"ހިޔާލާއި ފިކުރު ކަފުނަށް" ނަމުގައި މިރޭ އާޓިފިޝަލް ބީޗުގައި އޮންނަ ފޯރަމަށް ވީހާވެސް ގިނަ އާންމުން ބައިވެރިވުމަށް ގޮވާލައިފި
އެމްޖޭއޭ އިން އާޓިފިޝަލް ބީޗުގައި ހިޔާލާއި ފިކުރު ކަފުނަށް ނަމުގައި ފޯރަމެއް ބާއްވާއިރު ގިނަ އަދަދެއްގެ އާންމުން ބައިވެރިވުމަށް ވަނީ އިލްތިމާސްކޮށްފަ
މިރޭގެ ފޯރަމްއާއި ގުޅޭގޮތުން މައުލޫމާތު ދިނުމަށް ނޫސްވެރިން ބޭއްވި ނޫސްވެރިންގެ ބައްދަލުވުމުގެ ތެރެއިން: ވީހާވެސް ގިނަ އާންމުން މި ފޯރަމުގައި ބައިވެރިވުމަށް ވަނީ ގޮވާލާފަ
މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން އިސްނަގައިގެން މިރޭ 8:45 ގައި އާޓިފިޝަލް ބީޗުގައި "ހިޔާލާއި ފިކުރު ކަފުނަށް" ނަމުގައި ބާއްވާ ފޯރަމަށް ވީހާވެސް ގިނަ އާންމުން ބައިވެރިވުމަށް ގޮވާލައިފި އެވެ.
މި ފޯރަމްގެ އެންމެ ފަހުގެ މައުލޫމާތު އާންމުންނަށް ހިއްސާކުރުމަށް އަޓިފިޝަލް ބީޗުގައި ބޭއްވި ނޫސްވެރިންގެ ބައްދަލުވުމުގައި އެމްޖޭއޭ އިން ހާމަކުރި ގޮތުގައި، މި ފޯރަމްގައި "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލް" ގައި ހުރި ކަންބޮޑުވުންތައް ރައްޔިތުންނަށް ކިޔައިދީ، އެކަމާ ގުޅޭ ގޮތުން އުފެދޭ ސުވާލުތަކަށް ޖަވާބު ދެވޭނެ އެވެ.
އެމްޖޭއޭގެ ކުރިއަށް އޮތް ދައުރުގެ ނައިބްރައީސް ޝަހުޒާން ވިދާޅުވި ގޮތުގައި، މީޑިއާ ކޮންޓްރޯލް ކުރާ ބިލާމެދު އާންމުން ހޭލުންތެރިކުރުވުމުގެ މަސައްކަތަށް ފާހަގަކުރެވޭ މިންވަރަށް ތާއީދު ލިބެމުންދެއެވެ. އަދި ބިލުގައި އޮތް އެއްޗެއް ނޭނގެނީ ސަރުކާރުގެ އިސްބޭފުޅުންނާއި ބިލުގެ މަސައްކަތް މަޖިލީހުގައި ކުރާ ކޮމިޓީގެ މެންބަރުންނަށް ކަމަށްވެސް އޭނާ ފާހަގަކުރެއްވި އެވެ.
އެމްޖޭއޭގެ ކުރިޔަށް އޮތް ދައުރުގެ ރައީސް އަދި ދައުރުގެ ނޫސްވެރިޔާ އަހްމަދު ނާއިފް ވިދާޅުވި ގޮތުގައި، މި ބިލުގެ ސަބަބުން އަސަރުކުރާނީ ހަމައެކަނި ނޫސްވެރިންނަކަށް ނޫނެވެ. ސޯޝަލް މީޑިއާ ޕްލެޓްފޯމްތައް ބޭނުންކުރާ ހުރިހާ ފަރާތްތަކަށްވެސް މި ބިލުގެ އަސަރު ފޯރާނެ އެވެ.
މި ބިލުގެ ސަބަބުން ރައްޔިތުންނަށް ސައްހަ މައުލޫމާތު ލިބުމުގެ ދޮރު ބަންދުވެ، ސަރުކާރާއި ސިޔާސީ ވެރިންނަށް ދައުލަތުގެ ވަސީލަތްތައް ނާޖާއިޒު ގޮތުގައި ބޭނުންކުރުމުގެ ފުރުސަތު ފަހިވެގެންދާނެ ކަމަށް ބުނެ، ނޫސްވެރިން ވަނީ ކަންބޮޑުވުން ފާޅުކޮށްފަ އެވެ.
މިހާރުވެސް ނޫސްވެރިން ދަނީ އެކި ސަރަހައްދުތަކުގައި އާންމުންނާ ބައްދަލުކޮށް، ބިލުގައި ހުރި މާއްދާތަކާއި އޭގެ ސަބަބުން ނުކުމެދާނެ ނަތީޖާތައް އޮޅުންފިލުވައިދެމުންނެވެ. އަދި މި މައުލޫމާތު ހިމެނޭ ލީފްލެޓެއްވެސް ނޫސްވެރިން ދަނީ މަގުތަކަށް ނުކުމެ އާންމުންނަށް ބަހަމުންނެވެ.
ފޯރަމް އިންތިޒާމުކުރާ ފަރާތުން ފާހަގަކުރި ގޮތުގައި، މި ބިލަކީ ސަރުކާރުގެ ވެރިން ރައްޔިތުންގެ ހަޒާނާއިން ކުރާ ވައްކަމާއި ހިޔާނާތުގެ އަމަލުތައް ފޮރުވުމަށް އަމާޒުކޮށްފައިވާ ބިލެކެވެ.
އަދި ފޭސްބުކް، އެކްސް އަދި އެހެނިހެން ސޯޝަލް މީޑިއާ ވަސީލަތްތައް ވަކި ކޮމިޝަނެއްގައި ރަޖިސްޓްރީކުރުން މަޖުބޫރުކުރުވައި، މީޑިއާތައް އިތުރަށް ސަރުކާރުގެ ބާރުގެ ދަށަށް ގެނައުމަށް މި ބިލުގެ ސަބަބުން މަޖުބޫރުވެގެން ދާނެ އެވެ.
