އާއްމުކޮށް ރައީސް މުޢިއްޒު ދޮގު ހައްދަވާ އުސޫލުން ކަނޑައެޅިގެން ދޮގު ހައްދަވައިފި ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

މިހާރު ޕްރޮޖެކްޓްތައް ހުއްޓިފައިވަނީ 2024 ގައި އެ މަސައްކަތްތައް ކުރިއަށް ގެންދެވޭ ވަރަށް ބަޖެޓު ނެތުމުގެ ސަބަބުން ކަމަށް ވިދާޅުވެ ރައީސް މުޢިއްޒު ދެއްކެވި ވާހަކަފުޅަށް ރައްދުދެއްވާ އަމީރު ވިދާޅުވީ، 2023 ވަނަ އަހަރާއި އޭގެ ކުރީގެ އަހަރުތަކުގައިވެސް ހުރިހާ ޕްރޮޖެކްޓްތަކެއްގެ ޓެންޑަރ މަރުހަލާ ކުރިއަށް ގެންގޮސްފައިވަނީ ރައްޔިތުންގެ މަޖިލީހުން ފާސްކުރި ބަޖެޓާ އެއްގޮތަށް ކަމަށެވެ.

2023 ވަނަ އަހަރު އެވޯޑްކުރެވުނު ޕްރޮޖެކްޓްތަކުގެ މަޢުލޫމާތު މިހާރުވެސް ފިނޭންސް މިނިސްޓްރީގެ ވެބްސައިޓުން ފެންނަން ހުރި ކަމަށް އަމީރު ފާހަގަކުރެއްވިއެވެ. މިގޮތުން 2023 ވަނަ އަހަރު ޖުމްލަ 202 ޕްރޮޖެކްޓް އެވޯޑްކުރެވުނު ކަމަށާއި، އޭގެ ތެރެއިން 103 ޕްރޮޖެކްޓް އެވޯޑްކުރެވިފައިވަނީ ޖުލައިން ފެށިގެން ނޮވެމްބަރާ ހަމައަށް ކަމަށް އެމަނިކުފާނު ވިދާޅުވިއެވެ.

އަމީރު އިތުރަށް ވިދާޅުވި ގޮތުގައި، ޕްރޮޖެކްޓެއް އެވޯޑްކުރުމާ ހަމައަށް ދަނީ ގިނަ މަރުހަލާތަކެއް ކަޑައްތުކުރުމަށްފަހުގައެވެ. މިސާލަކަށް 2023 ވަނަ އަހަރުގެ ޖަނަވަރީ މަހު އެވޯޑްކުރެވުނު 31 ޕްރޮޖެކްޓުގެ ތެރެއިން ގިނަ ޕްރޮޖެކްޓްތަކަކީ 2022 ވަނަ އަހަރު ޓެންޑަރ މަރުހަލާ ފެށިފައިވާ ޕްރޮޖެކްޓްތަކެއް ކަމަށް އަމީރު ވިދާޅުވި އެވެ.

އެޑްވާންސް ޕޭމަންޓްތައްވެސް ދޫކުރެވިފައިވަނީ މާލިއްޔަތު ޤާނޫނާއި ގަވާއިދާ އެއްގޮތަށް ކަމަށް އަމީރު ވިދާޅުވިއެވެ. އަދި 2019 އިން 2023 އަށް، ދަތިތަކާއެކުވެސް ޕްރޮޖެކްޓްތައް ހިންގިފައިވާ ކަމަށާއި، އެ ބަޖެޓްތައްވެސް ފާސްކުރެވިފައިވަނީ 2024 ވަނަ އަހަރުގެ ބަޖެޓް އެކުލަވާލެވުނު އުސޫލުން ކަމަށް އަމީރު ފާހަގަކުރެއްވިއެވެ.

އަމީރު އިތުރަށް ފާހަގަކުރެއްވި ގޮތުގައި، 2023 ވަނަ އަހަރުގެ ޓްރާންޒިޝަން މުއްދަތުގައި އައު ސަރުކާރުގެ ޓީމަށް 2024 ވަނަ އަހަރުގެ ބަޖެޓް އެކުލަވާލުމަށް ފުރިހަމަ ފުރުސަތު ދެވިފައިވާނެއެވެ. އަދި އޮކްޓޯބަރު އަދި ނޮވެމްބަރު މަހު އެވޯޑްކުރެވުނު ޕްރޮޖެކްޓްތަކަކީވެސް ބަޖެޓުގައިވާ ގޮތަށް، އޭގެ އެތައް މަހެއް ކުރިން ޓެންޑަރ މަރުހަލާ ފެށިފައިވާ ޕްރޮޖެކްޓްތަކެއް ކަމުގައި އަމީރު ވިދާޅުވިއެވެ.

ފާހަގަކޮށްލެވޭ ގޮތުގައި އަތޮޅުތެރޭގައި ފަށާފައިވާ ގިން މަޝްރޫޢުތަކެއް ހުއްޓި އާމުންގެ ޝަކުވާ ވަނީ ވަރަށް ބޮޑުވެފަ އެވެ. އެ ރައްޔިތުންނަށް ދޭނެ ޖަވާބެއް ނެތި ރައީސް މުޢިއްޒު އެ ރައްޔިތުން ކައިރިއަށް ވަޑައިގެން ދައްކަވާފައިވާ ވާހަކަ ފުޅުތަކަށް ގިނަބަޔަކު އަންނަނީ ފަޑު ކިޔަމުންނެވެ.

ރައީސް ސާލިހްގެ ސަރުކާރުން ފަށާފައިވާ މަޝްރޫއުތައް ނިންމައި ހުޅުވާފައިވަނިކޮށް އެތަންތަނުގެ މަސައްކަތް ނިންމައިދޭނެ ކަމަށާއި ވީހާވެސް އަވަހަކަށް ހުޅުއްވައިދެއްވާނެ ކަމަށް ވިދާޅުވެ އެމަނިކުފާނު އަންނަނީ ވާހަކަ ދައްކަވަމުންނެވެ. އާންމު ރައްޔިތުން ފާހަގަކުރާ ގޮތުގައި ރައީސް މުޢިއްޒު އެ ރައްރަށަށް ވަޑައިގަންނަވާއިރު އެމަނިކުފާނަށް އެރަށްރަށުގައި ނިމިފައިވާ ޕްރޮޖެކްޓެއް އަދި ކުރިއަށް ނުގޮސް ހުއްޓިފައިވާ ޕްރޮޖެކްޓެއް އެނގިވަޑައި ނުގަންނަވަ އެވެ.