ޣައްޒާ ގައި މަސައްކަތް ކުރާ ޑޮކްޓަރުން ހައިހޫނު ކަމުގެ ސަބަބުން ހާލު ދެރަވެ ވެއްޓެމުންދާ ކަމަށް އދ އިން ބުނެފިއެވެ.

އދ. ގެ ފަލަސްޠީނު ރެފިއުޖީ އެޖެންސީ (އަންރުވާ) ގެ އިސްވެރިޔާ އަންގާރަ ދުވަހު ވިދާޅުވެފައި ވަނީ އެ އެޖެންސީގެ މުވައްޒަފުންނާއި ޑޮކްޓަރުންނާއި އިންސާނީ އެހީތެރިކަން ފޯރުކޮށްދޭ މީހުން ބަނޑުހައިހޫނުކަމުގެ ސަބަބުން މަސައްކަތުގައި އުޅެނިކޮށް ހާލު ދެރަވެ ވެއްޓެމުންދާ ކަމަށެވެ.

އޭނާ ވިދާޅުވީ ޣައްޒާ އަށް ކުރިމަތިވެފައިވާ ކާބޯތަކެތީގެ ދަތިކަން އާންމު ރައްޔިތުންގެ އިތުރުން ޕްރޮފެޝަނަލް މަސައްކަތް ކުރާ އެންމެންނަށް ވެސް ވަނީ ފޯރާފައެވެ. އޭނާ ވިދާޅުވީ "މިހާރު ބޭނުންވަނީ އެހީތެރިކަމަށެވެ."

"ޑޮކްޓަރުން، ނަރުހުން، ނޫސްވެރިން، އިންސާނީ އެހީތެރިކަން ފޯރުކޮށްދޭ މީހުން، އޭގެ ތެރޭގައި އަންރުވާ ގެ މުވައްޒަފުން ވެސް ހިމެނޭ ގޮތުން، ހައިހޫނު ކަމުގައި އެ ތިބީ. ގިނަ މީހުން މިހާރު ބަނޑުހައިހޫނުކަމާއި ވަރުދެރަވުމުގެ ސަބަބުން އެމީހުންގެ ޑިއުޓީ އަދާ ކުރަމުން ދަނިކޮށް ހާލު ދެރަވެ ވެއްޓެމުން ދަނީ،" އަންރުވާގެ ކޮމިޝަނަރ ޖެނެރަލް ފިލިޕް ލަޒަރީނީ މިހެން ވިދާޅުވެފައި ވަނީ ޖެނީވާ ގައި ބޭއްވުނު ނޫސްވެރިންގެ ބައްދަލުވުމެއްގައި އޭނާގެ ޚާއްޞަ މަންދޫބު ހިއްސާކުރެއްވި ބަޔާނެއްގައެވެ.