ވަގައް އެތެރެކޮށްފައި ހުއްޓާ ވަގަށް ނެގި ސިނގިރޭޓުގެ އަގު 100 މިލިއަނަށް އަރާ!
ގެއްލިފައިވާ ދެ ކޮންޓެއިނަރގައި ޖުމުލަ 13,600,000 ސިނގިރޭޓު ސްޓިކް ހިމެނޭ
ކަސްޓަމްސް ބިލްޑިންގެ ބޭރުން ނަގާފައިވާ ފޮޓޯ އެއް
ގެއްލުނު ސިނގިރެޓް ކޮންޓެއިނަރތައް އެތެރެކޮށްފައި ވަނީ "ބިންލާދިން ގްރޫޕް"ގެ ނަމުގައިކަމާއި އޭގެ އަގު 100 މިލިއަން ރުފިޔާ އަށް އަރާ ކަން ހާމަވެއްޖެއެވެ.
ޤާނޫނާއި ޚިލާފަށް އެތެރެކުރުމުން ކަސްޓަމްސް އިން ހިފަހައްޓާފައިވާ ދެ ސިނގެރެޓް ކޮންޓެއިނަރ ގެއްލިފައިވާ މައްސަަލަ ފެންމަތިވެފައި ވަނީ ބުރާސްފަތި ދުވަހުއެވެ. މި މައްސަލަ އަކީ ރާއްޖެ އަށް ވަގަށް އެތެރެކުރި 40 ފޫޓުގެ ދެ ކޮންޓެއިނަރގައި ހުރި 1،360 ކޭސް ސިނގިރޭޓް ގެއްލިފައިވާ މައްސަލައެކެވެ.
ގެއްލިފައިވާ ދެ ކޮންޓެއިނަރގައި ހިމެނެނީ ޖުމުލަ 13،600،000 ސިނގިރޭޓު ސްޓިކެވެ. މި ތަކެތީގެ އަގަށް ބަަލާ ނަމަ ގެއްލުނު ސިނގިރެޓްގެ ޑިއުޓީގެ ގޮތުގައި 100 މިލިއަނަށް ވުރެ ބޮޑު އަދަދެއް ދައުލަތަށް ލިބޭނެ ކަން ފާހަގަކޮށްލެވެއެވެ.
މި ކޮންޓެއިނަރތަކަކީ "ބިންލާދިން ގްރޫޕް"ގެ ނަމުގައި އެތެރެކޮށްފައިވާ އެއްޗެހިތަކެއް ކަމަށް ރާއްޖޭގެ އެހެން ބައެއް މީޑީއާ ތަކުގައި ވެސް ރިޕޯޓު ކޮށްފައި ވެއެވެ. މިކަމާއި މެދު ބަހެއް ހޯދުމަށް ކަސްޓަމްސްގެ މީޑިއާ އާއި ގުޅުމަށް ރާއްޖެއެމްވީ އިން ކުރި މަަސައްކަތް ވަނީ ކާމިޔާބުވާ ގޮތް ނުވެފައެވެ. އަދި މިކަމާއި މެދު ފުލުހުންގެ ކޮމެންޓެއް ހޯދުމަށް އެދުމުން ކޮމެންޓެއް ދޭނެ ކަމަށް ބުނި ނަމަވެސް އަދި ކޮމެންޓެއް ލިބިފަ އެއް ނުވެއެވެ.
ގެއްލިފައިވާ ސިނގިރެޓް ކޮންޓެއިނަރތައް ގެއްލިފައި ވަނީ އެމްޕީއެލް ހުޅުމާލޭ ބަނދަރުންނެވެ. ރިޕޯޓުތައް ބުނާ ގޮތުން ސިނގިރެޓްތައް އަޅާފައިވާ ދެ ކޮންޓެއިނަރު އެތެރެކޮށްފައި ވަނީ ބިންލާދިން ގްރޫޕުގެ ޕްލައިވުޑް ކޮންޓެއިނަރު ތަކެއް ކަމަށް ބުނެ އޮޅުވާލައިގެންނެވެ.
ނަމަވެސް މިކަމާއި މެދު ކަސްޓަމްސް އިން ވެސް ފުލުހުންގެ އިދާރާ އިން ވެސް އަދި އެއްޗެއް ހާމަކޮށްފައި ނުވާކަން ފާހަގަކޮށްލެވެއެވެ. މައުލޫމާތު ލިބިފައިވާ ގޮތުގައި ގެއްލިފައިވާ ދެ ކޮންޓެއިނާ އަކީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލްގެ މަސައްކަތް އަވަސް ކުރުމަށް މުދާ ގެނައި އިރު އެ މުދާތަކާއެކު ވަގަށް އެތެރެކުރި ދެ ކޮންޓެއިނަރެވެ. އަދި މި ސިނގިރެޓްތައް ހިފެހެއްޓީ އެޕްރީލް މަހުގައެވެ.
