ޔުކްރެއިންގެ ޒެލެންސްކީ އަށް ހަނގުރާމަ ވަގުތުން ނިންމާލެވިދާނެ ކަމަށް ޓްރަމްޕް ވިދާޅުވެއްޖެ

ޔުކްރެއިންގެ ރައީސް ވޮލޮޑިމިރް ޒެލެންސްކީ އަށް، ރަޝިޔާ-ޔުކްރެއިން ހަނގުރާމަ ވަގުތުން ނިންމާލެވިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

މަސްރަހް ދިރާސާ ކުރާ ފަރާތްތަކުން ބުނަނީ ޓްރަމްޕްގެ މި ބަސްފުޅަކީ، ހޯމަ ދުވަހު ވައިޓް ހައުސް އަށް ޒިޔާރަތް ކުރައްވަން ހަމަ ޖެހިފައިވާ ޒެލެންސްކީ އަށް ހަނގުރާމަ ހުއްޓާލުމުގެ ޝަރުތުތަކަށް އެއްބަސްވުމަކަށް އައުމަށް ޕްރެޝަރ އިތުރު ކުރުމަށް ޓްރަމްޕް ދެއްކެވި ވާހަކަފުޅެއް ކަމަށެވެ.

ހޯމަ ދުވަހު ވައިޓް ހައުސް އަށް ޒެލެންސްކީ ޒިޔާރަތް ކުރެއްވުމުގެ ކުރިން، ޓްރަމްޕް ވިދާޅުވެފައިވަނީ ރަޝިޔާ އިން ހިފާފައިވާ ކްރައިމިއާ އަނބުރާ ހޯދުމާއި، ޔުކްރެއިން ނޭޓޯގެ މެންބަރަކަށް ވުމަކީ މަޝްވަރާތަކުގައި ހިމެނޭނެ ކަންކަމެއް ނޫން ކަމަށެވެ.

"ޔުކްރެއިންގެ ރައީސް ޒެލެންސްކީ އަށް ބޭނުން ފުޅުވާނަމަ، ރަޝިޔާ އާއެކު ހިނގަމުންދާ ހަނގުރާމަ ވަގުތުން ހުއްޓުވާލެވިދާނެ. ނުވަތަ ހަނގުރާމަ ކުރިއަށް ގެންދެވިދާނެ،" ޓްރަމްޕް އެމަނިކުފާނުގެ ޓްރޫތް ސޯޝަލް ޕްލެޓްފޯމްގައި ވިދާޅުވިއެވެ.

ޓްރަމްޕް ވިދާޅުވީ، އެންމެ ވަަޒަނެއް ނުޖަހާ، މީގެ 12 އަހަރު ކުރިން އޮބާމާ ހަދިޔާ އަކަށް ދެއްވި ކްރީމިއާ އަނބުރާ ނުލިބޭނެ ކަމަށާއި، ނޭޓޯ ގެ ތެރެއަށް ޔޫކްރެއިން އަކަށް ނުވަދެވޭނެ ކަމަށެވެ. ބައެއް ކަންކަމަކީ ދުވަހަކުވެސް ބަދަލު ނުވާނެ ކަންކަން ކަމުގައި ޓްރަމްޕް ވިދާޅުވިއެވެ.

ޓްރަމްޕް ގެ މި ވާހަކަފުޅަށް ޖަވާބު ދެއްވަމުން ޒެލެންސްކީ އާދިއްތަ ދުވަހު ވިދާޅުވެފައިވަނީ، ކުރީގައިވެސް މޮސްކޯ އަށް ދޫކޮށްލި ސަރަހައްދުތަކުން ޕުޓިން އަށް ލިބުނީ ހަނގުރާމަ ކުރުމަށް އިތުރު ހިތްވަރު ކަމަށެވެ. "އަޅުގަނޑުމެން އެންމެންގެވެސް އެދުމަކީ މި ހަނގުރާމަ އަވަހަށް އަދި ސަލާމަތްތެރިކަމާއެކު ނިންމާލުން. އަދި މި ސުލްހައަކީ ދެމެހެއްޓެނިވި ސުލްހައަކަށް ވާންޖެހޭނެ،" ޒެލެންސްކީ އެކްސް ޕްލެޓްފޯމްގައި ވިދާޅުވިއެވެ.

ވައިޓް ހައުސްގެ މަޝްވަރާތަކުގައި ޔޫރަޕިއަން ޔޫނިއަންގެ އިސް ލީޑަރުންވެސް ބައިވެރިވެވަޑައިގަންނަވާނެއެވެ. މީގެ ތެރޭގައި ޔޫރަޕިއަން ކޮމިޝަންގެ ރައީސް އުރްސުލާ ވޮން ޑަރ ލެޔަން، ޖަރުމަނުގެ ޗާންސެލަރ ފްރީޑްރިޗް މަރޒް، އަދި ފްރާންސްގެ ރައީސް އެމެނުއެލް މެކްރޯން ހިމެނިވަޑައިގަންނަވައެވެ. މި ބޭފުޅުންގެ ކަންބޮޑުވުމަކީ، ޒެލެންސްކީ ޓްރަމްޕް ބައްދަލުވުމުގެ ތެރެއިން ރަޝިޔާ އަށް މާބޮޑަށް ފަހިވާ ގޮތައް އެއްބަސްވުމަކަށް އަތުވެދާނެއަތީ އެވެ.

އެމެރިކާގެ ސްޓޭޓް ސެކްރެޓަރީ މާކޯ ރުބިއޯ ވިދާޅުވެފައިވަނީ ސުލްހައިގެ އެއްބަސްވުމަކާ ހަމައަށް ދިއުމަށް އަދިވެސް ގިނަ މަސައްކަތްތަކެއް ކުރަންޖެހޭ ކަމަށެވެ. "އަޅުގަނޑުމެން އަދި ސުލްހައިގެ އެއްބަސްވުމަކާ ކައިރިއެއް ނުވޭ. އެއްބަސްވެވިދާނެ ބައެއް ދާއިރާތައް ފާހަގަކުރެވުނު ނަމަވެސް، ބޮޑެތި ތަފާތުތަކެއް އަދިވެސް އެބަހުރި،" ރުބިއޯ ވިދާޅުވިއެވެ.