20 މިލިއަން ރުފިޔާގެ އަގުހުރި ދެ ބިމާއި, ފްލެޓާއި އަދި ރޯހައުސްއެއް ބާރަށު ދާއިރާގެ މެމްބަރު ސުޖާއު އަތުގައި ހުރިކަން ހާމަވެއްޖެ
2015 ވަނަ އަހަރު ހުޅުމާލެއިން ރޯހައުސެއް ދީފައިވަނީ ވަޒީފާ އަދާކުރަމުންދާ ކުންފުނިން ހަދިޔާއެއްގެ ގޮތުގައި ކަމަށް ބުނެފައިވޭ
ބާރަށު ދާއިރާގެ މެންބަރު ޝުޖާއު މަޖިލީހުގެ ކޮމިޓީގައި ވާހަކަދައްކަވަނީ
20 މިލިއަން ރުފިޔާގެ އަގުހުރި ދެ ބިމާއި ފްލެޓާއި އަދި ރޯހައުސްއެއް ބާރަށު ދާއިރާގެ މެމްބަރު އިބްރާހިމް ސުޖާއު އަތުގައި ހުރިކަން ހާމަވެއްޖެއެވެ.
ރައްޔިތުންގެ މަޖިލީހަށް އޭނާ ހުށަހަޅުވާފައިވާ މާލީ ބަޔާނުގައި ބުނެފައިވަނީ ހުޅުމާލެއިން އަމިއްލަ ބިމެއް 2024 ވަނަ އަހަރު، 9،488318.40 މިލިއަން ރުފިޔާއަށް ގަނެފައިވާ ކަމަށާއި، ހއ.ބާރަށުން ވެސް އަމިއްލަ ބިމެއް ސީވިއުއިން 2022 ވަނަ އަހަރު 300،000 ރުފިޔާއަށް ގަނެފައިވާ ކަމަށެވެ. ހުޅުމާލެއިން ލަގްޒަރީ ފްލެޓެއް 7،283،300 މިލިއަން ރުފިޔާއިން 2023 ވަނަ އަހަރު ގަނެފައިވާއިރު، 2015 ވަނަ އަހަރު ހުޅުމާލެއިން ރޯހައުސެއް ދީފައިވަނީ ވަޒީފާ އަދާކުރަމުންދާ ކުންފުނިން ހަދިޔާއެއްގެ ގޮތުގައި ކަމަށް ބުނެފައިވެއެވެ.
ޖުމްލަ އަގު 20،601،618.4 މިލިއަން ރުފިޔާ އަރާއިރު، އަމިއްލަ ދެ ބިމާއި، ފްލެޓު ގަނެފައިވަނީ ލޯނުގެ ގޮތުގައި ލިބިފައިވާ ފައިސާއިން ކަމަށް ވެސް މާލީ ބަޔާނުގައި ބުނެފައިވެއެވެ.
މީގެ އިތުރުން އަހަރެއްގެ ތެރޭގައި އޭނާއަށް ދެ މިލިއަން ރުފިޔާ ވަނީ ލިބިފަ އެވެ. އެއީ މުސާރަ އާއި އިނާޔަތްތަކުގެ ގޮތުގައި ލިބުނު 1،808،603 މިލިއަން ރުފިޔާ އާއި ގެދޮރު ކުއްޔަށް ދީގެން ލިބުނު 210،000 ރުފިޔާ އެވެ.
ސުޖާއުގެ އެކައުންޓުތަކުގައި ދިވެހި ރުފިޔާއިން 80،234 ރުފިޔާ ހުރިއިރު، އެކައުންޓުތަކުގައި 700 ޑޮލަރު ހުރި ކަމަށް ބަޔާނުން ދައްކައެވެ. އަދި ނަގުދު ފައިސާގެ ގޮތުގައި 5780 ރުފިޔާ އާއި 3200 ޑޮލަރާއި 13،100 ސްރީ ލަންކަން ރުފީސް އާއި 150 ޔޫއޭއީ ދިރްހަމް ހުރި މަލީ ބަޔާނުގައި ބުނެފައިވެއެވެ.
މެންބަރު ސުޖާއުގެ ބޮޑެތި ދަރަނިތަކެއް އޮތް ކަމަށް މާލީ ބަޔާނުން ދައްކާއިރު، ބޭންކް އޮފް މޯލްޑިވްސްއަށް ދައްކަން ޖެހޭ ދެ ދަރަންޏެއް އެބައޮތެވެ. އެއީ ޖުމްލަ 225،734.43 ރުފިޔާއެވެ. އަދި ބޭންކް އޮފް ސިލޯނަށް 4،234،938.63 މިލިއަން ރުފިޔާ ނުދައްކާ ބާކީ އޮތްއިރު، އޮފިޝަލް އިވެންޓްސް ޕްރައިވެޓް ލިމިޓެޑްއަށް 5،000،000 މިލިއަން ނުދައްކާ އޮތްކަން ހާމަވެއެވެ.
މަލީ ބަޔާނުގައިވާ ގޮތުން، އޮފިޝަލް އިވެންޓްސްގައި މެންބަރު ސުޖާއުގެ 50 ޕަސެންޓު ހިއްސާ އޮންނައިރު، ސްވޯން ފެމިލީ ޕްރައިވެޓް ލިމިޓެޑް ކިޔާ ކުންފުންޏެއްގައި 40 ޕަސެންޓު ހިއްސާ އޭނާގެ އަތުގައި އެބައޮތެވެ. މީގެ އިތުރުން މެންބަރު ސުޖާއުގެ އަތުގައި ހަތް މިލިއަންގެ ރުފިޔާގެ މަސް ދޯންޏެއް އޮތްކަން ކަމަށް ވެސް މާލީ ބަޔާނުގައި ވަނީ ބުނެފައެވެ.
