެހޭ ސަބަބެއް ނެތް ކަމަށް އޭނާ ވިދާޅުވިއެވެ.
"އެޕްރިލް މަހު ހިފެހެއްޓީ. އޮގަސްޓް މަހު ވަގަށް ނެގީ. ކީއްވެތޯ އެހާ ގިނަ ދުވަސް ވަންދެން ހުރީ ބަހައްޓާފައި. ސަރުކާރުން ވިޔަފާރިވެރިޔަކާއި މެދު ނުރުހިއްޖެ ނަމަ އެއަށް ކޮންމެ އެއްޗެއް ލާފަ ވެސް އެ ވިޔަފާރިވެރިޔާ ފްރޭމް ކުރުމުގެ ޖާގަ އެބަ އޮތް މިއަދު އެ ސުވާލު އުފެއްދޭނެ. މިއަށް ފީނި ވަރަކަށް ފެނުނީ ވަރަށް ނުރައްކާ ކަންކަން. " ރާއީ ވިދާޅުވިއެވެ.
މީގެ އިތުރުން ދައުލަތުގެ ބެލުމުގެ ދަށުގައި ހުރި މުދަލެއް ގެއްލުވާލި އިރު އެއީ ނުވާ ކަމަކަށް ހަދައިގެން ނުތިބެވޭނެ ކަމަށް ރާއީ ވަނީ ވިދާޅުވެފައެވެ. އޭނާ ވިދާޅުވީ މިއީ ވަަރަށް އިދާރާތަކުގެ މެދުަގައި ވެސް ރާވައިގެން ނޫނީ ނުހިންގޭނެ ޒާތުގެ ވައްކަމެއް ކަމަށެވެ.
ރާއީ ވިދާޅުވީ ރާއްޖެ އަށް ވަގަށް ސިނގިރެޓް އެތެރެކުރަން އުޅުނު މައްސަލަ އަކީ ވަކި މައްސަލަ އެއްގެ ގޮތުގައި ބަލަން ޖެހޭ ކަމެއް ކަމަށެވެ. އަދި އެކަން ނުބަލާ ހަމައެކަނި އެ ސިނގިރޭޓް ކޮންޓެއިނަރތައް ވަގަށް ނެގި މައްސަލަ އެކަނި ބެލުމަކީ އޮޅުވާލުމެއް ކަމަށް ރާއީ ވަނީ ސިފަކުރައްވާފައެވެ.
"މިއީ ދެ ވައްކަމެއް. ފުރަތަމަ ކަމަކީ ސްމަގްލް ކުރުން. ދެ ވަނަ ކަމަކަށް މި އުޅެނީ އެ ނެރެގެން ގެންދިޔަ މައްސަލަ. ކޮބާތޯ އޭ މި އެތެރެ ކުރި ބޭފުޅުން؟ ސްމަގްލް ކުރި ބޭފުޅުން ކޮބާތޯއޭ؟ މިއީ ދެ ވައްކަމެއް. މި އެއް ނުކުރެވޭނެ. މިއީ ވަރަށް ރޭވުންތެރިކަމާއި އެކު ކޮށްފައި ހުރި ކަމެއް." ފްރައިޓް ހެންޑްލިން ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ރާއީ ވިދާޅުވިއެވެ.
ވަގަށް ނެގި މުދަލުގެ ތެރޭގައި ހިމެނެނީ ކަސްޓަމްސް ސާވިސް އިން ހިފަހައްޓާ އެމްޕީއެލްގެ ބެލުމުގެ ދަށުގައި ބެހެއްޓިފައިވާ 1،360 ކޭސް (ގާާތްގަނޑަކަށް 13.6 މިލިއަން ސިނގިރޭޓް) އެވެ. މި އަދަދުގެ ސިނގިރޭޓުން ސަރުކާރަށް އިމްޕޯޓް ޑިއުޓީގެ ގޮތުގައި 100 މިލިއަން ރުފިޔާ އަށް ވުރެ ގިނަ އިން ލިބެން ޖެހޭނެ ކަމަށް ބެލެވެއެވެ.
