އެއަރޕޯޓްތަކުގެ ފަންޑަށް ކުރީގެ ސަރުކާރުން ހޯދި ފައިސާ ޖަމާކުރި އެކައުންޓްތަކުގެ ބެލެންސް ހާމަކުރަން މި ސަރުކާރަކަށް ނުކެރޭނެ: މައުރޫފް

ރާއްޖޭގެ އެކި ސަރަހައްދު ތަކުގައި އެއަރޕޯޓް ތަރައްގީކުރުމަށް، ކުރީގެ ސަރުކާރުން ގާއިމުކުރި ފަންޑަށް، އޭރު ހޯދި ފައިސާ ޖަމާކުރި އެކައުންޓްތަކުގެ މިހާރުގެ ބެލެންސް ހާމަކުރަން މި ސަރުކާރަކަށް ނުކެރޭނެކަމަށް، ރައީސް އިބްރާހީމް މުހައްމަދު ސޯލިހުގެ ސަރުކާރުގައި ރައީސް އޮފީހުގެ އަންޑަރ ސެކްރެޓަރީ އަހްމަދު މައުރޫފް ވިދާޅުވެއްޖެއެވެ.

މައުރޫފް މިހެން ވިދާޅުވެ، ޗެލެންޖުކުރައްވައިފައި ވަނީ ރައީސް މުއިއްޒާއި ފިނެންސް މިނިސްޓަރު މޫސާ ޒަމީރު ޓެގްކޮށް، އެކްސްގައި ކުރެއްވި ޕޯސްޓެއްގައެވެ.

އއ. ބޮޑުފޮޅުދޫގައި ވާހަކަފުޅު ދައްކަވަމުން، ރާއްޖޭގެ 7 ސަރަހައްދެއްގައި އެއަރޕޯޓް އެޅުމަށް އެމްޑީޕީ ސަރުކާރުން އެއްކޮށް ޖަމާކުރި 86 މިލިއަން ޑޮލަރު ކޮބައިތޯ އާއި، އަދި ލ. ކައްދޫ އެއަރޕޯޓް އިންޓަރނޭޝަނަލް ފެންވަރަށް ތަރައްގީކުރުމަށްޓަކައި ބަހައްޓައިފައި ހުރި 10 މިލިއަން ޑޮލަރު ކޮބައިތޯ ރައީސް ސޯލިހު ވަނީ ސުވާލު އުފައްދަވައިފައެވެ.

ރައީސް ސޯލިހުގެ މި ވާހަކަފުޅާ ގުޅިގެން، "އެ ފައިސާ ޖަމާކުރީ ކޮންތާކަށްތޯ؟" ސުވާލުކޮށް، މި ސަރުކާރަށް ތާއީދުކުރާ، މުހައްމަދު އަސަދު ކިޔާ މީހަކު އެކުސްގައި ޕޯސްޓެއް ކޮށްފައިވާތީ، އެޔަށް ރައްދުދެއްވާ، މައުރޫފް ވިދާޅުވީ، އެ ފައިސާ ޖަމާކުރީ މިނިސްޓްރީ އޮފް ފިނެންސްގެ ނަމުގައި އެމް.އެމް.އޭގައި އޮންނަ ޕަބްލިކް ބޭންކް އެކައުންޓަށް ކަމަށެވެ. ނަމަވެސް، އެއަރޕޯޓް ޕްރޮޖެކްޓްތައް ނުހިންގާ، މި ސަރުކާރުން އެ ފައިސާ އެހެން ކަންކަމަށް ބޭނުންކޮށް ހުސްކޮށްފި ކަމަށާއި، އެ ފަންޑުތަކުގެ ބެލެންސް މިހާރު ހާމަކުރަން ސަރުކާރަށް ނުކެރޭނެ ކަމަށެވެ.

ރާއްޖޭގެ އެކި ސަރަހައްދު ތަކުގައި އެއަރޕޯޓް ތަރައްގީކުރުމަށް ކުރީގެ ސަރުކާރުން ފެށި މަޝްރޫއުގެ ދަށުން، ފުރަތަމަ 2 އެއަރޕޯޓެއްގެ މަސައްކަތް ފެށުނެވެ.

އެއީ، ހދ. މަކުނުދޫ އަދި ފ. މަގޫދޫގައެވެ.

މަކުނުދޫ އެއަރޕޯޓަށް ބޭނުންވާ ބިން ހިއްކުމަށްފަހު، މި ސަރުކާރު އައިފަހުން އެތަނުގެ މަސައްކަތް އިތުރަށް ކުރިއަކަށް ނުދެއެވެ.

ފ. މަގޫދޫގައި ހަދަން ފެށި އެއަރޕޯޓްގެ މަސައްކަތް، ރަންވޭއާއި ޓާރމިނަލާއި އޮފީސް އިމާރާތާއެކު، %80 އަށްވުރެ ބޮޑުބައި ނިމިފައި އޮއްވާ މި ސަރުކާރު އައިފަހުން އެތަނުގެ މަސައްކަތް ވަނީ އެއްކޮށް ހުއްޓިފައެވެ.

އެހެންކަމުން، އެ 2 ރަށުގެ އެއަރޕޯޓްގެ މަސައްކަތް ނިމިފައި ނުވަނީ، އެކަމަށް ކުރީގެ ސަރުކާރުން ހޯދި ފައިސާ، މި ސަރުކާރުން އެހެން ކަންކަމަށް ބޭނުންކުރުމުން ކަމަށް ގަބޫލުކުރެވެއެވެ.