ކުމުންދޫ ބަނދަރުގެ މައްސަލަ ހައްލުކޮށްދެއްވާނެ ކަމަށް ވިދާޅުވިތާ އަހަރަކަށްވުރެ ގިނަ ދުވަސް: މިފަހަރުގެ ދަތުރުފުޅުގައި ދެ މަސްތެރޭގައި އަމަލީ މަސައްކަތް ފައްޓަވާނެ ކަމުގެ ޔަގީންކަން ރައީސް ދެއްވި!
29 އޯގަސްޓު 2025 | ހުކުރު 07:43ބަނދަރުގެ މަސައްކަތް ކުރިއަށްދާއިރު މޫދަށް އެރޭ ސަރަހައްދެއް ހެދިގެންދާނެ
ހދ.ކުމުންދޫގެ ރައްޔިތުންނާ ބައްދަލުކުރައްވައި، ރައީސް ޑރ.މުހައްމަދު މުއިއްޒު ވާހަކަދައްކަވަނީ
ހދ.ކުމުންދޫ ބަނދަރު މިހާރު އޮތްތަން ނޫން އެހެން ސަރަހައްދަކަށް ބަދަލުކޮށް، ދެމަސްދުވަހުގެ ތެރޭގައި އަމަލީ މަސައްކަތް ފައްޓަވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ.
މިމަހުގެ 27 ވަނަ ދުވަހު އެރަށުގެ ރައްޔިތުންނާއި ބައްދަލުކުރައްވައި ރައީސް މުއިއްޒު ވިދާޅުވީ ކުމުންދޫގެ ތަރައްގީއަށް ކުރަންހުރި ކަންކަމުގެ ތެރޭގައި، ރައްޔިތުންނަށް އެންމެ ދަތިވެފައިވާ މައްސަލައަކީ ބަނދަރުގެ މައްސަލަ ކަމަށާއި، ބަނދަރު މިހާރު އޮތްތަނުގެ ސަބަބުން ދިމާވަމުންދާ މައްސަލަ ހައްލުނުކުރެވޭކަން މިހާރު ޔަގީންވާ ކަމަށެވެ.
މިކަމަށް ދާއިމީ ހައްލެއް ގެނައުމަކީ އެ މަނިކުފާނުގެ ޒިންމާއެއްކަމަށް ވިދާޅުވެ، ރައީސް ވިދާޅުވީ ރައްޔިތުން ބޭނުންވާ ސަރަހައްދަށް ބަނދަރު ބަދަލުކޮށް ދެ މަސްދުވަހުގެ ތެރޭގައި މަސައްކަތްފަށައި، ބަނދަރު ނިންމަވައިދެއްވާނެ ކަމަށެވެ. މީގެ އިތުރުންވެސް ބަނދަރުގެ މަސައްކަތް ކުރިއަށްދާއިރު މޫދަށް އެރޭ ސަރަހައްދެއް ހެދިގެންދާނެ ކަމަށްވެސް އެ މަނިކުފާނު ވިދާޅުވިއެވެ.
ކުރީގައި، ހައުސިންގ މިނިސްޓްރީ ހިންގުމުގައި އުޅުނުއިރުގައި، މި ރަށުގެ ބަނދަރު ހެދުމުގައި، ރައްޔިތުންނަށް އެ ދިމާވެގެންދިޔަ އުނދަގޫތަކާއި، ދަތިތައް ހައްލުކުރުމުގައި، އެކިއެކި މަރުހަލާތަކުގައި، އެކި ކަންކަން ކުރުމުގައި އުޅެވިފައި ހުންނާނީ. އަދި އޭގެފަހުންވެސް، ތިޔަބޭފުޅުން ތިޔަ ވަޑައިގަންނަވަނީ، އެކި ބަދަލުތައް ގެނެސް، އެކަމަށް ދާއިމީ ޙައްލެއް، ރަނގަޅު ޙައްލެއް ނައިސްގެން. މިހާރު ބަނދަރު އޮތް ތަނުގެ ސަބަބުން، ހަގީގަތުގައި އެކަން ހައްލުނުވާކަން، އެއިން ވަރަށް ރަނގަޅަށް މިހާރު އެއޮތީ ޔަގީންވެފައި. އެހެންވީމާ، މި މައްސަލައަށް ދާއިމީ ހައްލެއް ގެނެސްދިނުމަކީ، އަޅުގަނޑުގެ އެންމެ އިސް ވާޖިބު އަދި ޒިންމާ. އަޅުގަނޑުމެން އެހެންވީމާ، މިހާރު މި ބަނދަރު އޮތްތަން ނޫން، ރައްޔިތުން ބޭނުންވާ ލޮކޭޝަންގައި، ތަނުގައި އިރާދަކުރެއްވިއްޔާ ރައްޔިތުން ބޭނުންވާ ގޮތަށް، މި ބަނދަރުގެ އަމަލީ މަސައްކަތް، ގިނަވެގެން ދެ މަސްދުވަހުގެ ތެރޭގައި ފަށާނެ ވާހަކަ ދަންނަވަން. އަދި އެގޮތަށް ފަށައިގެން ހުއްޓައިނުލާ، ބާރު ސްޕީޑްގައި މަޑުޖެހުމެއްނެތި ގެންގޮސް ނިންމައިދޭނެ ކަމުގެ ޔަޤީންކަންވެސް ތިޔަބޭފުޅުންނަށް އަރުވަން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ކުމުންދޫގެ ތަރައްގީއަށް އިސްކަން ދެއްވާނެކަން ފާހަގަކުރައްވައި ރައީސް މުއިއްޒު ވިދާޅުވީ ކުމުންދޫ ސްކޫލްގެ މަލްޓި- ޕާޕަސް ހޯލުގެ މަޝްރޫއުގެ އަމަލީ މަސައްކަތް ދެތިން މަސްދުވަހުގެ ތެރޭގައި ފެށޭނެކަމަށެވެ. އަދި ހޯލުގެ މަސައްކަތާއި އެކު ސްކޫލަށް ބޭނުންވާ އެހެނިހެން ޖާގައާއި ވަސީލަތްތައް އިތުރުކުރެވިގެންދާނެ ކަމަށްވެސް އެމަނިކުފާނު ވިދާޅުވިއެވެ.
ކުޅިވަރުގެ ދާއިރާގެ މަޝްރޫއުތަކާއި ގުޅޭގޮތުން އެމަނިކުފާނު ވިދާޅުވީ، މިހާރު ހަދަމުންދާ ފުޓްބޯޅަ ދަނޑު އެންމެ ފުރިހަމަގޮތުގައި ފުރިހަމަކޮށްދީ، ފުޓްސަލް ދަނޑު ތަރައްޤީ ކުރުމުގެ އިތުރުން ހޭންޑް ބޯލް ކޯޓަކާއި ވޮލީ ކޯޓެއްވެސް އެ ރަށުގައި އެޅުމުގެ މަސައްކަތް ކޮށްދެއްވާނެކަމަށެވެ.
ރައީސް މުއިއްޒު އެރަށަށް ކުރެއްވި ދަތުރުފުޅާއެކު، ކުމުންދޫ މަގު ހެދުމުގެ މަޝްރޫއުގެ އެއްބަސްވުމާއި، ކުމުންދޫ ސްކޫލްގެ މަލްޓި- ޕާޕަސް ހޯލުގެ އެއްބަސްވުމުގައި ވަނީ ސޮއިކުރައްވާފައެވެ. އަދި ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އަޅުއްވައި، ކުމުންދޫ ފުލުހުންގެ މަރުކަޒުގެ އިތުރުން، އެ ރަށުގެ ހެލްތު ސެންޓަރުގެ ބިންގާ އަޅުއްވާފައިވެއެވެ. މީގެ އިތުރުން އެ ރަށުގައި ބޭންކް އޮފް މޯލްޑިވްސްގެ އޭޓީއެމްގެ ޚިދުމަތްވެސް ވަނީ ފައްޓަވާފައެވެ.
ކުމުންދޫގެ ތަރައްގީއަށް އިސްކަން ދެއްވާނެ ކަމަށް ރައީސް މުއިއްޒު ވިދާޅުވިިއިރު، 26 ފެބުރުވަރީ 2024 ގައި ވެސް އެރަށުގެ ކައުންސިލްއާ ބައްދަލު ކުރައްވައި ރައީސް މުއިއްޒު މިމޭރުމުން ވާހަކަ ދެއްކެވިއެވެ. އަދި އޭރު ވެސް ބަނދަރަށް ދިމާވެފައިވާ މައްސަލަ ހައްލު ކޮށްދެއްވާނެ ކަމުގެ ޔަގީންކަން ދެއްވާފައިވެއެވެ. ނަމަވެސް އަހަރަކަށްވުރެ ގިނަ ދުވަސްވެގެންދިޔައިރު މިމައްސަލަ ހައްލުކުރުމަށްޓަކައި ސަރުކާރުގެ ފަރާތުން އެއްވެސް އެއްބާރުލުމެއް ދީފައިނުވެއެވެ.
