ހަނގުރާމައިގެ ސަބަބުން ކާބޯތަކެތި ނުލިބި، ހައިހޫނު ކަމުގައި, ފާއިތުވި 24 ގަޑިއިރު ތެރޭގައި 5 މީހުން ޣައްޒާ ގައި މަރުވެއްޖެ އެވެ.

ޣައްޒާގެ ސިއްހަތާ ބެހޭ ވުޒާރާއިން ހާމަކުރި ގޮތުގައި ވޭތުވެދިޔަ 24 ގަޑިއިރު ބަނޑަށް މަރުވި މީހުންގެ ތެރޭގައި ދެ ކުޑަކުދިން ހިމެނެއެވެ.

އިސްރާއީލުން ޣައްޒާ އަށް އަނިޔާވެރި ހަމަލާތައް ފެށުނީއްސުރެ ކާބޯތަކެތި ނުލިބުމުގެ ސަބަބަން މަރުވެފައިވާ މީހުންގެ އަދަދު 263 އަށް އަރާފައިވާ ކަމަށް ސިއްހީ ވުޒާރާ އިން ބުނެއެވެ. މީގެ ތެރޭގައި 112 ކުޑަކުދިން ހިމެނެއެވެ.

މޭ މަހުގެ ފަހުކޮޅު އިންސާނީ އެހީ ފޯރުކޮށްދިނުމަށް ޚާއްސަ ސަރަހައްދުތަކެއް ޤާއިމުކުރެވުނު ފަހުން، އެތަންތަނުން އެހީ ހޯދުމަށް މަސައްކަތްކުރި މީހުންގެ ގަޔަށް ބަޑިޖެހުމުގެ ސަބަބުން 2،000 އާ ގާތްކުރާ އަދަދެއްގެ މީހުން މަރުވެފައިވާ ކަމަށް ޣައްޒާގެ ސިއްހީ ވުޒާރާއިން ބުނެއެވެ.

ޣައްޒާ އަށް އެއްގަމު މަގުން އެހީ ފޯރުކޮށް ދިނުމަށް ހުރަސް އަޅާތީ ވައިގެ މަގުން ގެނެސް މަތިން ވައްޓާލާ އެހީގެ ޕެލެޓް ތަކުން ޖެހި ވެސް މީހުން ދަނީ މަރުވަމުންނެވެ. ދާދިފަހުން، ޣައްޒާގެ ދެކުނުގައި ހުންނަ ޚާން ޔޫނިސްގެ ސަރަހައްދުގައި ހުންނަ ނާސިރު ހޮސްޕިޓަލުން ހާމަކުރި ގޮތުގައި، ވަގުތީ ޓެންޓެއްގެ މައްޗަށް އެހީގެ ފޮއްޓެއް ވެއްޓި، އުމުރުން ދުވަސްވީ މީހަކު މަރުވެފައިވެއެވެ.

ވައިގެ މަގުން އެހީ ވައްޓާލުމުގެ ސަބަބުން ވޭތުވެދިޔަ ހަފްތާތަކުގައި އެތައް ބަޔަކު މަރުވެ، އަނިޔާވެފައިވެއެވެ. އެހީ ފޯރުކޮށްދޭ ޖަމްއިއްޔާ ތަކުން ބުނާ ގޮތުގައި ވައިގެ މަގުން އެހީ ފޯރުކޮށްދިނުމަކީ ނުރައްކާތެރި އަދި ނާކާމިޔާބު ގޮތެކެވެ.

ޣައްޒާގެ ދެ މިލިއަނަށްވުރެ ގިނަ އާބާދީ ބަނޑުހައިހޫނުކަމާ ކުރިމަތިލަމުންދާއިރު، އެހީ ޖަމްއިއްޔާތަކުން އިސްރާއީލަށް ގޮވާލަމުންދަނީ އެއްގަމު މަގުން އެހީ ފޯރުކޮށްދިނުމަށް ހުރި ހުރަސްތައް ނައްތާލުމަށެވެ.