ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓާގެޓަކީ ގައުމީ އަންހެން ޓީމުގެ ކުޅުންތެރިން ބޭނުންވާ މަގުތައް ކޮށައިދީ އެ ކުޅުންތެރިން ބޭނުންވާ ހިސާބަށް ވާސިލުކޮށްދިނުން ކަމަށް އެފްއޭއެމްގެ ނައިބް ރައިސާ އައިޝަތް ނާޒިމާ ވިދާޅުވެއްޖެ އެވެ.
ނާޒިމާ ވިދާޅުވީ، ނިމިގެންދިޔަ ވިމެންސް ސާފް ޗެމްޕިއަންޝިޕްގެ ސެމީފައިނަލަށް ގައުމީ އަންހެން ޓީމު ދަތުރުކުރީ ކުޅުންތެރިންގެ ބުރަ މަސައްކަތުން ކަމަށާއި، އެފްއޭއެމް އިން މަސައްކަތް ކުރަނީ އަންނަ އަހަރު ޓީމު އިތުރު ހަރުފަތަކަށް ގެންދިޔުމަށް ކަމަށެވެ.
ނާޒިމާ ވިދާޅުވީ، އަންހެން ޓީމު އިތުރު ހަރުފަތަކަށް ގެންދިޔުމަށް އެފްއޭއެމް އިން މަސައްކަތްތަކެއް ކުރާ ކަމަށާއި، ރަނގަޅު ތަމްރީންތަކެއް އެ ކުޅުންތެރިންނަށް ހޯދައިދޭން މަސައްކަތްކުރަމުން އަންނަ ކަމަށެވެ. އެގޮތުން ގައުމީ އަންހެން ޓީމުގެ ކޯޗިން ސްޓާފް ބަދަލުކޮށްފައިވާ ކަމަށްވެސް ނާޒިމާ ވަނީ ވިދާޅުވެފައެވެ.
ގައުމީ ޓީމުގެ ވަރަށް ރަނގަޅު ތަމްރީންތަކެއް ފެންނަމުން އަންނަ ކަމަށާއި، އެއްވެސް ޝަކުވާއެއް ނެތި ވަރަށް ފަރުވާތެރިކަމާއެކު އެ ކުޅުންތެރިން ތަމްރީންތައް ހަދަމުން އަންނަ ކަމަށް ވެސް ނާޒިމާ ވަނީ ވިދާޅުވެފައެވެ. އޭނާ ވިދާޅުވީ، މި އަހަރު ގައުމީ ޓީމުގެ އެއްވެސް މުބާރާތެއް ރޭވިފައިނުވާ ކަމަށާއި، މި އަހަރު ޓީމު އެއްކޮށް ފަރިތަކޮށް ރަނގަޅަށް ތައްޔާރުވެވިއްޖެ ނަމަ، އަންނަ އަހަރު ތަފާތު ފެނުމަކީ ދުރުގައި އޮތް ކަމެއް ނޫން ކަމަށެވެ.
އަންހެން ކުޅުންތެރިން ފެންނަލެއް މަދުކަން ފާހަގަކުރަމުން ނާޒިމާ ވިދާޅުވީ، ކުޅިވަރަކީ ހަމައެކަނި ފިރިހެނުން ކުޅޭ އެއްޗަކަށްވެފައިވާ ކަމަށާއި، އޭގެ ސަބަބުން ބައެއް ޒުވާން ހުނަރުވެރި ކުޅުންތެރިން ކުޅެން ފަސްޖެހޭ ކަމަށެވެ. އެގޮތުން ބައެއް ބެލެނިވެރިން ވެސް އަންހެން ކުދިން ކުޅިވަރު ކުޅެން ފޮނުވަން ފަސްޖެހޭ ކަމަށެވެ.
ގައުމީ އަންހެން ޓީމުގެ ކޯޗިން ސްޓާފް އެއްކޮށް ބަދަލުކޮށްފައިވާއިރު، ކޯޗަކަށް ގެނެސްފައިވަނީ ޔުނައިޓެޑް ވިކްޓްރީގެ ކުރީގެ ކޯޗު މުހައްމަދު އާތިފް (އާތީ) އެވެ.
އާތީއާ އެކު އެފްއޭއެމް އިން ހަދާފައިވަނީ ދިގު މުއްދަތެއްގެ އެއްބަސްވުމެއް ކަމަށާއި، އެފްއޭއެމް މިހާރު އޮތް ދައުރު ނިމެންދެން އޭނާ ޓީމުގެ ކޯޗުކަމުގައި ދެމިހުންނާނެ ކަމަށްއެފްއޭއެމްގެ ރައީސް ބައްސާމް އަދީލް ޖަލީލު ވަނީ ވިދާޅުވެފައެވެ.
ގައުމީ އަންހެން ޓީމާ ހަވާލުވުމަށްފަހު އާތީ ބުނީ ވަރަށް ބޮޑެތި ކުރިއެރުންތައް ޓީމަށް އައިސްފައިވާ ކަމަށާއި، އޭނާގެ ޓާގެޓަކީ އަންހެން ޓީމު ފައިނަލެއްގައި ކުޅުވުން ކަމަށެވެ. އެގޮތުން އޭނާ ބުނީ މިދިޔަ އަހަރު އަންހެން ޓީމު ސެމީފައިނަލް ކުޅެފައިވާ ކަމަށާއި، ދެން ޓީމަށް ކުރަންޖެހިފައިއޮތް ކަމަކީ ފައިނަލަކުން ފުރުސަތު ތަނަވަސްކުރުން ކަމަށެވެ.
