ތައިލެންޑާއި ކެމްބޯޑިއާގެ ވެރިންގެ މެދުގައި ހަނގުރާމަ ހުއްޓާލުމުގެ މަޝްވަރާތައް މެލޭޝިއާގައި ފަށައިފި
ތައިލެންޑާއި ކެމްބޯޑިއާގެ ވެރިން މެލޭޝިއާގައި ސުލްޙައިގެ މަޝްވަރާތަކެއް ފެށި އިރު މިހާރު ފަސްވަނަ ދުވަހަށް ދެމިގެންގޮސްފައިވާ ހަނގުރާމައިގައި، 35 މީހުންގެ ފުރާނަ ގެއްލި، 270,000 އަށްވުރެ ގިނަ މީހުން ހިޖުރަކުރަން މަޖުބޫރުވެފައިވޭ.
ކެމްބޯޑިއާ އާއި ތައިލެންޑް މެލޭޝިއާގައި ސުލްހައިގެ މަޝްވަރާތައް ފެށުން - ޖުލައި 2025 ޖުލައި 28 | ގެޓީ އިމޭޖަސް
ތައިލެންޑާއި ކެމްބޯޑިއާގެ ވެރިންގެ މެދުގައި ހަނގުރާމަ ހުއްޓާލުމުގެ މަޝްވަރާތައް މެލޭޝިއާގައި ފަށައިފިއެވެ.
މިއީ ބޯޑަރުގައި ހިނގަމުންދާ ލޭއޮހޮރުވުންތައް ހުއްޓުވުމަށް ކުރެވޭ ކުއްލި މަސައްކަތެކެވެ. މި ހަނގުރާމަ ފަސްވަނަ ދުވަހަށް މިހާރު ވަނީ ދެމިގެން އައިސްފައެވެ. އަދި ބައިނަލްއަޤްވާމީ ފަރާތްތަކުން ސުލްޙައަށް ގޮވާލަމުންދާއިރުވެސް މި ހަނގުރާމަ ދަނީ ކުރިއަށެވެ.
ތައިލެންޑުގެ ވަގުތީ ބޮޑުވަޒީރު ޕުމްތާމް ވެޗަޔާޗައި އާއި ކެމްބޯޑިއާގެ ބޮޑުވަޒީރު ހުން މާނެޓް ވަނީ ހޯމަ ދުވަހު މެލޭޝިއާގެ އިދާރީ ވެރި ރަށް ޕުތްރަޖާޔާގައި ހުންނަ މެލޭޝިއާގެ ބޮޑުވަޒީރު އަންވަރު އިބްރާހީމްގެ ރަސްމީ ގަނޑުވަރުގައި ހަނގުރާމަ ހުއްޓާލުމުގެ މަޝްވަރާތައް ފަށާފައެވެ. އަންވަރު އިބްރާހީމަކީ ސަރަޙައްދީ ޖަމްޢިއްޔާ އާސިއާންގެ ރައީސެވެ.
އަންވަރު އިބްރާހީމް ހޯސްޓް ކުރަައްވާ މި މަޝްވަރާތަކުގެ މަޤްޞަދަކީ މިހާތަނަށް މަދުވެގެން 35 މީހުން މަރުވެ، 270,000 އަށްވުރެ ގިނަ މީހުން ތައިލެންޑާއި ކެމްބޯޑިއާގެ ބޯޑަރުގެ ދެފަރާތުން ގެދޮރު ދޫކޮށް ދާން މަޖުބޫރުވެފައިވާ ހަނގުރާމަ ހުއްޓުމަކަށް ގެނައުމެވެ.
މެލޭޝިއާގެ އިސް އޮފިޝަލެއް ހޯމަ ދުވަހު ރޮއިޓަރސް ނިއުސް އޭޖެންސީއަށް ދިން ރިޕޯޓެއްގައި ބުނެފައިވާ ގޮތުގައި މި ބައްދަލުވުމުގައި އެމެރިކާ އާއި ޗައިނާގެ ސަފީރުންވެސް ބައިވެރިވެފައިވެއެވެ.
ހޯމަ ދުވަހުގެ ކުރީކޮޅު އެކްސް ގައި ކުރެއްވި ޕޯސްޓެއްގައި ހުން މާނެޓް ވިދާޅުވެފައި ވަނީ މި މަޝްވަރާތަކުގެ މަޤްޞަދަކީ ތައިލެންޑާއެކު އޮތް ހަނގުރާމަ ވަގުތުން ހުއްޓާލުމެވެ.
ނަމަވެސް ހޯމަ ދުވަހު ބެންކޮކުން ފުރާވަޑައިގަތުމުގެ ކުރިން ޕުމްތާމް ނޫސްވެރިންނަށް ވިދާޅުވީ، ކެމްބޯޑިއާއިން މި މައްސަލަ ހައްލުކުރުމުގައި ތެދުވެރިކަމާއެކު ޢަމަލު ކުރާކަމަކަށް އޭނާ ދެކެވަޑައިނުގަންނަވާ ކަމަށެވެ.
"އެމީހުންގެ ޢަމަލުތަކުން އެކަން ދައްކައިދެއެވެ. އެމީހުން އެބަޖެހޭ ތެދުވެރި ނިޔަތެއް ދައްކަން. އަދި އަހަރެމެން އެކަން ބައްދަލުވުމުގައި ވަޒަން ކުރާނަމެވެ." އޭނާ ވިދާޅުވިއެވެ.
ޕުތްރަޖާޔާ ގައި ހުރި އަލްޖަޒީރާގެ ރިޕޯޓަރު ބުނެފައިވަނީ މެލޭޝިއާގައި ކުރެވޭ މަޝްވަރާތަކުން ކުރިއެރުމެއް ލިބިދާނެކަމުގެ އުއްމީދު އޮތްކަމަށެވެ.
