މަޖިލީހުގެ ރައީސް އަބްދުއްރަހީމަށް ހެޔޮ އެދޭ ފަރާތްތަކުން 'ހަދިޔާ'ގެ ގޮތުގައި ގާތްގަނޑަކަށް މިލިއަނެއްހާ ފައިސާ
އަބްދުއްރަހީމްގެ މުސާރައާއި އިނާޔަތުގެ ގޮތުގައި އަހަރެއްގެ ތެރޭ ލިބިވަޑައިގަތީ 658،894.95 ރުފިޔާ
މަޖްލިސް އަބްދުލްރަހީމް އަބްދުالله (ކ) ރައީސް ޑރ. މުހައްމަދު މުއިއްޒު (ވ) އާއެކު
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް ހެޔޮ އެދޭ ފަރާތްތަކުން 'ހަދިޔާ'ގެ ގޮތުގައި ގާތްގަނޑަކަށް މިލިއަނެއްހާ ފައިސާދީފައިވާ ކަމަށް އަބްދުއްރަހީމް ގެ މާލީ ބަޔާނުގައި ބުނެފިއެވެ.
ރައްޔިތުން މަޖިލީހުން އާއްމުކޮށްފައިވާ، އަބްދުއްރަހީމްގެ މާލީ ބަޔާނުގައި ބުނެފައިވަނީ ހެޔޮ އެދޭ މީހުންގެ ފަރާތުން ލިބިފައިވާ ފައިސާއާއި، މުދަލާއި، ބޭނުންކުރަން ލިބިފައިވާ ތަކެއްޗާއި، ވަސީލަތްތަކުގެ ޖުމްލަ އަގު 958982.48 (ނުވަލްއަކަ ފަންސާސް އަށްހާސް ނުވަސަތޭކަ އަށްޑިހަ ދެ ރުފިޔާ ސާޅީސް އަށް ލާރި) އަށް އަރާ ކަމަށެވެ. އެއީ ދަތުރުފަތުރު ކުރުމަށާއި، އަދި ކްރެޑިޓް ކާޑުތަކުގެ ފައިސާ ދެއްކުމަށް ދީފައިވާ ފައިސާ ކަމަށް ރިޕޯޓުގައި ބުނެފައިވެއެވެ.
މީގެ އިތުރުން އަބްދުއްރަހީމްގެ މުސާރައާއި އިނާޔަތުގެ ގޮތުގައި އަހަރެއްގެ ތެރޭ ލިބިވަޑައިގަތީ 658،894.95 ( ހަ ލައްކަ ފަންސާސް އަށްހާސް އަށްސަތޭކަ ނުވަދިހަ ހަތަރު ރުފިޔާ ނުވަދިހަ ފަސް ލާރި) އެވެ.
މާލީ ބަޔާނުން އެނގޭގޮތުގައި، އަބްދުއްރަހީމްގެ އުފަންރަށް، ލ. ފޮނަދޫގައި ދިރިއުޅުމަށް ހޯދާފައިވާ ބަންޑާރަގޯތީގައި ކޮށްފައިވާ އިމާރާތަށް 5 މިލިއަން ރުފިޔާ ހޭދަކޮށްފައިވެއެވެ. އެއީ ދިރިއުޅުމަށް ކުރަމުންދިޔަ މަސައްކަތްތަކުން އިމާރާތް ކޮށްފައިވާ ކަމަށް ގޯއްޗެއް ކަމަށް ބުނެފައިވެއެވެ. އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި 2017 ވަނަ އަހަރު ވެސް ދިރިއުޅުމަށް އެއްކޮށްފައިވާ ފައިސާއިން 4.5 މިލިއަން ދިވެހި ރުފިޔާއަށް 3 ކޮޓަރީގެ އެޕާޓްމަންޓެއް ބައްލަވާގަނެފައިވެއެވެ.
އަބްދުއްރަހީމްގެ ނަންފުޅުގެ މަތީގައި 67000 ރުފިޔާގެ އެއް ސައިކަލު ރަޖިސްޓްރީކޮށްފައިވާއިރު، 3.5 މިލިއަން ރުފިޔާއިން އަގުކޮށްފައިވާ 'އަރަފާ އެކްސްޕްރެސް' ކިޔާ ބޯޓެއް ވެސް އެބައޮތެވެ.
މަޖިލީހުގެ ރައީސް އަބްދުއްރަހީމްގެ އެއްވެސް ލޯނެއް އަދި ދަރަންޏެއް ވެސް ނެތްއިރު، އެމަނިކުފާނުގެނަންފުޅުގައި ހައްދަވާފައިވަނީ އެންމެ އެކައުންޓެކެވެ. ބީއެމްއެލްގެ އެކައުންޓުގައި ޖުލައި މަހުގެ 2 ވަނަ ދުވަހާ ހަމައަށް 101،698.21 ރުފިޔާހުރި ކަމަށް މާލީ ރިޕޯޓުގައި ބުނެފައިވެއެވެ.
