ތައިލެންޑް އާއި ކެމްބޯޑިއާ އާ ބޯޑަރު ސަރަހައްދުގައި ދެ ގައުމުގެ ސިފައިން ގެ ދެމެދުގައި ހަމަލާތައް ބަދަލު ކުރަމުން އެބަދެއެވެ.

ހަމަލާތައް ބަދަލު ކުރަމުން ދަނީ ތައިލެންޑާއި ކެމްބޯޑިއާގެ ސަރަހައްދީ ބޯޑަރުގެ ދެބަސްވުން އުފެދިފައިވާ ސަރަހައްދެއްގައެވެ. 12 މީހުންނަށް ވުރެ ގިނަ މީހުން ހަމަލާ ތަކުގައި މަރުވެފައިވާ ވާއިރު، އޭގެ ތެރޭގައި ސިފައިންނާއި އާންމުން ވެސް ހިމެނެއެވެ. ހަމަލާތަކުގައި ތައިލެންޑުން ޒަޚަމްވި މީހުންގެ އަދަދު 14 ށް ވުރެ މައްޗަށް ގޮސްފައިވާ ކަމަށް ރިޕޯޓުތައް ބުނެއެވެ.

ތައިލެންޑުގގެ ސިފައިންގެ ބަޔާނެއްގައި ބުނެފައިވަނީ ފުރަތަމަ ހަމަލާ ދިނީ ބޮޑެތި ހަތިޔާރު ބޭނުން ކޮށްގެން ކެމްބޯޑިއާގެ ސިފައިން ކަމަށެވެ. އެހެންނަމަވެސް ކެމްބޯޑިއާގެ ޤައުމީ ދިފާޢީ މިނިސްޓްރީން ބުނެފައިވަނީ އެ ގައުމުގެ ސިފައިން ޢަމަލު ކޮށްފައި ވަނީ އަމިއްލަ ދިފާޢުގައި، އެމީހުންނަށް ހަމަލާ ދެވުނު ފަހުން ކަމަށެވެ.

ބޯޑަރުގެ އެކި ސަރަހައްދުތަކުގައި މިހާރުވެސް ހަނގުރާމަ ކުރިއަށްދާ ކަމަށް ބުނެވެއެވެ. މިއީ ދެ ގައުމުގެ ދެމެދުގައި ބޯޑަރުގައި މިލްކުވެރި ކަމާ މެދު ޚިލާފު އުފެދިފައިވާ މައްސަލަ 100 އަހަރަށް ވުރެ ދުރަށް ދެމިގެން ގޮސްފައިވާ އިރު މެއި މަހުގެ ތެރޭގައި ވަނީ މައްސަލަ އިތުރަށް ހޫނުވާން ފަށާފައެވެ.

ހަމަލާތަކާ ގުޅިގެން ތައިލެންޑުން ވަނީ ކެމްބޯޑިއާގައި ހުރި އެ ގައުމުގެ ސަފީރު އަނބުރާ ގެނެސްފައެވެ. އަދި ކެމްބޯޑިއާއިން ވަނީ ތައިލެންޑުގައި ތިބި އެ ގައުމުގެ ޑިޕްލޮމެޓުން އަނބުރާ ގެނެސް، ތައިލެންޑުގެ ހުރިހާ ޑިޕްލޮމެޓުންނަށް އެ ގައުމު ދޫކޮށް ދިއުމަށް އަންގާފައެވެ.

ތައިލެންޑުގެ ތަޢުލީމީ މިނިސްޓްރީން ވަނީ ކެމްބޯޑިއާއާ އެކު ހިނގި ޖެހުންތަކާ ގުޅިގެން ބޯޑަރު ސަރަހައްދުތަކުގައި ހު ހުރި ސްކޫލުތައް ވަގުތީގޮތުން ބަންދުކުރުމަށް އަންގާފައެވެ.

ތައިލެންޑް ގެ ނޫހެއް ކަމަށްވާ "ތައި އެންކުއަަރަރ" އިން ރިޕޯޓުކޮށްފައިވާ ގޮތުގައި، ހަމަނުޖެހުން ހިނގަމުންދާ ސަރަހައްދު ތަކުން 582 ސްކޫލެއް ބަންދުކުރެވުނެވެ. ސްކޫލުތައް ބަންދު ކުރަން ނިންމީ މީހުން ދިރިއުޅޭ ސަރަހައްދަށް ރޮކެޓް ހަމަލާ އެއް އެރުމުންނެވެ.

އަވަށްޓެރިންގެ މެދުގައި ފެށުނު މި ހަމަނުޖެހުންތަކާ މެދު ކަންބޮޑުވުން ފާޅު ކޮށް ނިމުމަކަށް ގެނައުމަށް، އެސޯސިއޭޝަން އޮފް ސައުތު އޭޝިއަން ނޭޝަންސް (އާސިއާން) ގެ މި ހާރުގެ ރިޔާސަތު މެލޭޝިޔާ އިން ވަނީ ގޮވާލާފައެވެ. މެލޭޝިޔާ ގެ ބޮޑު ވަޒީރު އަންވަރު އިބްރާހިމް ވިދާޅުވީ ބުރާސްފަތި ދުވަސް ނިމުމުގެ ކުރިން ދެ ގައުމުގެ ވެރިންނާ އޭނާ ވާހަކަފުޅު ދައްކަވާނެ ކަމަށެވެ.