ޕްރިންސިޕަލުންގެ ކޮންފަރެންސްގައި ވަޒީރުގެ ބަދުބަސް ޕްރިންސިޕަލުންނަށް!
11 އޮކްޓޯބަރު 2025 | ހޮނިހިރު 13:41ޕްރިންސިޕަލުންގެ ކޮންފަރެންސް ފަށާފައި ވަނީ ހޮނިހިރު ދުވަހު ހެނދުނު
ތައުލީމީ ވަޒީރު ޑރ.އިސްމާއިލް ޝަފީއު، ޕްރިންސިޕަލުންގެ ކޮންފަރެންސް ގައި ވާހަކަ ދައްކަވަނީ
ޕްރިންސިޕަލުންގެ ކޮންފަރެންސްގައި ތައުލީމީ ވަޒީރު ޑރ.އިސްމާއިލް ޝަފީއު ޕްރިންސިޕަލުންނާއި މެދު ދެއްކެވި ވާހަކަތަކުގެ ސަބަބުން އެ މަނިކުފާނަށް ޕްރިންސިޕަލުންގެ ނުރުހުމާއި ކުރިމަތިލާން ޖެހިއްޖެއެވެ.
ޕްރިންސިޕަލުންގެ ކޮންފަރެންސް ފަށާފައި ވަނީ ހޮނިހިރު ދުވަހު ހެނދުނު އެވެ.
އެ ކޮންފަރެންސްގައި ވާހަކަދައްކަވަމުން ވަޒީރު ވިދާޅުވީ, ވިސްނާ ގައުމު ދެކެ ލޯބިވާ ރައްޔިތަކު އުފެއްދުމަކީ ތައުލީމީ ނިޒާމްގެ ތެރެއިން ވިސްނަން ޖެހޭ ކަމެއް ކަމަށާއި އެ ނޫން ގޮތަކަށް ވަށާ ޖެހޭ ތައުލީމީ ނިޒާމެއް އެކުލެވިގެން ނުދާނެ ކަަމަށެވެ. އަދި ޕްރިންސިޕަލުންގެ މިފަހަރުގެ ކޮންފަރެންސް ކުރީގެ ކޮންފަރެންސްތަކަށް ވުރެ ފުރިހަމަ ކަމަށް ދެއްކުމަށް އެ މަނިކުފާނު ވަނީ މަސައްކަތްކުރައްވާފައެވެ. ކުރިން ޕްރިންސިޕަލުން ކޮންފަރެންސް އަށް އަންނަނީ ތައްޔާރު ނުވެ ކަމަށް ދޭހަވާ މޭރުމަކުން ވާހަކަދައްކަވާފައިވެއެވެ.
މީގެ އިތުރުން މިއީ މުދައްރިސުން ބައިވެރިކޮށްގެން ޕްރިންސިޕަލުންގެ ކޮންފަރެންސް ހިންގާ ފުރަތަމަ ފަހަރު ކަމަށް ވަޒީރު ވިދާޅުވި ނަމަވެސް އެއީ ހަގީގަތާއި ޚިލާފު ވާހަަތަކެއް ކަމަށް ވަނީ މައުލޫމާތު ލިބިފައެވެ. މީގެ ކުރިން ވެސް ބައެއް ކޮންފަރެންސްތަކުގައި މުދައްރިސުން ވަނީ ބައިވެރިވެފައެވެ.
ރާއްޖޭގެ މަދަރުސާތަކުގެ ހުރިހާ ޕްރިންސިޕަލުންގެ ކޮންފަރެންސެއް ބޭއްވުމަކީ އެ ދާއިރާ އަށް ނުހަނު ބޭނުންތެރިކަމެއް ކަމަށް ވަޒީރު ވަނީ ވިދާޅުވެފައެވެ. ތައުލީމީ ދާއިރާ ކުރިއެރުވުމުގައި ވިސްނާ ފިކުރުކޮށް މިހާރު މަސައްކަތްކުރާ ގޮތަށް ވެސް ބަލާލުން މުހިންމު ކަމަށް ވެސް އެ މަނިކުފާނު ވިދާޅުވިއެވެ. ސްކޫލް ނިންމާފައި ނުކުންނަ ޒުވާނުންނަކީ އުފެއްދުންތެރި ބަޔަކަށް ހެދުމަށް ތައުލީމީ ދާއިރާގެ މުހިންމު ކަމަށް އެ މަނިކުފާނު ވަނީ އަލިއަޅުއްވާލައްވާފައެވެ.
އެހެންނަމަ ވެސް ކޮންފަރެންސް އަށް އަންނަ އިރު މީގެ ކުރިން ޕްރިންސިޕަލުން އަންނަނީ ހުސްއަތާ ކަމަށް ފާހަގަކުރައްވާ ޕްރިންސިޕަލުން ދަށްކޮށްލާ މޭރުމަކުން އެ މަނިކުފާނު ވާހަކަދައްކަވާފައިވާ ކަމަށް އެ ކޮންފަރެންސް އަށް ހާޒިރުވި ބައެއް ޕްރިންސިޕަލުންނާއި ހަވާލާދީ އިތުބާރު ހުރި މަސްދަރަކުން ފާހަގަކޮށްފައިވެއެވެ.
"ކުރީގައި ޕްރިންސިޕަލުން ވަޑައިގަންނަވާ ކޮންފަރެންސް އަށް. އެހެންނަމަވެސް ޓީޗަރުންގެ މާ ބޮޑު އިންޕުޓެއް ނޯވޭ. މި ފަހަރު ޕްރިންސިޕަލުން އައީ މުދައްރިސުންނާއި މަޝްވަރާކޮށް، މުދައްރިސުންނަށް ދިމާވާ ދަތިތައް މަޝްވަރާކޮށް، އެއީ ކްލާސްރޫމްގައި ކަމުގައި ވީ ނަމަވެސް، ކޮމިއުނިޓީ ލެވެލްގައި ކަމުގައި ވީ ނަމަވެސްމެ، ކަރިކިއުލަމް ތަންފީޒު ކުރުމުގައި ކަމުގައި ވިޔަސް އެކަންކަން ހޯދާ މަޝްވަރާކޮށްގެން އެ ބޭފުޅުންގެ ރެކޮމެންޑޭޝަންތަކަށް މި ކޮންފަރެންސްގައި އަލިއަޅުވާލާނީ." އެ މަނިކުފާނު ވިދާޅުވިއެވެ.
ޕްރިންސިޕަލުންގެ މަސައްކަތުގެ ތެރޭގައި މުދައްރިސުންނަށް ދިމާވާ ދަތިތަކާއި އުނދަނގޫތައް ދެނެގަތުމާއި މުދައްރިސުން މަސައްކަތް ކުރުމަށް ރައްކާތެރި މާހައުލެއް ލިބޭކަން ކަށަވަރުކުރުން ހިމެނެއެވެ. އެހެން އޮތްކަމެއްގައި ޕްރިންސިޕަލުން އެކަން ނުބަލާ ކަމަށް ދޭހަވާ މޭރުމަކުން ވަޒީރު ވާހަކަދެއްކެވުމަކީ އެއީ ޕްރިންސިޕަލުން ދަށްކޮށްލާ ލަދުގަންނަވާލަން މަސައްކަތް ކުރުން ކަމަށް ތައުލީމީ ދާއިރާގައި މަސައްކަތް ކުރާ ފަރާތްތަކުން ސިފަކޮށްފައިވެއެވެ.
