އިސްރާއީލުގެ މާލީ ވަޒީރު ފާސްކޮށްފައިވާ، ހިސޯރު ކޮށްފައިވާ ވެސްޓް ބޭންކުގައި ޔަހޫދީންނަށް ގެތައް އިމާރާތްކުރުމުގެ މަޝްރޫޢުން "ދުރުހެލިވުމަށް" ޔޫރަޕިއަން ޔޫނިއަންގެ އިސް ޑިޕްލޮމެޓް ބުރާސްފަތި ދުވަހު އިސްރާއީލަށް ގޮވާލައްވައިފިއެވެ.

"އީ1 (އީ-ވަން) އާބާދުކުރުމުގެ މަޝްރޫޢު ކުރިއަށް ގެންދިއުމަށް އިސްރާއީލުގެ ސަރުކާރުން ނިންމާފައިވާ ނިންމުމަކީ ދެ ދައުލަތުގެ ޙައްލު އިތުރަށް ބަލިކަށިކޮށްލާ ކަމެއްގެ އިތުރުން، ބައިނަލްއަޤްވާމީ ޤާނޫނާ ޚިލާފު ކަމެކެވެ،" ކާޖާ ކާލާސް ވިދާޅުވިއެވެ.

"މި ނިންމުން ކުރިއަށް ގެންދިއުމުން ކުރާނެ ފުޅާ ދާއިރާގެ އަސަރުތައް ފާހަގަކުރަމުން، މި ނިންމުންިންމުން ކުރިއަށް ނުގެންދިއުމަށް ޔޫރަޕިއަން ޔޫނިއަނުން އިސްރާއީލަށް ގޮވާލަމެވެ."

އިސްރާއީލުގެ ހައްދުފަހަނަ އެޅި މާލީ ވަޒީރު ބުރާސްފަތި ދުވަހު، އޮކިއުޕައިޑް ވެސްޓް ބޭންކުގެ ވަކިން ޚާއްޞަ ސަރަޙައްދެއްގައި 3,400 ގެ އިމާރާތްކުރުމުގެ މަޝްރޫޢަށް ވަނީ ހުއްދަ ދީފައެވެ. އަދި އެތައް ޤައުމަކުން ހާމަ ކޮށްފައިވާ ފަލަސްޠީނުގެ ދައުލަތެއް ގަބޫލުކުރުމުގެ ވިސްނުމަށް ރައްދު ދިނުމުގެ ގޮތުން އެ ސަރަޙައްދު އިސްރާއީލުން ހިފުމަށް އޭނާ ގޮވާލާފައި ވެއެވެ.

އދ.ގެ ސެކްރެޓަރީ ޖެނެރަލް އިންޒާރު ދެއްވާފައިވާ ގޮތުގައި އެ ސަރަޙައްދުގައި އިސްރާއީލުން ޔަހޫދީންނަށް ގެތައް އިމާރާތްކުރުމުން އިސްރާއީލް-ފަލަސްޠީނު މައްސަލަ އަށް ހައްލު ހޯދުމަށް މުޅި ދުނިޔެ ގަބޫލު ކުރާ ދެ ދައުލަތުގެ ޙައްލު ހޯދުމުގެ އުންމީދުތަކަށް "ނިމުމެއް އަންނާނެ" ކަމަށެވެ.

ޖެރޫސަލަމްގެ އިރުމަތީގައިވާ އީ1 ގެ ނަމުން މަޝްހޫރު ޚާއްޞަ ބިމުގައި އިމާރާތްކުރުމުގެ އަމާޒު އިސްރާއީލުން ވަނީ ދިގު މުއްދަތެއް ވަންދެން ގެންގުޅެފައެވެ. ނަމަވެސް ބައިނަލްއަޤްވާމީ ފިއްތުންތަކާ ހެދި މި މަޝްރޫޢު ވަނީ އެތައް އަހަރެއް ވަންދެން މަޑުޖައްސާލާފައެވެ.

ބައިނަލްއަޤްވާމީ ޤާނޫނުގެ ދަށުން ވެސްޓް ބޭންކުގައި އިސްރާއީލުން އާބާދުކުރާ ސަރަޙައްދުތަކަކީ ޣައިރު ޤާނޫނީ ކަމެއް ކަމަށް ބެލެވެއެވެ.

އަދި ގާތްގަނޑަކަށް 12 އަކަ ކިލޯމީޓަރުގެ މި ސަރަޙައްދުގައި އިމާރާތްކުރުމުން، އިރުމަތީ ޖެރޫސަލަމް ވެރިރަށް ކަމުގައި ބަލައިގެން މުސްތަޤްބަލުގެ ފަލަސްޠީނު ދައުލަތެއްގެ އުންމީދުތަކަށް ހުރަސްއެޅިގެންދާނެ ކަމަށް ފާޑުކިޔާ ފަރާތްތަކުންނާއި ބައިނަލްއަޤްވާމީ މުޖުތަމަޢުން ވަނީ ބުނެފައެވެ.

މި ސަރަޙައްދު އޮންނަނީ ޤަދީމީ ޖެރޫސަލަމް ސިޓީ އާއި އިސްރާއީލުން އާބާދު ކޮށްފައިވާ މާލޭ އެޑްމީމް އާ ދެމެދުގައެވެ. އަދި މިއީ ފަލަސްޠީނު ސަރަޙައްދުގެ އުތުރާއި ދެކުނު ގުޅުވައިދޭ މަގުތަކާ ކައިރީގައިވާ ތަނެކެވެ.