ހިތަދޫ ޕޯޓް އިން ކްލިއަރ ކުރަން އުޅުނު ގިނަ އަދަދެއްގެ ރެޑްބުލް އާއި ސިނގްރޭޓް ހިފަހައްޓައިފި

ހިތަދޫ ޕޯޓްއިން ކްލިއަރ ކުރަން އުޅުނު ގިނަ އަދަދެއްގެ ރެޑްބުލްއާއި ސިނގްރޭޓް ކަސްޓަމްސް އިން ހިފަހައްޓައިފި އެވެ.

ރާއްޖެއެމްވީއަށް މައުލޫމާތުލިބިފައިވާ ގޮތުގައި ކްލިއަރ ކުރަން އުޅުނު ކޮންޓެއިނަރ އަކުން ގިނަ އަދަދެއްގެ ރެޑްބުލް އަދި ސިނގިރޭޓް ވަގަށް އެތެރެކުރަން އުޅެނިކޮށް، ކަސްޓަމްސް އިން ހިފަހައްޓާފައިވާ ކަމަށެ އެވެ.

މިކަން ހިނގާފައިވަނީ ބުދަ ދުވަހު ހެނދުނު 10:30 އެހާކަންހާއިރު އެވެ. ނަމަވެސް ހިފަހައްޓާފައިވަނީ ކިހާ އަދަދެއްގެ ރެޑްބުލް އަދި ސިނގިރޭޓްއެއް ކަމެއް އެނގިފައެއް ނުވެއެވެ.

މިކަމާއި ގުޅޭ އިތުރު މައުލޫމާތެއް ކަސްޓަމްސް އިންވެސް އަދި ފުލުހުންވެސް ހާމަކޮށްފައެއް ނުވެ އެވެ.

މީގެ ކުރިންވެސް މިފަދަ މައްސަލަތަކެއް ފެންމަތިވެ ވަނީ ކޯޓުން ހުކުމް ވެސްކޮށްފައެވެ. އެގޮތުން މި ސެޕްޓެމްބަރު މަހުގެ ތެރޭގައިވަނީ ރާއްޖެއަށް އެތެރެކޮށް، ޑިއުޓީ ނުދައްކައި ކަސްޓަމްސްއަށް ސިއްރުން ސިނގިރޭޓް ބޭރުކޮށްފައިވާ މައްސަލައެއްގައި އޭގެ ޑިއުޓީގެ ގޮތުގައި 20 މިލިއަނަށް ވުރެ ގިނަ ރުފިޔާ ދެއްކުމަށް އަމިއްލަ ކުންފުންޏަކަށް ސިވިލް ކޯޓުން ހުކުމްކޮށްފަ އެވެ.

މި މައްސަލައަކީ 2018 ވަނަ އަހަރުގެ އޭޕްރީލް 27 އަދި ޖޫން 4 ގައި ރާއްޖެއަށް އެތެރެކޮށްފައިވާ ސިނގިރޭޓަށް ޑިއުޓީ ނުދައްކައި ބޭރުކުރި މައްސަލައިގައި މޯލްޑިވްސް ކަސްޓަމްސް ސާވިސްއިން ހުށަހަޅާފައިވާ މައްސަލައެކެވެ.