އިދިކޮޅު މެމްބަރުން މުޒާހަރާ ކުރަނިކޮށް މީޑިއާ ނެތިކޮށްލާ ބިލު ފާސްކުރަން ބާއްވާ ޖަލްސާ ފަށައިފި
މިނިވަން މީޑިއާ ނެތިކޮށްލުމަށް ބިލެއް ފާސްކުރަން ބާއްވާ މަޖިލީހުގެ ޖަލްސާ، އިދިކޮޅު މެންބަރުންގެ މުޒާހަރާ ކުރަނިށް ވަނީ ފަށާފަ
އަންގާރަ ދުވަހު ދައުރުން ބޭރުން ބާއްވާ މަޖިލިސް ޖަލްސާގެ ތެރެއިން
މިނިވަން މީޑިއާ ނެތިކޮށްލުމަށްޓަކައި ބިލެއް ފާސް ކުރަން ބާއްވާ މަޖިލީހުގެ ޖަލްސާ، މަޖިލީހުގައި ތިއްބެވި އިދިކޮޅު މެންބަރުން މުޒާހަރާ ކުރަނިކޮށް ފަށައިފި އެވެ.
މަޖިލީހުގެ ގަވާއިދު ބުނާ ގޮތުން ޖަލްސާ ބާއްވާ ގަޑިއަށް ވުރެ ހަ ގަޑިއިރު ކުރިން މެންބަރުންނަށް އެޖެންޑާ ފޮނުވަން ޖެހެ އެވެ. އެކަމަކު އެ ޖަލްސާގެ އެޖެންޑާ ނެރުނީ މިއަދު ހަވީރު 5:00 ގެ ފަހުންނެވެ.
މަޖިލީހުގެ އެޖެންޑާ އިއުލާނު ކުރިއިރު، ޖަލްސާގެ އެޖެންޑާގައި އޮތީ މީޑިއާ ނައްތާލާ ބިލުގެ ވާހަކަ އެކަންޏެވެ.
ޖަލްސާ މިހާރު ފަށާފައިވާއިރު ބިލާ ދެކޮޅަށް އިދިކޮޅު މެންބަރުން ދަނީ މަޖިލީހުގެ ތަޅުމުގައި މުޒާހަރާ ކުރަމުންނެވެ. މުޒާހަރާ ކުރާ މެންބަރުން ނަންތައް ރިޔާސަތުން ދަނީ އިއްވަމުންނެވެ.
މިނިވަން މީޑިއާ ނެތިކޮށްލާ ބިލާ ދެކޮޅަށް އަންގާރަ ދުވަހު ހެނދުނުން ފެށިގެން ނޫސްވެރިން ދަނީ މަޖިލިސް ކައިރި މުޒާހަރާ ކުރަމުންނެވެ. އެ މުޒާހަރާ ހުއްޓުވުމަށް ފުލުހުން ދަނީ ގަދަބާރުން ނޫސްވެރިން އެ ސަރަހައްދުން ބޭރު ކުރަމުންނެވެ. އެގޮތުން ނޫސްވެރިން ހިމެނޭ ގޮތަށް އެތަށް ބަޔަކަށް ފުލުހުން ވަނީ އނަިޔާ ވެސް ކޮށްފަ އެވެ.
އެ މުޒާހަރާގެ ތެރެއިން ފުލުހުން ވަނީ އަދަދު ގެ ނޫސްވެރިޔާ ލީވާން އަލީ ނާސިރު އަނިޔާވެރިކޮށް ހައްޔަރުކޮށްފަ އެވެ. އޭނާ ހައްޔަރުކޮށް ބަހައްޓާފައި ހުރި ތަނެއް ފުލުހުން ނުބުނެ އެވެ.
މިނިވަން މީޑިއާ ނެތިކޮށްލާ ބިލު ފާސް ކުރަން ސަރުކާރުން މަސައްކަތް ކުރަމުންދާއިރު، ބިލާ ދެކޮޅަށް މަސައްކަތް ކުރާ ބައެއް ނޫސްވެރިންނަށް ވަނީ މަރުގެ އިންޒާރު ލިބިފަ އެވެ.
މަރުގެ އިންޒާރު ލިބިފައިވާ ނޫސްވެރިންގެ ތެރޭގައި އަދަދު ނޫހުގެ އަހުމަދު އާއިދު އާއި މުހައްމަދު ޝަހުޒާން އާއި ދައުރު ނޫހުގެ އަހުމަދު ނާއިފް ހިމެނެ އެވެ.
މަޖިލީހުގެ ޖަލްސާ ކުރިޔަށް ދާއިރު، ނޫސްވެރިން ވެސް ދަނީ މެދު ނުކެނޑި މަޖިލިސް ބޭރުގައި މީޑިއާ ބިލް ބޭރުކުރުމަށް ގޮވާލާ އަށު އުފުލަމުންނެވެ.
