ހަނގުރާމަ ހުއްޓާލުމުގެ ސުންގަޑީގެ ފަހުން ވެސް ކެމްބޯޑިއާ އިން ހަމަލާތައް ދީފައިވާ ކަމަށް ތައިލެންޑުގެ ސިފައިން ބުނެފި
މިހާތަނަށް މި ހަނގުރާމައިގެ ސަބަބުން 300،000 އަށްވުރެ ގިނަ މީހުން ހިޖުރަކޮށް، އެތައް ބަޔަކު މަރުވެފައިވޭ.
ކެމްބޯޑިއާގެ މިލިޓަރީ އުޅަނދެއް ކެމްބޯޑިއާގެ ބޯޑަރު ސިޓީއެއް ކަމަށްވާ ސަމްރޮންގް އާއި ދިމާއަށް ދަތުރު ކުރަނީ - ޖުލައި 26، 2025
ހަނގުރާމަ ހުއްޓާލުމުގެ ސުންގަޑީގެ ފަހުން ވެސް ކެމްބޯޑިއާ އިން ހަމަލާތައް ދީފައިވާ ކަމަށް ތައިލެންޑުގެ ސިފައިން ބުނެފި އެވެ.
ކެމްބޯޑިއާ އިން ހަނގުރާމަ ހުއްޓާލުމުގެ އެއްބަސްވުމާ ޚިލާފަށް ގިނަ ސަރަޙައްދުތަކެއްގައި ހަމަލާތައް ދީފައިވާ ކަމަށް ތައިލެންޑުގެ ސިފައިންގެ ތަރުޖަމާނެއް އަންގާރަ ދުވަހު ހާމަ ކޮށްފައި ވެއެވެ. ހޯމަ ދުވަހު މި ދެ އަވަށްޓެރިން މެެލޭޝިއާ ގައި އެއްބަސްވީ އެއްވެސް ޝަރުތެއް ނެތި ވަގުތުން ހަނގުރާމަ ހުއްޓާލުމަށެވެ.
ތައިލެންޑުގެ ސިފައިން ވަނީ އަމިއްލަ ދިފާޢުގައި ހާލަތާ އެކަށީގެންވާ މިންވަރަށް ރައްދު ދީފައި ކަމަށް ތައިލެންޑުގެ އަސްކަރިއްޔާގެ ބަޔާނުގައި ބުނެފައި ވެއެވެ.
ތައިލެންޑާއި ކެމްބޯޑިއާގެ ލީޑަރުން ހޯމަ ދުވަހު މެލޭޝިއާގައި ބައްދަލު ކުރައްވާ، ހަނގުރާމަ ހުއްޓާލުމަށް އެއްބަސްވި އިރު، ފާއިތުވި 5 ދުވަހުގެ ހަމަލާތަކުގެ ސަބަބުން، އެތައް ބަޔަކު މަރުވެ، 300،000 އަށްވުރެ ގިނަ މީހުން ދެ ގައުމުގެ ބޯޑަރު ސަރަހައްދު ދޫކޮށް ހިޖުރަ ކޮށްފައި ވެއެވެ.
