ޣައްޒާގައި ހައިހޫނު ކަމުގައި މަރުވި މީހުންގެ އަދަދު 111 އަށް އަރައިފި އެވެ.

ޣައްޒާ ސްޓްރިޕްގެ ހެލްތު މިނިސްޓްރީން ބުނާ ގޮތުގައި، ވޭތުވެދިޔަ 24 ގަޑިއިރުގެ ތެރޭގައި ހައިހޫނު ކަމާއި ކާނާ ނުލިބުމުގެ މައްސަލަތަކާ ގުޅިގެން އިތުރު 10 މަރު ރިކޯޑު ކުރެވިފައި ވެއެވެ.

ޣައްޒާގެ މެޑިކަލް ޑޮކްޓަރެއް ކަމަށް ވާ އަޙްމަދު އަލް-ފައްރާ ހާމަ ކުރި ގޮތުގައި ކޮންމެ ދުވަހަކު ކަހަކަ ގޮތަކަށް ހައިހޫނު ކަމާ ގުޅިފައިވާ ބަލިތަކުގައި ހޮސްޕިޓަލަށް މީހުން ގެނެއެވެ. އެމީހުންނަކީ ކާނާ ނުލިބުމުގެ ސަބަބުން ހަށިގަނޑު ބަލިކަށި މީހުން ކަން އޭނާ ފާހަގަ ކުރެއްވިއެވެ.

ޚާން ޔޫނިސްގެ ނާސަިރު ހޮސްޕިޓަލުގެ ކުޑަކުދިންގެ ބަލިތަކުގެ ޑިޕާޓްމަންޓުގެ އިސްވެރިޔާ ޑރ. އަލް-ފައްރާ، ބީބީސީ ވޯލްޑް ސަރވިސްގެ ނިއުސްޑޭ ޕްރޮގްރާމަށް ދެއްވި ތަފްސީލުގައި ބުނީ ޣައްޒާ ގައި "ކާއެއްޗެއް ނެތެވެ، "ފުށެއް ނެތެވެ، ތަރުކާރީ އެއް ނެއް ނެތެވެ. އެއްވެސް އެއްޗެއް ލިބެން ނެތެވެ."

އޭނާ ފާހަގަ ކުރި ގޮތުގައި ބަނޑުހައިހޫނު ކަމުގައި ހޮސްޕިޓަލަށް ގެންނަ ބައެއް ކުޑަކުދިން ފަރުވާ ދެމުން ދަނިކޮށް ވަނީ މަރުވެފައެވެ.

ޣައްޒާގައި ހައިހޫނުކަން އާންމު ވުމާ ގުޅިގެން ނުރައްކަލުގެ އިންޒާރު ދެމުން 100 އަށް ވުރެ ގިނަ އެހީދޭ ޖަމްޢިއްޔާތަކުން ސޮއިކޮށްފައިވާ ބަޔާނެއް ބުދަ ދުވަހު ވަނީ އާންމު ކޮށްފައެވެ.

މި ބަޔާނުގެ ގައި އިސްރާއީލު ސަރުކާރުން ޣައްޒާ ހިޞާރު ކޮށްފައި އޮތުމުގެ ސަބަބުން ޣައްޒާ ގެ ރައްޔިތުންނަށް ހައިހޫނު ކަމާ ކުރިމަތިލާން ޖެހިފައި ވާއިރު، އިންސާނީ އެހީތެރިކަން ފޯރުކޮށްދޭ މީހުން އެމީހުންގެ ޢާއިލާތަކަށް ކާންދިނުމަށްޓަކައި، އެމީހުންގެ ގަޔަށް ބަޑިޖެހުމުގެ ނުރައްކާ އޮތްކަން އެނގި ތިބެ، އެހީ ހޯދަން ކިއުތަކުގައި ތިބެން މަޖުބޫރު ވެފައި ވާ ކަމަށެވެ.

ޣައްޒާ ބަންދުކޮށް ހިސާރު ކުރުމުގެ ސަބަބުން "ހަމަނުޖެހުމާއި، ބަނޑުހައިހޫނު ކަމާއި، މަރު" އާންމު ވެފައިވާ ކަމަށް ބަޔާނުގައި ބުނެއެވެ.

ސަޕްލައިތައް "މުޅިން ހުސްވެފައިވާ" އިރު، އިންސާނީ އެހީތެރިކަން ފޯރުކޮށްދޭ މީހުން ވެސް ބަނޑަށް މަރުވަމުންދާ ކަމަށް ބުނެފައިވެއެވެ.

ޣައްޒާގެ ތެރޭގައި ހުރި ގުދަންތަކުގައި އެތައް ޓަނެއްގެ ކާބޯތަކެއްޗާއި، ފެނާއި، ބޭސްފަރުވާގެ ތަކެތި ބޭނުން ނުކުރެވި ހުރި ކަމަށާއި، އެތަކެތި ބޭނުން ކުރުމަށާއި ފޯރުކޮށްދިނުމަށް ޖަމްޢިއްޔާތަކަށް ހުރަސްއެޅިފައިވާ ކަމަށް ވެސް ބުނެފައިވެއެވެ.

އޭގެ އިތުރުން އދ އިން އިސްނަގައިގެން ހިންގާ އިންސާނީ އެހީގެ ނިޒާމު ފެއިލްވެފައެއް ނުވާ ކަމަށާއި އޭގެ ބަދަލުގައި އެ ނިޒާމު ހިންގުމަށް ހުރަސް އަޅާފައިވާ ކަމަށް މި ބަޔާނުގައި ބުނެފައިވެއެވެ.

ޚާއްޞަކޮށް ކުޑަކުދިންނާއި އުމުރުން ދުވަސްވީ މީހުންނަށް ކާނާ ނުލިބުމުގެ ގެއްލުން ބޮޑު ކަމަށާއި، ދާއިމީކޮށް ހަނގުރާމަ ހުއްޓުވުމަށް ހުރި ހުރިހާ ހުރަސްތަކެއް ނައްތާލުމަށާއި، ކާނާ އާއި އެހީ ފޯރުކޮށްދިނުމަށް ހުރިހާ އެއްގަމު މަގުތައް އަލުން ހުޅުވުމަށާާއި، އިސްރާއީލުގެ ސިފައިންގެ ބާރުގެ ދަށުން ހިންގާ ތަކެތި ބެހުމުގެ ސައިޓުތައް ހުއްޓާލައި، އަދި އދ އިން އިސް ނަގައިގެން ހިންގާ އިންސާނީ އެހީގެ މަސައްކަތްތަކަށް ފުރުސަތު ދިނުމަށް އެ ބަޔާނުގައި ގޮވާލާފައި ވެއެވެ.

މި ބަޔާނުގައި ޖުމްލަ 115 އެހީދޭ އެޖެންސީއަކުން ސޮއިކޮށްފައިވެއެވެ.