ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަޙުމަދު ސައީދު މުޙައްމަދުގެ މައްޗަށް ކުރި ޙުކުމަކީ، ސެލެކްޓިވްކޮށް ވަކި ބަޔަކަށް އަމާޒުކޮށްގެން ކުރި ޙުކުމެއް ކަމަށް، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ޤާނޫނީ ވަކީލުންގެ ޓީމުގެ ފަރާތުން ބުނެފި އެވެ.

އެމްޑީޕީގެ ޤާނޫނީ ވަކީލުންގެ ފަރާތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަަމުން، އެމްޑީޕީ ގެ ލީގަލް ޑިރަކްޓަރ އަޙުމަދު މައުރޫފް ވިދާޅުވީ، ސައީދުގެ މައްޗަށް ޙުކުމް ކޮށްފައިވާއިރު، އެ ޙާލަތުގައި ހުރި ބައިވަރު މައްސަލަތައް ހުރި ކަމަށެވެ. އެގޮތުން ޕްރޮސެކިއުޓާ ޖެނަރަލްގެ އޮފީހުން ދައުވާ ކޮށްދިނުމަށް އެދި، އެތައް މައްސަލައެއް ކޯޓަށް ފޮނުވާފައިވާ ކަމަށް މައުރޫފް ވިދާޅުވި އެވެ.

އެހެން ނަމަވެސް، އެ މައްސަލަތައް ކުރިއަށް ނުދާކަން ފާހަގަކޮށް މައުރޫފް ވިދާޅުވީ، ކޯޓަށް ހުށަހެޅި ވަކި ހިސާބަކުން ހުއްޓިފައިވާ ބައިވަރު މައްސަލަތައް ވެސް ހުރި ކަމަށެވެ. އެ މައްސަލަތައް އެހެން ހުރިއިރު، ސައީދުގެ މައްޗަށް ހުށަހެޅި މައްސަލަ އަކީ އޭގެ މާފަހުން ހުށަހަޅާފައިވާ މައްސަލައެއް ކަމަށާއި، އެ މައްސަލައިގެ އަޑު އެހުންތައް ވަރަށް އަވަހަށް ބާއްވައި، އަދި ޙުކުމް ކޮށްފައިވާ ކަމަށް މައުރޫފް ވަނީ ވިދާޅުވެފަ އެވެ.

މައުރޫފް ވިދާޅުވީ ސެލެކްޓިވްކޮށް ވަކި ބަޔަކަށް ވީމާ، ނުވަތަ ވަކި މީހަކަށް ވީމާ އަވަހަކަށް ޙުކުމެއް ކުރުމުގެ ބޭނުމުގައި، ނުވަތަ ބޮޑު ޙުކުމެއް ކުރުމުގެ ބޭނުމުގައި، ނުވަތަ ވަކި ދުވަހަކާ ދިމާކޮށް އެމްޑީޕީގެ ފަރާތްތަކަށް، ނުވަތަ އެމްޑީޕީ އަށް ނިސްބަތްވާ ފަރާތްތަކަށް ޙުކުމެއް ކުރުމުގެ ބޭނުމުގައި ކުރެވިގެން ދިޔަ ޙުކުމެއް ކަމަށެވެ.

މައުރޫފް ވިދާޅުވީ، ކަނޑައެޅިގެން ފެންނަން އޮތް މައްސަލައެއްގައި ވަކިގޮތަކަށް ނިންމަން ވެގެން ސަރުކާރުން އަންގައިގެން ކުރި ހުކުމެއް ކަމަށާއި، މިއީ ސީދާ ރައީސުލްޖުމްހޫރިއްޔާގެ ހުކުމެއް ކަމަށެވެ.

މީގެ އިތުރުން މައުރޫފް ވިދާޅުވީ، މިފަދަ އެެހެން މައްސަލަތައް ވެސް ކުރިއަށް ނުގޮސް އޮތް ކަމަށެެވެ. އެގޮތުން މިހާރުގެ ރައީސް ޑޮކްޓަރު މުޙައްމަދު މުޢިއްޒު، މާލޭ ސިޓީ ކައުންސިލްގެ މޭޔަރަށް ހުންނެވިއިރު މަސް މާރުކޭޓު ކުއްޔަށް ދިނުމުގެ މައްސަލައިގައި އަމަލު ކުރެއްވި ގޮތް ބަލަން ކަމާ ބެހޭ އިދާރާތަކަށް ފޮނުވުމަށް ފާސް ކުރުމަށް މިހާރުގެ މޭޔަރު ދެ ބައްދަލުވުން ބާއްވަން މަސައްކަތް ކުރި ނަމަވެސް، އެ ބައްދަލުވުމުގެ ކޯރަމް ހަމަވާ ގޮތް ނުވާ ކަމަށެވެ.

އެކަން ފާހަގަ ކުރައްވައި މައުރޫފް ވިދާޅުވީ، ސިޓީ ކައުންސިލްގައި ތިއްބެވީ ރައީސް މުޢިއްޒުއާ ގާތް ބޭފުޅުން ކަމަށެވެ. އެހެންވީމާ، ދައުލަތުން އަދި ސަރުކާރުން ވެސް، އިންސާފުވެރިކޮށް މައްސަލަ ބަލަން އެދޭ ކަަމަށާއި، އިންސާފުވެރިކަމާ އެކު އެންމެންގެ މައްސަލަތައް ވެސް ބަލަން އެދޭ ކަމަށެވެ. ޚާއްސަކޮށް މިހާރުގެ ރައީސް ޑޮކްޓަރު މުޢިއްޒުއާ ގުޅޭ އެތައް މައްސަލައެއް އޮތްއިރު، އެ މައްސަލަ ތަހުގީގު ކުރިޔަ ނުދީ ހިފަހައްޓައިގެން، ސިޔާސީ ގޮތުން ޖުޑިޝަރީ އަށް ނުފޫޒު ފޯރުވައިގެން ސިޔާސީ ޙުކުމްތަކެއް ނެރެމުން އަންނަ ކަމަށެވެ.

އެމްޑީޕީ ސަރުކާރުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރަކަށް ހުންނެވި ސައީދުގެ މައްޗަށް، ކްރިމިނަލް ކޯޓުން ޙުކުމް ކޮށްފައި ވަނީ އާދިއްތަ ދުވަހު އެވެ. ސައީދުގެ މައްޗަށް އެއް އަހަރާއި، ހަތް މަސް ދުވަހުގެ ޙުކުމެއް އިއްވައި ދިނުމަށް ދައުލަތުން އެދިފައި ވީ ނަމަވެސް، މައްސަލަ ބެއްލެވި ޣާޒީ ވަނީ ސައީދުގެ މައްޗަށް ހަތަރު އަހަރު ދުވަހުގެ ޖަލު ޙުކުމެއް އިއްވައިފަ އެވެ.