މާލޭގެ މޭޔަރަކަށް މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނެވި ދުވަސްވަރު، މާލޭ ރޯމަސް މާރުކޭޓް ކުއްޔަށް ދިނުމާއި އެތަނާއި ގުޅުންހުރި ގިނަ މުއާމަލާތްތައް ހިންގާފައިވަނީ ގާނޫނާއި ގަވާއިދާ ހިލާފަށް ވަކި ބަޔަކަށް މަންފާ ލިބޭގޮތަށް ނުވަތަ މި ކަމުގައި ރިޝްވަތުގެ އެތައް ކަމެއް ހިނގާފައިވާކަން މިހާތަނަށް އެނގެން އެބައޮތެވެ. ސާފު ހުދު ފޮތިކޮޅެއްކަމަށް ދައްކަވަން މަސައްކަތް ކުރާ މުއިއްޒުގެ ފަސްބައިގައި ކިލަނބު ހޭކުނު މިއީ ފުރަތަމަ ފަހަރެއްވެސް ނޫނެެވެ. ހައުސިންގ މިނިސްޓަރުކަމުގައި ހުންނެވި ދުވަސްވަރުން ފެށިގެން އެކި ތުހުމަތުތަކެއް އަންނަނީ ކުރެވެމުންނެވެ.

މި މައްސަލައިގެ އެކި ހިސާބަށް ބަލާލާއިރު މޭޔަރުކަމުގައު ހުންނަވައިގެން ރޯމަސް މާރުކޭޓު ކުއްޔަށް ދޫކޮށްފައިވަނީ ބިޑު ކޮމިޓީން ނިންމި ގޮތާ ހިލާފަށެވެ. މާރުކޭޓު ހަވާލުކޮށްފައިވަނީ ލ. ފޮނަދޫ މީހެއްގެ ނަމުގައި ރަޖިސްޓްރީކޮށްފައިވާ އެފްޖޭ ޑިޒައިން ކިޔާ ކުންފުންޏަކާއެވެ. ބިޑު ކޮމިޓީން ނިންމާފައިވަނީ މަހަކު 130،000 ރުފިޔާއަށް މާރުކޭޓު ކުއްޔަށް ދިނުމަށެވެ. ނަމަވެސް އެއްބަސްވުން ހަދާފައިވަނީ މަހަކު 70،000 ރުފިޔާއަށެވެ. ނުވިތާކަށް ބިލްތައް ނުދައްކާ އެ ބިލްތަކަށް 437،000 ރުފިޔާއަށް ވުރެ ރުފިޔާ އެބަހުއްޓެވެ.

ދެވަނަ ކަމަކީ މުއިއްޒުގެ މޭޔަރު ކަމުގައި އެއްބަސްވުމެއް ނެތި މަސް މާރުކޭޓުގެ ފިހާރަތަކެއް ދޫކުރި މައްސަލައެއް ފެންމަތިވެފައިވެ އެވެ. މުއިއްޒު މާލެ ސިޓީ މޭޔަރުކަމުގައި ހުންނެވި ދުވަސްވަރު، މާލޭ ރޯމަސް މާރުކޭޓު މަތިން އެއްވެސް އެއްބަސްވުމަކާއި ނުލައި ތިން ފިހާރަ އަކާއި ލޭބާ ކުއާޓާއެއް ދޫކުރިއެވެ. ސިޓީ ކައުންސިލްގެ ހާބާ އެންޑް މާކެޓު މެނޭޖްމަންޓު ސެކްޝަނުން ހިންގި އިންސްޕެކްޝަނުގައި މާރުކޭޓު އިމާރާތުގެ ފުރަތަމަ ފަންގިފިލާ އަދި ދެވަނަ ފަންގިފިލާގައި ހުންނަ ހުސް ޖާގަތައް ކުއްޔަށް ދޫކޮށްފައިވާ ގޮތާއި، ކުލި ދައްކަމުންދޭތޯ ބެލި އިރު ފުރަތަމަ ފަންގިފިލާގެ ތިން ފިހާރައަކާއި ދެވަނަ ފަންގިފިލާގެ އެއް ފިހާރަ ހިންގަމުން ގެންދަނީ އެއްވެސް އެއްބަސްވުމަކާ ނުލައެވެ. އަދި މި ތަންތަނުން ކުލި ވެސް ދައްކަމުން ނުދާކަން މާރުކޭޓު ސެކްޝަނުން ކައުންސިލް ބިއުރޯއަށް ފޮނުވި މެމޯއިން ހާމަވެފައި ވެއެވެ.

މީގެ އިތުރުން މޭޔަރުކަމުގައި ހުންނަވައިގެން މަސްމާރުކޭޓް ތަރައްގީކުރުމުގެ ނަމުގައި 6.1 މިލިއަން ޑޮލަރަށް މަޝްރޫއެއް ހަވާލުކުރިއެވެ. އަދި ރައީސް ކަމަށް ވަޑައިގަންނަވަން މޭޔަރުކަމުން އިސްތިއުފާ ދެއްވި ދުވަސްކޮޅު މި އެއްބަސްވުން އެހެން ފަރާތަކާއެކު ހެދުމަށްފަހު 9.5 މިލިއަން ޑޮލަރަށް އަގު މަތިކުރިއެވެ. އެކަން ކުރީ ކިހިނެއް ކޮން އިރަކުކަމެއްވެސް ބަޔަކަށް ރޭކާ ނުލައެވެ. ކޮންމެއަކަށް ސިޓީ ކައުންސިލްގައި މޭޔަރުކަމުގައު ހުންނަވާ ކޮރަޕްޝަނާއި ނާޖާއިޒު ފައިދާ ހޯދުމަށް މުއިއްޒު ކަންކަން ކުރެއްވި ކަމަށް ދެކެވޭ ވާހަކަތަށް މި ކަންކަމުން ބާރު ލިބިގެންދެއެވެ.

ޕާކިން ސްލޮޓްތައް ވިއްކާ އެއިން ކަޓް ނެގި ވާހަކައާއި، ސިޓީ ކައުންސިލްގެ ޕްރޮޖެކްޓްތައް ހަވާލުކޮށް އެއިން ކަޓް ނެގި ވާހަކައަކީ އާ ވާހަކައެއް ނޫނެވެ. މިއީ ކުރިންވެސް ދެކެވިފައި ހުރި ވާހަކަތެކެވެ. ސިޓީ ކައުންސިލްގައި ތިބި ޕީއެންސީގެ ކައުންސިލަރުންނާއި ގުޅިގެން ބޮޑެތި ޖަރީމާތައް ހިންގި ވާހަކައެވެ. މިއަދު މި ފެންނަނީ މުއިއްޒު ނެތް ނަމަވެސް އެ ޖަރީމާތަކުގައި މަތިޖަހަން އަދިވެސް އެއްކަލަ ޕީއެންސީގެ ކައުންސިލަރުން އަވަދިނެތި އުޅޭތަނެވެ.

މަސްމާރުކޭޓާއި ގުޅުންހުރި މައްސަލަ ބެލުމަށް ސިޓީ ކައުންސިލްގައި ބައްދަލުވުން ތާވަލުކުރި ނަމަވެސް ޕީއެންސީ ކައުންސިލަރުން ހާޒިރު ނުވެ ކޮންމެ ފަހަރަކު މި ޖެހެނީ ޖަލްސާތައް ކެންސަލް ކުރާށެވެ. އެންމެ ސަބަބެއް އޮވެގެންނެވެ. އެއީ އެޖެންޑާގައި މަސް މާރުކޭޓް ކުއްޔަށް ދިނުމުގެ މައްސަލަ އޮވެގެންނެވެ. 3 ފަހަރު މަތިން މި ބައްދަލުވުން ނުބޭއްވި ޕީއެންސީ ކައުންސިލަރުންގެ ނުފޫޒުން ކައުންސިލްގެ މަސައްކަތްވެސް އޮތީ މިހާރު ހުއްޓުމަކަށް އައިސްފައެވެ.

މާލޭ މަސްމާރުކޭޓު ތަރައްގީކުރުމުގެ މަޝްރޫޢުއާ ގުޅިގެން ދައުލަތުގެ މާލިއްޔަތު ގާނޫނާ ހިލާފަށް ދެ އެއްބަސްވުމެއް ހަދާފައިވާ މައްސަލަ ބެލުމަށް، ކައުންސިލުގެ ލީގަލް ސެކްޝަންގެ ވެރިޔާ އަލީ ނަސީރު ގާސިމް ޖަލްސާއަށް ހާޒިރުކުރަން އެދި ހުށަހެޅި ތިން ޖަލްސާވެސް ކޯރަމް ހަމަނުވެގެން ކެންސަލް ކުރި އިރު މި ޖަލްސާތަކަށް ހާޒިރުނުވީ އެއިރު މުއިއްޒުގެ އަރިހުގައި ވަފާތެރިކަމާއެކު ކަންކަމުގައި މަތިޖަހަން ތިބި ޕީއެންސީގެ ކައުންސިލް މެންބަރުންނެވެ.

އެންމެ ފަހުން ބޭއްވި ޖަލްސާގައި ވެސް ފެނުނީ މިފަދަ މަންޒަރެކެވެ. މަސް މާރުކޭޓު މައްސަލަ އޮތުމުން ޕީއެންސީ ކައުންސިލަރުން ގަވާއިދާ ހިލާފަށް އެޖެންޑާ ފާސްނުކޮށް ކައުންސިލް ޖަލްސާ ނިންމާލީއެވެ. 3 ޖަލްސާއަށްފަހު ކޯރަމް ހަމަވި ޖަލްސާގައި ޕީއެންސީ ކައުންސިލަރު ލޮޅު ދެކުނު ދާއިރާގެ ޕީއެންސީ މެންބަރު އިބްރާހިމް މުހައްމަދު އެދުނީ މަސް މާރުކޭޓު މައްސަލަ އެޖެންޑާއިން އުނިކުރުމަށެވެ. ހެންވޭރު ހުޅަނގު ދާއިރާގެ ޕީއެންސީ މެންބަރު ފާތިމަތު ޝައުފާ ސަލީމް އެޖެންޑާއިން އުނިކުރަން ހުށަހެޅީ މާލޭގެ ބިންތަކުގެ ތަފްސީލުތަކުގެ މައްސަލައެވެ. މީގެ އިތުރުން ކައުންސިލުން ކުރާ ދަތުރުތައް ގާނޫނާ ގަވާއިދުތަކާ ހިލާފު ކަމަށް ބުނެ ހުށަހަޅާފައިވާ މައްސަލަ އުނިކުރަން ވެސް ހުށަހެޅި އެވެ. އެ މައްސަލަ އުނިކުރަން ހުށަހެޅުއްވީ ހުޅުމާލެ ދާއިރާގެ ޕީއެންސީ މެންބަރު އަލީ އައިމަންއެވެ.

ކޮންމެއަކަށް ޕީއެންސީގެ ކައުންސިލަރުންނާއި، މުއިއްޒުގެ މޭޔަރުކަމުގައި ހަދާފައިވާ ގޯސްތަކާއި ސިޓީ ކައުންސިލްގެ ފައިސާ ހަރަދުކުރިގޮތް މި ކަންކަމުން އެނގިދާނެތީ ޕީއެންސީގެ ކައުންސިލް މެންބަރުން ދަނީ ޖަލްސާތައް ނުބޭއްވޭނެ ގޮތަކަށް މަސައްކަތް ކުރަމުންނެވެ. ކެޔޮކެއިވަރު އިނގޭނީ ބިތު ފަންގި ނެގީމާއޭ ބުނާ އުސޫލުން ކަންކަން ތިލަވެ ހާމަވާން ފެށުމުން ކަންކަމުގައި މަތިޖަހަން މަސައްކަތް މިކުރަނީ ކޮރަޕްޝަނާއި ދެކޮޅުކަމަށް ވަކާލާތުކުރާ މީހުންނެވެ.

ފޮރުވަން މިއުޅެނީ މޭޔަރުކަމުގައި މުއިއްޒު މާލޭގެ މަސް މާރުކޭޓް ކުއްޔަށްދިން ގޮތާއި އޭގެ ހަގީގަތް ހާމަވެދާނެތީއެވެ. ފޮރުވަން މަސައްކަތް މިކުރަނީ މޭޔަރުކަމުން ރައީސްކަމަށް ވަޑައިގަތުމުގެ ތެރޭގައި މާލޭގެ މަސްމާރުކޭޓު ހެދުމުގެ އެއްބަސްވުމުގެ އަގު އެތައް މިލިއަން ޑޮލަރަކުން ބޮޑުވި މައްސަލައެވެ. ފޮރުވަން މިއުޅެނީ މަސްމާރުކޭޓުގެ ފިހާރަތަކާއި ލޭބަރ ކުއާޓާއެއް ހިލޭ ބަޔަކަށް ދިން މައްސަލައެވެ. ފޮރުވަން މި އުޅެނީ މުއިއްޒު މޭޔަރުކަމުގައި ހުންނަވައިގެން ހޭވި ހަޑިއެވެ.