އިސްރާއީލުން މަރާލި ކަމަށް ބުނި ޔަމަނުގެ ސިފައިންގެ ވެރިޔާ އިސްރާއީލަށް ވަރުގަދަ ރައްދެއް ދީފިއެވެ.

އިސްރާއީލުގެ އެ ވާހަކަ އަކީ ހަގީގަތެއް ނޫން ކަން ހާމަ ކުރަމުން އޭނާ ބުނީ، ޣައްޒާ ގައި ހިންގަމުންދާ ނަސްލު ނައްތާލުމުގެ ހަމަލާތައް ހުއްޓުވުމަށް ތެލް އަވީވް އާ ދެކޮޅަށް އިތުރަށް ހަރަކާތްތެރިވާނެ ކަމަށް ވަޢުދުވާ ކަމަށެވެ.

ޔަމަނުގެ އަސްކަރިއްޔާގެ ޖެނެރަލް ސްޓާފުގެ އިސްވެރިޔާ، މޭޖަރ ޖެނެރަލް މުޙައްމަދު އަބްދުލްކަރީމް އަލް-ޣަމާރީ މި މޭރުމުން ވާހަކަ ދެއްކީ ހުކުރު ދުވަހު އެ ގައުމުގެ ރަސްމީ ސަބާ ނިއުސް އެޖެންސީ އަށެވެ.

"ޣައްޒާ އާ ދެކޮޅަށް އަދި ޔަމަނާ ދެކޮޅަށް ޒަޔަނިސްޓުން އިތުރުކުރާ ހަމަލާތަކަކީ ބާރު ގަދަ ކަމުގެ ނިޝާނެއް ނޫނެވެ. އެއީ ދެ އަހަރާ ގާތްކުރާ އިރު ވެސް އެމީހުންގެ ލަނޑުދަނޑިތައް ހާސިލުކުރުމުގައި ނުކުޅެދުމާއި ފެއިލްވުމުގެ ނިޝާނެކެވެ. އަދި އެކަމަށް ރައްދު ދެވޭނީ އިތުރު ހަމަލާ ތަކުންނެވެ،" އޭނާ ބުނެފައިވެއެވެ.

މި ބަޔާން އައިސްފައި ވަނީ، އިސްރާއީލުން ޔަމަނުގެ ވެރިރަށަށް ދިން ވައިގެ ހަމަލާތަކުގައި ޣަމާރީ އާއި ދިފާއީ ވަޒީރު މުޙައްމަދު އަލް-އަތީފީ ހިމެނޭ ގޮތަށް ގިނަ ޔަމަނީ އޮފިޝަލުންތަކެއް މަރާލާފައިވާ ކަމަށް ބުނި ދުވަހުގެ އަނެއް ދުވަހުއެވެ.

ޖޫން މަހު ވެސް އިސްރާއީލުން ވަނީ ޣަމާރީ އަށް ޓާގެޓް ކޮށް އަނިޔާވެރި ހަމަލާ އެއް ދީފައެވެ.

އޭނާ އިތުރަށް ބުނި ގޮތުގައި ޔަމަނުގެ މަދަނީ ސަރަހައްދުތަކަށް އުދުވާނީ ހަމަލާ އެއް ދިނުމަށްފަހު އިސްރާއީލުން ވަނީ އެއީ އަސްކަރީ ޓާގެޓް ތަކަށް ދިން ހަމަލާ އެއްގެ ގޮތުގައި ދެއްކުމަށް މަސައްކަތް ކޮށްފައެވެ.

"ޒަޔަނިސްޓް ދުޝްމިނުން ޞަންޢާ ގެ މަދަނީ ސަރަހައްދުތަކަށް ދޭ ހަމަލާތަކަށް އަދަބު ނުލިބި ނުދާނެއެވެ،" އޭނާ ބުނެފައިވެއެވެ.

މީގެ އަހަރެއްހާ ދުވަސް ކުރިން އިސްރާއީލުން ޔަމަނަށް ހަމަލާދޭން ފެށީ ޣައްޒާ ގައި ނަސްލު ނައްތާލުމުގެ ހަނގުރާމައެއް ފެށުމާ ގުޅިގެން ޞަންޢާ އިން ޣައްޒާ އާ އެއްބައިވަންތަ ކަން ހާމާ ކުރުމުގެ ގޮތުން އިސްރާއީލާ ދެކޮޅަށް ހަމަލާތައް ފެށުމާ އެކުގައެވެ.

ޔަމަނުގެ ހަތިޔާރުއެޅި ބާރުތަކުން ހަމަލާތައް އިތުރު ކުރީ އިސްރާއީލުން ޣައްޒާ އަށް ދޭ އަސްކަރީ ހަމަލާތައް ވަރުގަދަކޮށް، ކާބޯތަކެތި އެ ސަރަހައްދަށް ވެއްދުން ހަމަ މުޅިން ބްލޮކް ކުރުމުންނެވެ.

ޣަމާރީ ވަނީ ކުރިން ޔަމަނުގެ އަސްރިއްޔާ އިން ދީފައިވާ ގިނަ ބަޔާންތަކެއް ތަކުރާރުކޮށް، ޣައްޒާ ގެ ފަލަސްތީނު ރައްޔިތުންގެ ހައްގުގައި ކުރާ މަސައްކަތުގައި އެއްފިޔަވަޅު ވެސް ފަހަތަށް ނުޖެހޭނެ ކަމަށް ވަޢުދުވެފަ އެވެ.