ބިރު ދައްކައިގެން ފައިސާ ފޭރުނު 2 މީހަކު ހައްޔަރުކޮށް، ބަންދު މުއްދަތު ޖަހައިފި
7 ސެޕްޓެމްބަރު 2025 | އާދީއްތަ 13:27ފޭސްބުކް މެސެންޖާ އިން މީހަކާ ވާހަކަދައްކައި އެ މީހާގެ އޮރިޔާން ވީޑީއޯ ހުރިކަމަށް ބުނެ ބިރުދެއްކި
މައްސަލާގައި ހައްޔަރުކުރި ދެމީހުން
މީހަކަށް ވަޅިން ބިރުދައްކައިގެން ފައިސާ ފޭރުމުގެ މައްސަލައެއްގައި ދެމީހަކު ހައްޔަރުކޮށް, ބަންދުގެ މުއްދަތު ކަނޑައަޅައިފައެވެ.
ފުލުހުން މައުލޫމާތު ދިންގޮތުގައި، މި މައްސަލައިގައި ހައްޔަރުކޮށްފައިވަނީ ހއ. ފިއްލަދޫ، ސީރީންމަންޒިލް، އުމުރުން 29 އަހަރުގެ މުޙައްމަދު ޟަމީރާއި ލ. ގަން، ތުނޑި އަވަށު އަރާއިރު، އުމުރުން 37 އަހަރުގެ ޢަލީ ހައިސަލްއެވެ. މި ދެމީހުން ހައްޔަރުކޮށްފައިވަނީ މިމަހުގެ 4 ވަނަ ދުވަހު ހިންގި ޚާއްސަ އޮޕަރޭޝަނެއްގައެވެ.
މި މައްސަލައަކީ، ފޭސްބުކް މެސެންޖާ އިން މީހަކާ ވާހަކަދައްކައި އެ މީހާގެ އޮރިޔާން ވީޑީއޯ ހުރިކަމަށް ބުނެ ބިރުދައްކައިގެން ހުޅުމާލެ ފޭސް 1 އަށް ގެންގޮސް، ވަޅިން ބިރުދައްކައި، އެ މީހާގެ އެކައުންޓުން ފައިސާ ނަގައި، އޮރިޔާންކޮށް އަދި ވީޑިއޯކޮށް އިތުރު ފައިސާ ހޯދުމަށް ޑިމާންޑުކުރާ ކަމަށްބުނެ ރިޕޯޓުކޮށްފައިވާ މައްސަލައެކެވެ. މި މައްސަލަ ރިޕޯޓުކޮށްފައިވަނީ މިދިޔަ އޮގަސްޓު މަހުގެ 31 ވަނަ ދުވަހުއެވެ.
ފުލުހުންވަނީ މައްސަލައިގައި ހައްޔަރުކުރި 2 މީހުން ހުޅުމާލެ ފޭސްް 1 ގައި ދިރިއުޅޭ އެޕާޓްމެންޓް ބަލާ ފާސްކޮށްފައެވެ. އެޕާޓްމެންޓް ބަލާ ފާސް ކުރިއިރު އެތަނުން 3 މޯބައިލް ފޯނާއި، 3 އަތުކުރީ ގަޑިއާއި، ޑްރޯންއަކާއި، ދޮށްޓެއްގެ އިތުރުން އަވިއައިނުތަކާއި، ރިހި ފަށަކާއި ރިހި އަނގޮޓިއެއް ހޯދާފައިވެއެވެ. މި ތަކެއްޗަކީ އެކި މީހުންގެ އަތުން ފޭރިގަނެފައިވާ ތަކެތި ކަމަށް ބެލެވޭ ކަމަށް ފުލުހުން ބުނެފައިވެއެވެ. އަދި ބަލައި ފާސްކުރިއިރު 6 ވަޅިވެސް ފެނިފައިވެއެވެ.
މި މައްސަލައިގައި ހައްޔަރުކުރެވުނު ދެމީހުންގެ ތެރެއިން ޢަލީ ހައިސަލް 4 ދުވަހަށް އަދި މުޙައްމަދު ޟަމީރު 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.
ފުލުހުންގެ ތަޙުޤީޤަށް މަޢުލޫމާތު ލިބިފައިވާ ގޮތުގައި، މި ދެމީހުން ސޯޝަލް މީޑިއާގެ އެކި ވަސީލަތްތައް މެދުވެރިކޮށް އިތުރު ދެމީހަކަށްވެސް މިފަދައިން އަނިޔާކޮށް، ބިރުދައްކައި، އޮރިޔާން ވީޑިއޯ ނަގައި، ފައިސާ ފޭރިފައިވާ ކަމަށް ރިޕޯޓުކޮށްފައިވެއެވެ. މި މައްސަލަތައްވެސް ފުލުހުން ދަނީ ތަޙުޤީޤުކުރަމުންނެވެ.
ފުލުހުން ވަނީ މި ދެމީހުންގެ ފަރާތުން މިފަދަ އަނިޔާއެއް ލިބިފައިވާ އިތުރު ފަރާތްތަކެއް ވާނަމަ، އެކަން ފުލުހުންނަށް ރިޕޯޓުކުރުމަށް އިލްތިމާސްކޮށްފައެވެ.
