ނޫސްތަކުގެ ރަޖިސްޓްރީ ބާތިލުކުރުމާއި ވަކިވަކި ނޫސްވެރިންނަށް އަދަބު ދެވޭ ގޮތައް ހުށަހަޅާފައިވާ މީޑިއާ އެންޑް ބްރޯޑްކާސްޓިންގ ރެގިއުލޭޝަން ބިލު ބޭރުކޮށްލުމަށް މޯލްޑިވްސް ޖަރނަލިސްޓް އެސޯސިއޭޝަން (އެމްޖޭއޭ) އިން ގޮވާލައިފައެވެ.

އެމްޖޭއޭ އިން ބުނާ ގޮތުގައި މި ބިލަކީ ތުޅާދޫ ދާއިރާގެ މަޖިލިސް މެމްބަރު އަބްދުލްހަންނާން އަބޫބަކުރު ރައްޔިތުންގެ މަޖިލީހަށް ކުރިން ހުށަހެޅުއްވި ބިލެކޭ އެއްފަދައިން ރާއްޖޭގެ ނޫސްވެރިކަމާއި މީޑިއާގެ މިނިވަންކަން އެކީހެން ގެއްލިގެން ދާނޭ ބިލެއް ކަމަށް މި ޖަމްއިއްޔާއިން ދެކޭ ކަމަށެވެ.

އަދި ބިލު ފަރުމާކޮށްފައި އޮތީ މީޑިއާތައް ރެގިއުލޭޓް ކުރުމުގެ ބޮޑެތި ބާރުތަކެއް ރައީސުލްޖުމްހޫރިއްޔާގެ މުށުތެރެއަށް ޖަމާކޮށް، މީޑިއާތައް ސަރުކާރުގެ ފުރިހަމަ ބާރުގެ ދަށަށް ގެނެސް، ނޫސްވެރިން ބިރުވެރިކަމެއްގެ ތެރޭގައި ބޭއްވުމުގެ ފަލްސަފާގައި ކަމަށް އެ ޖަމްއިއްޔާއިން ދެކޭ ކަމަށް ބުނެފައިވެއެވެ. އަދި ނޫސްވެރިންނާއި މީޑިޔާތައް ކުށްވެރިވާ ގޮތަށް ހުރި މާއްދާތަކުގައި މާނަ ސާފުނުވާ، ނާޖާއިޒު މަންފާ ނެގޭނޭ ފަދަ ގިނަ އިބާރާތްތަކެއް އެ ބިލްގައި ހިމަނާފައިވާއިރު ނޫސްތައް ބަންދުކޮށް، ޖޫރިމަނާކޮށް ނޫސްވެރިންނަށް ބޮޑެތި އަދަބުތަކެއް ދޭން އެބިލުގައި ހިމަނާފައިވުމަކީ އެ ޖަމްއިއްޔާއިން ދެކޮޅު ހަދާކަމެއް ކަމަށް ބުނެފައިވެ އެވެ. އަދި މިއީ މިނިވަން ނޫސްވެރިކަން އެކީ މަރާލުން ކަމަށް ވެސް ޖަމިއްޔާގެ ބަޔާނުގައި ބުނެފައިވެ އެވެ.

އެމްޖޭއޭގެ ބަޔާނުގައި ބުނެފައިވަނީ ރައީސް އައްޔަން ކުރައްވާ މެންބަރުން ތިއްބަވައި އަދި އެމަނިކުފާނު ކަނޑައަޅުއްވާ ރައީސްއެއް ހުންނަވާ ކޮމިޝަނަކުން މީޑިއާތައް ރެގިއުލޭޓް ކުރުމަކީ އެއްވެސް ގޮތަކުން ބަލައިގަންނާނޭ ކަމެއް ނޫން ކަމަށެވެ. އަދި މީޑިއާތަކުން އެ ކޮމިޝަނަށް އިންތިހާބުކުރާ މެންބަރުން ވެސް މަޖިލީހުގެ އިތުބާރު ނެތްކަމުގެ ވޯޓަކުން ވަކިކުރެވޭ ގޮތަށް އޮތުމަކީ ހަމަޖެހޭ ކަމެއް ނޫން ކަމަށާއި، އެކަމާ ދެކޮޅު ކަމަށެވެ.

އަދި މިފަދަ ބިލެއް ފަރުމާކޮށް މަޖިލީހަށް ހުށަހެޅިއިރު އެކަށީގެންވާ ގޮތެއްގައި މީޑިއާތަކާއި ނޫސްވެރިންނާ މަޝްވަރާކޮށްފައި ނުވާކަމީ މި ބިލް ހުށަހެޅުމުގައި ހެޔޮ ނިޔަތް އޮތް ކަމާ މެދު ސުވާލު އުފެދޭ ކަމެއް ކަމަށް ބުނެފައިވެއެވެ. އަދި މި ބިލާ ގުޅޭ އެކި ކަންކަމުގައި ރައްޔިތުން މަޖިލީހުގެ ނައިބު ރައީސް އަހުމަދު ނާޒިމް އިސްކޮށް އުޅުއްވިކަން ކަށަވަރުވާއިރު ޕާޓީއަކަށް ނިސްބަތްނުވާ އަމިއްލަ މެންބަރެއްގެ ނަމުގައި ބިލް މަޖިލީހަށް ހުށަހެޅުމަކީ މިކަމުގެ އަޑީގައި ނުބައި އެޖެންޑާއެއް އޮތްކަން ދޭހަވާ ކަމެއް ކަމަށް ވެސް ޖަމިއްޔާގެ ނޫސްބަޔާނުގައި ބުނެފައިވެއެވެ.

އެމްޖޭއޭއިން ބުނީ އެ ޖަމްއިއްޔާއިން އަބަދުވެސް ވަކާލާތު ކުރަނީ ކުރެވިފައިވާ ތަޖުރިބާތަކުގެ މައްޗަށް ބަލާއިރު މިހާރު އޮތް ނިޒާމް އިސްލާހުކުރަން ޖެހިފައިވީ ނަމަވެސް، ދެން އެކުލަވާލާ ނިޒާމު ވާންވާނީ ސަރުކާރުގެ ނުފޫޒުން އެކީ ސަލާމަތްވެފައިވާ ނޫސްވެރިން އެ މީހުން އަމިއްލައަށް މީޑިއާގެ އުސޫލުތައް ކަނޑައަޅާ ރެގިއުލޭޓް ކުރާ ގޮތަށް އޮންނަ ބާރުވެރި ސެލްފް ރެގިއުލޭޓަރީ ނިޒާމަކަށް ކަމަށެވެ. އަދި އެފަދަ ނިޒާމެއް ގާއިމްކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދެއްކަން ވެސް އެ ޖަމްއިއްޔާއިން ހަނދާންކޮށްދީފައިވެއެވެ.

މި ސަބަބުތައް އެހެން ހުރުމުން މިހާރު ހުށަހަޅާފައިވާ ސަރުކާރުން މީޑިއާ ކޮންޓްރޯލް ކުރާ ބިލަށް މި ޖަމްއިއްޔާއިން ތާއީދެއް ނުކުރާ ކަމަށް ބުނެފައިވެއެވެ. އަދި އެ ބިލް އަނބުރާ ގެންދިޔުމަށް އެންމެހާ ނޫސްވެރިންގެ ފަރާތުން މެންބަރު ހަންނާނަށް ވަނީ ގޮވާލާފައެވެ. އަދި މަޖިލީހުގެ މެޖޯރިޓީ ޕާޓީ އަދި ވެރިކަން ކުރާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވެސް އެ ބިލަށް ވޯޓް ނުދީ ބިލް ރައްޔިތުންގެ މަޖިލީހުން ބޭރުކޮށްލުމަށް ވަނީ ގޮވާލާފައެވެ.