ޕެނަލްޓީގައި ސްޕެއިން ބަލިކޮށް، އިންގްލެންޑުން ޔޫރޯ ކާމިޔާބު ކޮށްފި

އަންހެނުންގެ ޔޫރޯ ފުޓުބޯޅަ މުބާރާތުގެ ފައިނަލްގައި ސްޕެއިންގެ މައްޗަށް ކުރި ހޯދައި، އިންގްލެންޑުން މުބާރާތުގެ ޗެމްޕިއަންކަން ދިފާއު ކޮށްފި އެވެ.

އާދީއްތަ ދުވަހުގެ ރޭ ކުޅުނު ފައިނަލް އިންގްލެންޑުން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮުތުމުން، އިތުރު ވަގުތުގެ ގޮތުގައި ވަނީ ދެ ހާފު ކުޅެފަ އެވެ. އެ ދެ ހާފު ނިމުނުއިރު ވެސް، އެއްވެސް ޓީމަކަށް ލަނޑެއް ނުޖެހުމުން ނަތީޖާ ނެރުމަށް ޖެހީ ޕެނަލްޓީ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ސްޕެއިން އިންނެވެ. ނަމަވެސް، އިންގްލެންޑުން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 25 ވަނަ މިނެޓުގައި ސްޕެއިން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މަރިއޯނާ ކެންޑިއަންޓޭ އެވެ. އެއީ ސްޕެއިންގެ ޑިފެންޑަރު އޮނާ ބަޓަލް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ނަމަވެސް މެޗުގެ ދެ ވަނަ ހާފު ފަށައިގެން ކުރީ ކޮޅު އިންގްލެންޑުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ދެ ވަނަ ހާފު 12 ވަނަ މިނެޓުގައި އިންގްލެންޑަށް ނަތީޖާ ހަމަހަމަ ކޮށްދިނީ އަލެސިއާ ރޫސޯ އެވެ. އޭނާ އެ ލަނޑު ޖެހީ ކޯލް ކެލީ ތަނަވަސްކޮށްދިން ފުރުސަތެއްގަ އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީގައި އިންގްލެންޑުން ވަނީ އެ ޓީމުގެ ތިން ޕެނަލްޓީ ކާމިޔާބު ކޮށްފަ އެވެ. އެ ޓީމުގެ ދެ ޕެނަލްޓީ ވަނީ ނާކާމިޔާބުވެފަ އެވެ. ސްޕެއިން އަށް އެންމެ ޕެނަލްޓީއެއް ކާމިޔާބު ކުރެވުނުއިރު، ތިން ޕެނަލްޓީ ވަނީ ނާކާމިޔާބުވެފަ އެވެ.

މީގެ ކުރިން 2022 ވަނަ އަހަރު އަމިއްލަ ޤައުމުގައި އޮތް ޔޫރޯ ފުޓުބޯޅަ މުބާރާތުގެ ފައިނަލްގައި ޖަރުމަނު ބަލިކޮށް އިންްގްލެންޑުން ވަނީ މުބާރާތް ކާމިޔާބު ކޮށްފަ އެވެ. މިއީ ފުޓުބޯޅައިގައި އިންގްލެންޑުން ހޯދި ބޮޑު ކާމިޔާބީ އެކެވެ.