ޣައްޒާ ގެ ހައިހޫނު ކަމަކީ އިންސާނުން އުފެއްދި ހާލަތެއް ކަމަށް އެމެރިކާ ފިޔަވާ އދ. ގެ ސެކިއުރިޓީ ކައުންސިލްގެ އެހެން ހުރިހާ މެމްބަރުން ބުނެފި އެވެ.

މެމްބަރުން އިތުރުަށް ބުނެފައި ވަނީ ހަނގުރާމައިގެ ހަތިޔާރެއްގެ ގޮތުގައި ބަނޑަށް ޖެއްސުމަކީ ބައިނަލްއަޤްވާމީ އިންސާނީ ހައްގުތަކުގެ ޤާނޫނުގެ ދަށުން މަނާކަމެއް ކަމަށެވެ.

ކައުންސިލްގެ 14 މެމްބަރުން އެކުގައި ނެރުނު ބަޔާނެއްގައި ގޮވާލާފައިވަނީ ވަގުތުން ހަމަނުޖެހުން ހުއްޓާލުމަށާއި، ހަމާސް އާއި އެހެނިހެން ގްރޫޕްތަކުން ހިފަހައްޓާފައިވާ ހުރިހާ ރަހީނުން ދޫކޮށްލުމަށާއި، މުޅި ޣައްޒާ އަށް އެހީ އިތުރުކުރުމަށާއި، އިސްރާއީލުން އެހީ ފޯރުކޮށްދިނުމަށް އަޅާފައިވާ ހުރިހާ ހުރަސްތަކެއް ވަގުތުން ނައްތާލުމަށެވެ.

"ޣައްޒާގައި ކުރިމަތިވެފައިވާ ބަނޑުހައިހޫނުކަން ވަގުތުން ހުއްޓުވަންޖެހޭ،" ކަމަށް ބަޔާނުގައި ބުނެފައިވެއެވެ. "ވަގުތު ވަރަށް މުހިންމު. އިންސާނީ ކާރިސާ ލަސްނުކޮށް ހައްލުކުރަންޖެހޭ، އަދި އިސްރާއީލުން އެމީހުންގެ މިސްރާބު ބަދަލު ކުރަންޖެހޭ."

ދުނިޔޭގެ ބަނޑުހައިހޫނުކަން މޮނިޓަރކުރާ ޖަމްއިއްޔާ އިން ހުކުރު ދުވަހު ރަސްމީ ކޮށް ކަނޑައަޅާ ބުނެފައިވަނީ ޣައްޒާ ސިޓީ އާއި އެތަނުގެ ވަށައިގެންވާ ސަރަޙައްދުތަކުގައި ބަނޑުހައިހޫނުކަން އޮތް ކަމަށާއި، އެ ހާލަތު އިތުރަށް ފެތުރިގެން ދާނެ ކަމަށެވެ. އިންޓެގްރޭޓެޑް ފުޑް ސެކިއުރިޓީ ފޭސް ކްލެސިފިކޭޝަން ސިސްޓަމުން ބުނެފައިވަނީ، ޣައްޒާގެ އާބާދީގެ ހަތަރުބައިކުޅަ އެއްބައި - 514,000 މީހުން - ބަނޑުހައިހޫނުކަމުގައި އުޅޭ ކަމަށާއި، ސެޕްޓެމްބަރު މަހުގެ ނިޔަލަށް އެ އަދަދު 641,000 އަށް އިތުރުވާނެ ކަމަށެވެ.

އިސްރާއީލުން ބުދަ ދުވަހު ދުނިޔޭގެ ބަނޑުހައިހޫނުކަން މޮނިޓަރކުރާ ޖަމްއިއްޔާ އަށް ގޮވާލާފައިވަނީ އެ އެސެސްމަންޓް އަނބުރާ ގެންދިއުމަށެވެ. އިސްރާއީލުން އައިޕީސީގެ ހޯދުންތަކަކީ ދޮގު ކަމަށާއި އަދި ވަކި ފަރާތަކަށް ބުރަވެ ހަދާފައިވާ އެއްޗެއްގެ ގޮތުގައި ބުނެ، އެ ސަރވޭ ހަދާފައި ވަނީ ހަމާސް އިން ދީފައިވާ ފުރިހަމަ ނޫން މަޢުލޫމާތުގެ މައްޗަށް ކަމަށާއި، ފަހުން އިތުރަށް ފޯރުކޮށް ދިން ކާބޯތަކެތީގެ މިންވަރު އެސެސްމަންޓް ގައި ހިމަނާފައިނުވާ ކަމަށް ބުނެފައިވެއެވެ.

ބުދަ ދުވަހު ޔޫއެން ސެކިއުރިޓީ ކައުންސިލްގެ ޣައްޒާއާ ބެހޭ ބައްދަލުވުމުގައި، ޔޫއެންގައި ހުންނަ އެމެރިކާގެ ވަގުތީ އެމްބެސެޑަރ ޑޮރޮތީ ޝިއާ ވަނީ އައިޕީސީ ރިޕޯޓުގެ އިތުބާރާއި ތެދުވެރިކަމާމެދު ސުވާލު އުފައްދާ، އެއިން އެއްވެސް ކަމެއް ސާބިތުނުވާ ކަމަށް 15 މެމްބަރުންގެ ކައުންސިލުގައި ބުނެފައެވެ.